Ouseb a joina Mannetti ongo omukwatheli omutiyali oku ilongekidhila uudhano na Congo.

0
233

KuOtniel Hembapu

WINDHOEK – Omudheuli gwospana yoBrave Warriors  Ricardo Mannetti okwa ulike omudhani omukwawo nale  Mohammad ‘Slice’ Ouseb ongo omudheuli omuyakuli omutiyali gwospana yopashigwana yetanga lyokoompadhi.

Euliko lya Ouseb olye mu hanganitha nomudhani omukwawo nale ngoka oye omukwatheli dheuli gwotango gwospana ndjika, Ronnie Kanalelo. Mbaka yatatu kokutya Mannetti, Ouseb naKanalelo oya li iilyo yospana yasimana yoBrave Warriors yomomumvo 1998, ndjoka oyo yotango  ya li yeshi pondola okupita opo yi kadhane muudhano wekopi lyiigwana yAfrica nenge CAF Nations Cup omumvo 1998.

 “Mohammad okwa kala omudhani gwetanga lyokoompadhi ethimbo ele nondi shishi shoka ta vulu okugandja. Oshikwawo omathimbo hamale okwa pewa ombapila nenge onzapo yokudheula okuza kolutu lwo Confederation of African Football (CAF). Mohammad okuna ongushu, ontseyo noshowo ekwatathano lye lyopailonga otali nyanyudha,” osho Mannetti a ulike. 

Okwa ti Ouseb ota ka kala woo noku kwathela medheulo lyospana yopashigwana yetanga lyokoompadhi yaadhani yokohi yomimvo 17 naandjoka yokohi yomimvo omilongo 20.

Mannetti sho a pulwa kutya aadhani yeni mokati kaamboka omilongo 25 ya li ya hogololwa oku kalelapo Namibia puudhano wopetameko oku ilongekidhila uudhano wekopi lyo CAF womumvo 2015, okwa ti aadhani ashike yaali Manfred Starke na Pekka Hamukwaya oyo ya thigwapo itaa ya kadhana na Congo Brazzaville, Olyomakaya ndjika pokapale ka Sam Nujoma moKatutura.

Uudhano uutiyali pokati kiilongo mbika iyali otawu ka dhanenwa koBrazzaville moCongo konima yomasiku omulongo nagane. Aamati mboka yaali itaa ya ka dhana mospana yoBrave Warriors, oya indile ya mangululwe oshoka oye na iinakugwanithwa yoospana dhawo hoka ha ya dhanene noshowo yilwe yopaumwene.

“Aawiliki yopaunongo oshowo aadhani otaya ka soshimpwiyu kutya aakondjithi yetu[Congo] otayi ulukilwa kutya keli megumbo lyaandjawo. Sho osho tandi indilile aayambidhidhi opo ya holoke momiyalu ominene okuulukila aatalelipo kutya yo oye li shili metalelpo kiilongo.Otu shishi kutya okukadhana koCongo Brazzaville itaku kakala okupu, onkene inatu ya etha opo ya thange etanga itaa ya tilithwa nando osha,” Mannetti a tsikileko.

LEAVE A REPLY

Please enter your comment!
Please enter your name here