Uuholume – owo omilema ominene

0
206

KuClemence Tashaya

EENHANA – Olundji ngele otaku popiwa oshinima shuuholume nenge oshinima shaalumentu naakiintu ye na ookuume yopahole yevule gumwe, shoka nakupulakena ha tondokele kusho nenge ha dhiladhila tango ooshoka shetaandelo lyomavu gohoni. 

Ihe ngiika shoka sha simana okutalwa ooshoka kutya uuholume okuhaluka aakiintu nenge okuhaluka aalumentu okwo naku talike kutya ota ku shundula ngoka eli mekwatathano ndyoka. Ishewe onkalo ndjoka otayi uvitha nayi aantu yalwe noonkondo.

Osha fa shi li ngaaka kutya Namibia okuna omwaalu omunene nenge guuka pombanda moshinima shaaholathani taya li oompanda mbali, kokutya mbaka oye na omakwatathano gopaipala naantu ye vule gumwe. Onkalo ndjika oya fa ya eta omukalo gwondjokana yomulumentu gumwe nomukiintu gumwe yi kale ya fa oshinima sha pumba monkalo yesiku kehe, nonando pamambo, oyendji moNamibia oye li moondjokana dholudhi nduka kokutya omulumentu gumwe nomukiintu gumwe.

 “Uumbanda mboka omuntu kehe ena kombinga yomaihumbato moka aahokanathani unene tuu aalumentu yena aakiintu yalwe pondje yoondjokana dhawo oshinima tashi tilitha okushi talela momavu gohoni ngoka geli moshilongo na gamwe gomugo gaana epango nando nando. Nonando oshi li ngaaka osha fa osho omoode nena omuntu oku kala inaa simaneka kuume ke mondjokana, ngaashi sha nyenyetwa komuvalithi poshipangelo Engela, Marian Mogotsi.

Okwa ti oyendji yomaakiintu mboka haya ka thulwa kokanyothi moshipangelo shoka olundji oya mwamwelwa molwashoka ookuume kawo nenge aalumentu yawo oyena aakiintu yalwe ishewe pondje yondjokana nenge pondje yomakwathano ngoka ge li pokati kawo. 

Oya ti aalumentu yawo oya fa yaa he nako nasha naanona mboka ya tegelelwa kaakiintu yawo mboka aasimba.

Mogotsi okuna omaipulo unene tuu molwelondo lyombinzi ndyoka tali monika mokati kaakiintu aasimba mboka haya ka yakulwa moshipangelo shoka. Okwa ti onkalo ndjika oya nika oshiponga unene tuu kaanona mboka inaa ya valwa natango.

Etompelo ndyoka aalumentu taya ipopile nalyo kutya omolwashike mbaka ye na aakiintu ye vule gumwe oondyoka anuwa kutya aAfrica ohaya hokana aakiintu oyendji, onkene yo oya landula mwaambyoka yoohekulu. Ihe efatululo nelongekidho lyondjokana yomulumentu gumwe naakiintu oyendji oshinima sha longelwe nelandulathano ewanawa kootatekulu monakuziwa, moka omulumentu ta hokana aakiintu ye vule gumwe, ihe nguka ota kala ena esimaneko lyawo noshowo ena evuliko lyo kwaa lala lala shaampoka ngashika sha fa osho hashi ningwa ku yamwe yomaalumentu aaNamibia nena.

 “Oondjokana dhaakiintu ye vule gumwe ngaashi dhi shiwike, monakuziwa kadhi ko we. 

Oshoka pethimbo ndika oto adha omulumentu ena omusholondondo omule gwaantu mboka ena ekwatathano nayo lyopaipala,” pahapu dha Meekulu Demetilia Katangolo omukokele gwomimvo 89 gwomomukunda Ongha moshitopolwa Ohangwena.

Okwa ti okwa tondithwa komukalo ngoka aaNamibia taya popi noku luka yakwawo kutya ngoka omuholike kadhona gwaaluhe nenge omuholikemati takalele omanga pethimbo olyo tuu ndyoka mbaka otaya yaka noku ya moluhondelo na yalwe ishewe. Oshinanena ooshoka kutya oohonda ohadhi lombwelwa kutya inadhi piyaganeka mokudhenga ngaashi oongodhi pethimbo lyontumba, muutile ngiika kutya pamwe omulumentu ngoka nenge omukiintu ota ka adhika eli nomunandjokana gwe gwopambelewa.

 “Okulengalenga pondje huka okwa fa kwa indjipala nenge kwa vuka, na inaku talika ko we ongo etompelo okuhulithapo tu tye ondjokana, oshoka okwa itaalwa kutya kehe gumwe okwa fa osho ta ningi,” osho a ulike.

Omuntu oto kumwa ngele oshigwana osha kanitha eiyuvo lyohenda noshowo lyohole okuholathana unene tuu ohole yopokati komukiintu nomulumentu. Onkene onkalo ndjika yokulya oompanda mbali oyo yimwe yomiiyeti yomadhipagathano pokati kaamboka yeli mekwatathano lyohole, molwa efupa nenge ngele ina pa holoka edhipago otapa holoka omahepekathano gomomagumbo.

Oshina okukonekwa kutya aanona momagumbo ngoka gena onkalo yaa li nawa nayo otaya koneke omaihumbato gaakuluntu, nomonakuyiwa otashi vulika yo ya ka landule moshinkoti osho tuu shoka.

 “Otandi dhiladhila kutya otwa pumbwa okusimaneka aaholike yetu noshowo ondjokana nenge ekwatathano lyohole moka tulimo noku li nyanyukilwa. Ina shi pumbiwa okukodhililathana onga aapolisi yohole yetu ihe shoka shasimana osho oku kala tuna eipangelomwene nevuliko,’ osho omwiilongi gwomumvo omutiyali montseyo yoompango, George Gawaseb moUnivesiti ya Namibia a ti.

Okwa ti muuyuni omuna aantu ya itaala na ohaya nyanyukilwa nokuhokwa aaholike yawo mondjokana yomukiintu gumwe nomulumentu gumwe, na itaya uvuko kutya omolwashike shika shi li oshidhigu kaanandjokana yomoNamibia.

Okwa ti ondjokana yomulumentu gumwe nomukiintu gumwe kashishi oshinima oshidhigu. Eshongo ndyoka lilipo oondyoka ashike kutya omadhiladhilo nonkalo yaanandjokana otayi vulikithwa ngiini opo mbaka ya kale taya ende mondjila ndjoka no kwaa puguma muyo sigo ehulilo. “Otatu vulu okutameka oku itula momuholike gumwe nena, shoka twa pumbwa osho okutameka okushininga nena, oshoka shika kashishi oshidhigu nando,” Taimi Nghipopi ta indile.

LEAVE A REPLY

Please enter your comment!
Please enter your name here