Ongulohi yuudhano wobokisa tawu nyanyudha mOmuthiya!

0
320

Komutoolinkundana

OMUTHIYA – Oya li ongulohi itaayi ka dhimbiwa kwaayehe mboka ya li ya ka tala uudhano wobokisa wa ningililwe pOmuthiya ongulohi yOlyomakaya gapiti.

Aantu oya ende okuza koVenduka, Oshomeya, Oshakati, Ongwediva, Ohangwena, kokutya aantu oya mbombolokele pehalandjandja komeho goombelewa oonene dhelelo lyoshitopolwa Oshikoto mOmuthiya okutala nkene aamati aaNamibia taya umbu oongonyo nokudhengamo aakondjithi yawo.

Aadhengingonyo paithano nayo oya longo ngaashi sha li sha tegelelwa mokudhengamo aakondjithi yawo ayehe kehe gumwe ngaashi a li a longekidhwa eshi ninge.Uudhano mbuka wobokisa owa dhanwa kohi yoshipalanyolo ‘Egaluko lya Paulus the Rock Ambunda’ no wa ulike kutya aaNamibia ohaya dhenge aantu pwaana omalimbililo.

Uutalala mboka wali wa holoka modoolopa ndjika nawo inawu lumata mboka yi ile ya tale nkene dhakahandja tadhi umbwa. 

Omalusheno ngoka ga kala nokudhima omalupita nago inaga shololitha aaholi yobokisa andola yashune komagumbo omanga uudhano inaawu halakana.

Ngaashi kwa li sha tegelelwa , Paulus ‘The Rock’ Ambunda okwa dhengemo omukondjithi gwe omuChile  ,Christian Palma niitsa pwaana oompata, nokwa ningi oye mwene gwepaya lyahanganithwa  lyali lyaana mwene lyomalutu guudhengingonyo lyoSuper Bantamweight lyo International Boxing Federation (IBF)/World Boxing Association (WBA).

 Ambunda okwa yi moringa a tokola sho a tameke oye ta ti pii molugodhi ndoka  no inaapa omukondjithi gwe oluthuwo sho a kala te mu dhenge tadhi kwata molutu komutse naapehe mpoka a mono ompito yokudhenga omuniita naye moringa.

Palma molugodhi nduka lwa li itaalu nuwa meya okwe shi pondola ashike oku monamo iitsa pombanda ya Ambunda momadhingoloko gaali gomomadhingoloko omulongo nagaali. Aagandji yiitsa ayehe yatatu oya gandja olugodhi nduka ku Ambunda metokolo lyomukogumwe pehulilo lyuudhano wawo.

Momaudhano galwe ngoka gatetekele uudhano uunene wokongulohi,omubokisi gwa Namibia mondjundo yoWelterweight yolutu lwoongonyo lwoWorld Boxing Organization (WBO), Betuel Tyson Ushona okwa gamene epaya lye sho a dhenge omukondjithi gwe yimwe nopevi medhingoloko etimulongo lyomomadhingoloko omulongo nagaali.

Omukondjithi gwe omuGhana Ebenhaezer Lamptey ina pitikwa we a tsikile nuudhano medhingoloko eti 11 sho uudhano wa mwenekwa konima ashike yomunute gumwe noosekonde 40 okuza petameko lyedhingoloko etimulongo. 

Uudhano mbuka owa li owo uuwanawa kaakunawe ongulohi ndjoka.

Vikapta “Beastmaster” Meroro naye okwa longo ngaashi omumati omukwawo Ushona ,mokudhengamo omukondjithi gwe omuTanzania ngoka a fa a li iniilongekidha nawa medhingoloko eti 11 nongeyi okwa popile oshishani she sho WBO Cruiserweight shaa yugwe ko ku Alphonce Mchumistumbo.

Onesmus Nekundi okwa dhengemo Daniel Ausiku niitsa pwaana oompata molugodhi lwondjundo  Super Bantamweight momadhingoloko gane. 

Sakaria Lukas, aka Desert Storm okwa kutha ashike omunute gumwe noosekonde 37 okukotheka  Immanuel Andreki sho e mu dhenge nongonyo yokolulyo  ye nokutilahi iitetene molugodhi lwawo mondjundo yo Featherweight nangeyi okwa dhenge yimwe nopevi oshikando oshitihetatu momalugodhi ngoka a sindana geli 13.

Andreki okwi ihata pothaila moringa no ina vula okuthikamapo mbala omanga omuhikihiya Rick Tshabalala inaa mana okuyalula sigo okomulongo.

Molugodhi olukwawo moka mwa kondjwa kenyakwa lina ombandi yoshingoli yoCommonwealth,Japhet Utoni okwa etele  Amagola Neaman omilema medhingoloko etitatu lyuudhano woongonga hamano, mondjundo yo  Flyweight. 

Nonando Abner Mwafangeyo a kondjo neitulemo molugodhi lwawo na Johannes Baluka Simon, ina vula oku sindana oshoka omukondjithi gwe okwa li e na ontseyo oyindji yi vule ye.Nguka okwa sindana wo niitsa pwaana omalimbililo gasha.

 Jeremiah Nakathila okwa dhengemo David Egumbo niitsa wo ya gandjwa nomukogumwe kaagandji yiitsa ayehe yatatu.

Ye Kapena Naidjala ta sindana molugodhi na  Imms Mungandjela metokolo moka aagandji yiitsa inaa ya tsa kumwe oshoka olugodhi nduka aabokisi konyala oya li yethike pamwe mokuumba oongonyo.

LEAVE A REPLY

Please enter your comment!
Please enter your name here