Kundana opo ta kala

0
199

Shika oshikando oshitiyali sho ehangano lya New Era Publication Corporation tali nyanyangidha okomenda ishewe mokuyamukula shoka sha nyanyangidhwa kiifokundaneki yilwe unene tuu oThe Namibian kombinga ya NEPC. Tse otatu endulula oshinyolwa shika omolwuuwana waaleshi yetu ya Kundana oshoka mokwaa ukilila, Kundana naye okwa kwatelwamo moshiponokela shopamushangwa shika.

Petameko otatu kwashilipaleke kutya osha kala aluhe eitaalo lyetu ngaashi ashike twe shi ulika poompito odhindji kutya, iikundaneki yopaumwene naambyoka yopashigwana nenge mbyoka ya lukwa yepangelo otayi vulu okukala tayi longo nokukundaneka moshilongo shika pwaana othina. Omahala mpoka mbika tayi landwa oga gwana no ina ga pwapo natango, mokuthigathanapo methigathano lili nawa, nopwaana ompumbwe yokupopilathanamo nokushundulathana.

Ndele nani ngele itatu yamukula komaponokelo gopahapu okuza koThe Namibian, ngaashi ngoka go ngashingeyi ga shangwa mokakololo kedhina “Off Tangent’ osho okuiiyethela, opo aantu yopondje ya uthe uukwatya wetu noshowo iinakugwanithwa yetu, tse ehangano lyo New Era Publication Corporation (NEPC). Iinakugwanithwa netumo lya NEPC olya ndjandjukununwamo nawa moveta ndjok a ya totapo oNEPC, ngaashi ya kolekwa ko Parliamende.

Omasiku nenge ethimbo ndyoka uukwatya wetu wa kala nokudhipagwa pashiyakela noshowo tawu dhengwa , yo oonaku tu dhipaga pashiyakela noshowo okutudhenga oya tegelela tu kale twa mwena, ashike ngaka nenge ndika olya hulapo sigo aluhe.

Ooyene yoThe Namibian, kashina mbudhi kutya oyo oolye otaya kambadhala ngaashi taya vulu paankondo dhawo. Taya longo ngaaka taya longitha ompito kehe , naashoka sha talika ehala lyopashigwana , noshowo ewi,ngaashi oshifo shika sha kala shi shiwike oku landula ewi lyooyene yasho. Sho shika osha hogolola okuponokela mboka sha hogolola , okuponokela ‘omuhogololwa” okulonga iilonga yaluudha, okuyi longa omolwa ooyene yawo.Elalakano lya holekwa miiponokela mbika olyo oku halela ando opo ehangano lya NEPC, Namibia Press Agency noshowo Namibian Broadcasting Corporation dhi hulepo opo andola sho shi tsikile nomushangelo gwasho gwatsondumbo newiliko ndyoka tali wilike oshilongo, okupandika kooyene yasho.

Mokuadha elalakano ndika shika otashi nuka okuza mokakololo kamwe koshifo shoka nokundjakela mokakwawo . Tango osha tamekele noshishangwa oshiyihu mokakololo kokomenda yomudhindinkundana nena osha lundulukile mokakololo haka ithanwa“Off Tangent” ta shi ponokele “omuhogololwa” omudhengwa nomuthangwa gwasho. Na inashi hogolola ashike okakololo keli mondjila okuponokela nokuzigopaleka, okupandika kooyene yasho,ndele momupyofano otashi iyulike omunwe shoshene. Na ishewe tashi ningi sha fa osho shi li dhingi. Mokakololo haka ”Off Tangent’ oshoshili kutya ooyene yasho noshowo aalongeli yawo oya zamo mondjila. ”Off Tangent” ota ndjandjukununwa ongo okulandula oshinima shaana shilonga omanga to etha okulonga nokwa itulamo koshilonga shoka shasimana.’

Endhindhiliko lyokwaali mondjila nenge “off tangent” koThe Namibian nooyene yasho lyongashingeyi  omushango gwaana omwiityo nogwanika uuyanankwengu moka taya ti anuwa oya ponokelwa ku NEPC.

Meyamukulo lyetu kamwa li sha shoka tashi ulike kutya New Era okwa li a kambadhala okuponokela nenge okushundula omutalelo gwo The Namibian nando nando. NEPC okwa li ashike a yamukula  kwaashoka a li a tala kutya oshiponokela sha fa shomuntu ha nyanyukwa mokuumba ondjembo keena eipulileko kutya ooholo dhe otadhi kwata lye. Otwa li ishewe twa yamukula komaponekelo gopamushangwa ngoka inaaga kankamekelwa kuumbangi nando owasha.Na tse otatu thikama nokudhama mwaashoka twa hokolola nokunyola.

Ngaashi, ashike palwe moshigwana shaNamibia  paumwene nenge pashigwana, NEPC ita fadhukapo oshinakugwanithwa she shokukalelapo shoka a popi nenge a nyola. Kokutya tse otuna oshinakugwanithwa itashi ti kutya natu kale twa mwena ngele otwa ponokelwa tu wete lela kutya ndika eponokelo lyaana omutse nondungu lya kankamekelwa kiifundja ya fa oshili. NEPC ita mwenene omaponokelo ngoka itaaga vulu oku uviwako go oga puka.

NEPC ota tsikile okulonga oshinakugwanithwa she okutseyithila nokupa oshigwana oonkundana nomauyelele gapumbiwa nogena omwago nuumbangi wa gwanapo. Shika ota tsikile okushininga ngaashi ehi uthilwa koveta yoshilongo na ote shiningi pwaana nenge pena ezimino lyoThe Namibian. Ye ishewe ota tsikile iilonga ye mombepo ye yigidho lyomoVenduka ndyoka lya utha pukale omaludhi gayooloka giikundaneki  kehe moshilongo.

Tse otatu zimine kutya oThe Namibian oyina uuthemba okukala nomaiyuvo gawo ngaashi ye ga shanga. New Era na Kundana oyi itulamo mokuhokolola nokutopola oshili molwuushili wawo.

LEAVE A REPLY

Please enter your comment!
Please enter your name here