Olweendo lwookilo 700 okuuvithako oshigwana kombinga yoHIV/AIDS

1
404

 

KuAlvine Kapitako 

WINDHOEK – Imms (Immanuel) Kotokeni Sheefeni- omulumentu ngoka a ende okuza kOngwediva sigo okoWindhoek nelalakano okuuvithako oshigwana kombinga yo HIV/AIDS okwa thikile moshilandopangelo oshiwike shika.

Sheefeni ngoka a katuka okuza koshitopolwa shaShana sigo ooshoka sha Khomas oshinano shookilometa 700 okwa tsakanekelwe kookuume nokofamIlia ye pobloka yopolisi mondjila pokati kOkahandja –Windhoek oshiwike shika mOsoondaha.

Nando oonaku mu tsakaneka kayali oyendji momwaalu mbaka oya li ya nyanyukwa no ye mu papatele nokumupandula sho a manitha oshilalakanenwa she shoka.

Kuume ka Sheefeni okuza kuunona, Paavo Shapata sho a pulwa a tye sha koshilongadhalwa shakuume ke okwa ti ‘ye okwa longo shoka twa tala  itaa shi vulika nokushininga tashi vulika, shoka a longo haantu oyendji taye shi vulu. Ye omulumentu ena omukumo ngaashi ndimu shi,”.

Aayambidhidhi ye oya ende pamwe naye oshinano shookilometa 20 okuya moWindhoek.

Oye ya tango okupita poshipangelo sha Katutura  mpoka a talwa manga komundohotola.Ongundu ndjoka ya ende tayi nenepala sho olweendo luuka kethikilo oya thiki ponaasalesa ya Katutura potundi 13h45.

Mpaka okwa tsakanekwa kaayambidhidhi noshowo kaapangi mboka ye mu taamba nokumupapatela nokumupopitha niitya yetsomukumo noye mu tanga omolwa oshilonga shuupenda shoka a longo.

“Onda thika mpaka. Onda hala okupandula Kalunga nakehe gumwe ayambidhidha ndje. Onduuvite nawa, oshoka oshilalakanenwa shandje onde shi adha,” osho Sheefeni a ti ye ta kengeleke.

Okwa ti olweendo nduka iteke lu dhimbwa nenge elu pingakanithe nashilwe. “Onda li nda hokwa oshitopolwa kehe shalwo,”osho  Sheefeni a lombwele aatoolinkundana pobloka yopolisi Osoondaha.

Olweendo inalu mu etela uuwehame washa nenge lu gume uukolele we, kakele komapuya nomvulwe, oshoka kehe moshilando a piti okwa piti pomundohotola opo a talwe kombinga yuukolele we.

“Sigo oompaka ngame ondi li nawa. Olutu olwa vulwa, ndele enyanyu molwashoka ondeshipondola olya pitilile nokudhimbitha ndje uuwehame.Olundji molweendo lwandje sho inaandi mona okapeleki mooha dhondjila taka popi oshinano mpoka shithike, onda li ndi uvite ngiika itandi ka thika, ihe etompelo kutya omolwashike nda tameke olweendo ndoka olyo lya kumike ndje ndi tsikile okuya komeho,” osho Sheefeni ngoka a monikile oHIV mu Juli gwaziko a ti.

Sheefeni okwa gwedhako: “Onda soshimpwiyu kutya itandi ende oshinano shi vule ookilometa 120 mesiku. Ookilometa oofupi ndhoka nda ende odho 80 nongele odhindji odho 120 esiku kehe.,”Pahapu dhe iiningwanima yopambelewa kombinga yoHIV/AIDS kayina omwago mokuguma nokuuvithako oshigwana opo ando shikale nokupopya kombinga yetumwalaka ndyoka.

Pethimbo lyuusiku okwa ende naanambelewa yoNamibian Police Force miilando moka a piti, osho a ti . Ethimbo ashike limwe a li e na okulondekwa mohauto sho a puka ondjila ye moTsumeb na okwa li e na okushunwa koshilando osho omunawino miikwakompiuta a ti.

“Etompelo lyandje okweenda ookilo ndhika osho okukumika aantu opo ya popye kombinga yoAIDS. Aantu ohaya popi kombinga yaashika omalupita onkene onda mono kutya ondunge ombwaanawa oku inyengitha aagundjuka opo ya popye kombinga yaashika,’ omunamimvo 30 ngoka a monikilwe oHIV omumvogu a ti, a fatulula kutya oshike she mu thiminike okukutha olweendo nduka.

Okwa ti okwa li a hala okugandja etumwalaka kaagandji yiilonga unene tuu  Namibian Defence Force no Namibian police kutya aantu mboka taya lumbu nombuto yoHIV oyena uukolele na otaya vulu okulonga iilonga yawo nawa shampa ashike mbaka yena uundjolowele wawo wuli nawa.

“Ngame ondina etegameno nondishishi kutya etumwalaka ndika olya thika. Ondishishi kutya oshilalakanenwa shandje oshasindana. Oshikwawo oshigwana osha gandja eyamukulo lili nawa.Mondjila aantu oyendji oya thikamene ndje taya pula ndje kutya otandi ningi shike ngame no nde ya fatululile. Yamwe oya pendje iikulya omeya nosho tuu ihe omupya oongoka kutya inandi vula okukutha oshindji oshoka kandali te vulu okuhumbata ashihe,” osho a ti.

Moshilando kehe a ende okwa uvitha elaka kombinga yomukithi gwoHIV/AIDS ndele egandjo lye lyuuyelele itashi ti kalya li lyaana  okutalwa nayi kuyamwe yomoshigwana.Unene uuna a popi aantu oya kala yena uumbanda okupopya iitya yimwe nenge okupula omapulo geli mondjila,” osho a ti.

Oshinakugwanithwa she shalandulako osho okutalelapo omanongelo miitopolwa ya yooloka yoshilongo moka taka popya kombinga yoHIV/AIDS.”Kapena oshindji shoka ndahala okumona shaashi okutala kutya ombuto ndjika oya zamo muka moNamibia,onda hala noku halelela yi hulile mungame,” osho a ti nomaiuvo.

Okwa ti  “Epangelo otali longo oshindji ihe ngame otandi dhiladhila kutya lyo itali vulu we okupitilila mpoka. Otse, onga aantu oohandimwe mboka tuna okutsikila nolugodhi nduka okuya nalwo komeho mokukeelela eindjipalo lyoHIV/AIDS.

1 COMMENT

LEAVE A REPLY

Please enter your comment!
Please enter your name here