Omufekelwa medhipago lyomwana a tuminwa kosaala 16

0
244

KuHelvy Shaanika na Nuusita Ashipala

Iihokolola moshiningwanima shi halutha moka shomukulukadhi ngoka ta fekelwa a dhipaga omwana gwoshilema nokufika po omudhimba gwe oya yi komeho nanando ye eli moshipangelo.

 Oshipotha shomunamivo 49 Hildegard Iiyambo osha tameke mOmpangulilo yaMangestrata mOshakati oshiwike shika, moka mangestalata Abel Simataa Sankwasa eshi undulile komasiku May 19.

Omufekelwa ka li ta vulu okuholoka mompangulilo oshoka okwa tuminwa kosaala yaantu mboka yena omadhiladhilo gaza pehala monaasalesa yaShakati.

Omukuluntu gwopolisi mOshana, Komufala Ndahangwapo Kashihakumwa okwa ti opolisi oya fala omukiintu omunamimvo 49 koshipangelo sha Shakati konima sho omukiintu nguka a tameke tau like omandhindhiliko gomuntu kee uvite nawa momutse. Kashihakumwa okwa ti omulongisikola gwopenongelo lyaShapwa Combined mOngwediva sho a tulwa mondjedhililo popolisi okwa tameke ta ulike kutya keli nawa momutse onkene opolisi oye mu fala koshipangelo shepangelo shaShakati, hoka a taambelwa momukunda 16.

Omolwa uunkundi mbuka wa ndhindhilikwa momufekelwa, iihokolola mbyoka yali ya thanekwa i kale ko andola mOmpangulilo ya Mangestalata gwaShakati Omaandaha oshiwike shika, oya kalekwa manga sigo esiku ndjoka tayi ka tseyithwa. 

Okwa itaalwa kutya Olyomakaya ga yi omufekelwa okwa dhipaga omwanakadhano ngoka ali omukambeli na okwa li ashike ha kala a kuutumba mokatemba. Kashihakumwa okwa ti opolisi otayi fekele kutya nguka okwa tete omwana nomakatana omanga inaa tula omudhimba gwe moshiyothelo shonyama ete gu fikilemo niilongitho yayooloka yomegumbo mwa kwatelwa oTV, esiga lyomicrowive noshowo oogodhi dholusheno, sigo ogwa lungunapo. Shiikolelela koombapila dhoka dha adhika megumbo lyomufekelwa, iilongitho mbyoka oyi na okufikwa po oshoka anuwa oya yiwa koodemoni.

“Sho a ulukilwa omudhimba gwomwanakadhona, ina ulika nando okuuva nayi nenge a nika oluhodhi. Okwa ti ye kali mo megumbo sho shika shaningilwa omwanakadhona. Omukiintu ngoka ena omadhiladhilo geli pehala ota tameke okulila ngele okwa tala omudhimba gwomwana, nando na kale andola oye omudhipaga,” Kashihakumwa ta ti.

Aanambelewa yopolisi posasiona yaNgwediva oya ti omanga edhipago ndyoka inaali ningwa omukiintu ngoka okwa ile poombelewa dhopolisi te ya indile ekwatho oshoka aniwa omundohotola gwe okwe mu pe omiti dha puka. Aapolisi oya ti yo oye mu pe omayele andola opo a shune ko kundohotola. Ihe omukiintu okwa tsikile nokuyalombwela kutya pakutala ndohotola gwe, ka li ta monika ngaashi ha monika shito, ihe okwa li ta monika a fa a shituka oshilikama. 

Konima okwa tameke ta pula aapolisi ye mu ulukile oombapila dhawo dhoku kutwa miilonga, shaashi pamwe ka ye shi aapolisi yoshili. 

“Shoka tashi kumitha ooshika kutya pethimbo ta pula ngaaka okwa li a lotela, iitegelela nomuntu ito dhiladhila kutya pamwe okwa nika oshiponga,” omupolisi gumwe ta ti. 

Omusita gwegongalo lyoFour Square mOngwediva ndjoka naku fekelwa a ningile oshilyo omumvo 1997 okwa ti omukiintu ngoka omuntu omunambili. Ihe omushiinda gwe gumwe na ye ngoka a ti nguka omuntu omunambili okwa gwedha ko a ti omaihumbato gamushiinda she oga tameke okulunduluka konima yomasiku omashona omanga oshiningwanima shoka inaashi ningwa. Okwa ti esiku limwe okwa li a popitha omushiinda she iikando itatu omanga a li ta tekele iimeno mohofa ye ndele anuwa ine mu yamukula nando osha. 

Omusita Festus Negumbo gwegongalo lyaFour Square okwa ti  omukiintu nguka “okwa kala omuntu omunambili ihe omathimbo ngaka okwa kala iikalela, kali ta popi naantu, nuuna a popiwa naye okwa popi nokwa yamukula paufupi, na ishewe ngele okwa pulwa kutya okuna sha shoka tashi mu piyaganeke iha ti sha,” osho Negumbo a hokolola. 

“Mongeleka tse ihatu longo aantu iinima yatya ngaaka ndele tse ohatu ya longo oku galikana ishewe ohatu  ya longo onkalamwenyo ngaashi yili paushili, tse tatu ya longo nkene yena oku kala mekwatathano pokati kawo ongo aashitwa yaKalunga, na haku tala aantu ooyakwawo ongo oodemon,” Negumbo ta ti. 

Okwa ti pethimbo omukiintu ngoka a li oshilyo shegongalo lyawo kena esiku emu uvile tapopi kutya okwa lombwelwa kongeleka yoChrist Embassy kutya oya ti omwana oye oshiluli. Ye okwa dhidhilike owala kutya meme nguka okwa kala ehole omwana, na okwa kala nokumusila oshimpwiyu. 

LEAVE A REPLY

Please enter your comment!
Please enter your name here