WHERE OTHERS WAVERED – Iihokolola kOmpangu yopaigwana moHague

0
210

Verwoerd okwa li e na uumbanda kutya okukala po kwandje moshilongo otashi vulika ku ka ete omakuyunguto naashika otashi ka nwetha mo etokolo lyOmpangu Yuuyuni.

Ye okwa li ta kambadhala ngaashika ta vulu opo etokolo ndyoka tali ningwa kOmpangu ndjoka li kale lya gama kombinga yepangelo lye lyokakombo noludhi.

 Pethimbo lyahugunina lyiihokolola kombinga yaSouth West Africa  okabinete kepangelo lyaSouth Africa oka li ka longo neitulemo mokulandula einyengo kehe netokolo kehe tali ningwa mOhofa ndjoka.

 Pethimbo lyiihokolola opwa li puna okukala aapanguli yeli 15 mwa kwatelwa Omupanguliperesidende.

 Ethiopia na Liberia mboka oyo ya eta iihokolola mbyoka komeho gOmpangu oya li ya pitikwa okuhogolola omupanguli gumwe na South Africa ngoka oye a li ta tamanekwa okwa li a uthwa a hogolole omupanguli gumwe. Aapanguli ayehe kumwe oya li ye na oku kala 17. 

Aapanguli omugoyi yomwaambaka otwa li tu shishi kutya oya gama kombinga yetu. 

Omupya omunene oongoka kutya gumwe gwaambaka, Omupanguli Baddawi gwaEgipiti okwa mana oondjenda dhe mo 1965, omupanguli gwokoPeru okwa li ta ehama, omanga Sir Zafrulla Khan gwokoPakistan okwi ikuthamo moshipotha shika, oshoka Ethiopia na Liberia oya li ye mu hogolola, nonando ina ka kuutumba miihokolola mbika. 

Khan okwa li wo kuume ka South Africa. Etokolo lyOmpangu sho lya ningwa aapanguli yaheyali oya gandja etokolo lya gama ku Ethiopia na Liberia, kutya mbaka oyena uuthemba wopaveta  noshowo onkwa okupangula South Africa omolwa okuyonagula kwe oshinakugwanithwa shoka a pewa okulongekidha South West Africa opo iithikamene nokumanguluka. 

Aapanguli yaheyali oya gandja etokolo lya kondjitha eindilo lya Liberia na Ethiopia onkene etokolo lyompangu olya li lya haka nenge aatokoli oya li yethike pamwe.

 Okuza mpoka Omupanguli peresidende oye ali e na okugandja ewi lyetokolo molwaashoka omatokolo ngoka ga gandjwa oga li ganingwa kaapanguli yethike pamwe momwaalu. 

Omupanguliperesidende okwa li Percy Spencer gokoAustralia  ye okwa li wo kuume kaSouth Africa. Onkene Ohofa ina yi gandja etokolo lyasha, ihe oya  lundulula ndyoka ya li ya ningi omumvo 1962. 

Okwaa gandja etokolo kwOmpangu Yuuyuni okwa li kwa pangulwa nayi kaakuuyuni, omanga Verwoerd nepangelo lye oyali ye wete Ompangu ya gandja etokolo.

Osha li tashi halutha kutya Ompangu yopaigwana oya nyengwa okugandja etokolo konima yoku kuutumba omimvo hamano tayi pulakene iihokolola mbika. 

Kakele kaashoka ohofa ndjika oya li ya lundulula etokolo lyawo lyomumvo 1962 lya tile yo oyi na uuthemba okupulakena iihokolola kombinga yaSouth West Africa. 

Ohofa oya gandja etokolo lyawo kutya oonaku indila opo South Africa a hokololithwe noku pangulwe molwashoka itaa landula omautho gomaandata  kayena oku zimininwa eindilo lyawo oshoka yo kayena uuthemba wopaveta okushininga noshikwawo yo kayena wo onkwa nuuwanawa  waakalimo yomoshilongo shoka. 

Omolwashika Omupanguliperesidende okwa tokola kutya eindilo lyaEthiopia na Liberia ota li tindwa kohofa.

Konima yetokolo ndyoka SWAPO okwa gandja elaka momushangwa omule okuza koDar es Salaam ngoka gwa ka hula noku tseyithila Verwoerd nuuyuni auhe kutya aantu yaSouth West Africa oya tokola oku tameka iita yoku kondjela emanguluko. Momushangwa, Verwoerd okwa lombwelwa kutya ina nyanyukilwa etokolo lyuukatalume lyOhofa yOpaigwana oshoka aantu yaSouth West Africa opamwe naamboka yomoSouth Africa oya tokola oku kondjela emanguluko, oku ponokela epangelo lyuumbudhi. 

Onkene kapena we shimwe tashiya yi moshipala oku uka komeho na yo itaya ka shuna we monima. 

Omushangwa ogwa ti etokolo lyompangu ndyoka olya eta ehanagulo lya Verwoerd popepi, oshikwawo etokolo ndyoka nali dhimbithe aantu yoshilongo shika kutya Iigwana Hangano otayi  vulu ku talikako ongo omuhupithi gwetu.

Otwa tumine ondelekelama ku amushangandjayi gOAU twe mu indile opo a katuke onkatu oku tukwathela pamukalo kehe opo tse tu vule okutidhamo South Africa noku mangulula oshilongo shika koonkondo. 

Ondelekelama onkwawo otwe yi tumine kuamushangandjayi gwIigwana Hangano, U Thant  moka twe mu tseyithile kutya molwashoka Ohofa yuuyuni oyetu ekelehi nokutu thiga pomutenya netokolo lyayo tse otatu ka kutha oondjembo oku kondjela uuthemba wetu woku ithikamena ngaashi sha uthwa momakankameno gIigwana Hangano.

Onda li nda mono ompito okupopitha omahangano mo Engelanda ngoka ga li gi ilongekidha okutu kwatha, naashika onde shi ningi nonyati, nonando kuume ketu ngoka a li a longekidha oshiithanene shika, okwa li a ti inandi igidha unene. 

Ihe ngame onda popi nokutya tse otatu ka kutha omatati okudhenga oombulu osigo oshilongo sha manguluka kashina nee mbudhi kutya South Africa okuna oonkondo dhi thike peni.

Esiku ndyoka ondjato yandje yomishangwa oya yakwa mondunda yandje kondaadhi yedhina Lombard ndjoka ya li tayi iningi ya fa omuyambidhidhi gwo PAC. 

Elalakano lya South Africa olya li oku tala kutya otatu katuka onkatu yini konima yetokolo lyOmpangu yOpaigwana.

Pethimbo ndyoka iihokolola tayi ningwa moHague aakwiita yotango yoPLAN oya li nale meni lyoshilongo ya homata oondjembo ndhoka ngame nda zile nadho ko Algeria.

Manga Verwoerd a li tadhiladhila kutya etokolo, lyompangu oku ekelahi eindilo lya Ethiopia na Liberia olyo oshipatululo oku kuthako South West Africa noku mu ninga oshitopolwa oshititano sha South Africa, etameko lyiita yemanguluko olya hulithapo edhiladhilo ndyoka lya Verwoerd nooyakwawo.

LEAVE A REPLY

Please enter your comment!
Please enter your name here