Omugameni gwomaliko a pula ofuto yoonzinzi 15 sho efano lye lya tulwa koFacebook

0
299

Komutoolinkundana

WINDHOEK – Okutula ethano lyomuntu koFacebook pwaana epitikilo lye otashi ku tula muupyakadhi. Naashika osha ningilwa omulumentu gumwe moSwaziland sho a li a tula ethano lyomuniilonga omukwawo omanga nguka a li a fa ta kotha miilonga yuusekuliti. Omugameni, General Dlamini, okwa tseya kombinga yethano lye koFacebook konima yomasiku sho aantu ya tameke okukomenda kulyo.

Dlamini okwa yi kopolisi,nokoHofa yOpombanda ya Swaziland noshowo ndjoka yuuthike pamwe ta kongo opo a futilwe noshowo opo ngoka a tula ethano lye ko Internet  pwaana epitikilo lye a geelwe.

Omunamimvo 42 Dlamini okwa li a geya noonkondo kombinga yethano lye oshoka ndika olya thanekwa tali ulike kutya okwa li a fa  ta kotha na okwa pula a futwe oongombe 15 kunaku mu tula koFacebook, pahokololo lyoshifonkundana The Times of Swaziland.

Dlamini ngoka a kundana kombinga yefano lye konima yomasiku gane, okwa ka nyenyeta oshinima shika kumenegela gwe. Okwa ti muNovomba 2013 okwa li miilonga ye mpoka a kotha popepi nehala lyokulangela.”Onda ka mona kutya okwa thaneke ndje omanga nda thethelekapo nokwa tula ethano ndyoka kofacebook ta popi ndje nomusheko.Onda kundana oshinima shoka esiku lya landula. Shika onde shi uvu konima yokupopiwa nangame ku Bonisile Malindzisa na Make Mavuso mboka ya hokololele ndje kutya ethano lyandje olya tulwa kofacebook,” Dlamini a ti.

Okwa ti omipopyo ndhoka dha popiwa kaantu kombinga ye  odhe mu shongo opo a tokole a lopote oshinima shika kewiliko lyiilonga yawo. Ewiliko lye olye mu lombwele kutya na tale kutya ota ningi ngiini noshinima  shoka. Okwa tokola okushi lopota kopolisi. Opolisi oye ya okukonakona shika mehangano lyawo, lyo ewiliko ndika olya pe Dlamini omayele naangoka emu tula kofacebook opo mbaka ya paathane ombili, naashika oshaningwa.

Ihe pethimbo lyoshigongi shoka, Dlamini okwa pula a futwe oongombe 15 okuza komuntu ngoka a tula ethano lye kofacebook. “Ndele nee omuhona gwawo okwe mu indile opo a pule ashike oongombe ntano.Oshigongi sho sha tsikile  oonkundathana eindilo lye olya yi sigo opo ngombe yimwe ndjoka na ku mu thaneka a zimine kutya ota futu.Euvathano ndika olya li lyopashilumentu Dlamini a ti.

Okwa ti poonkundathana okwa li a pulwa opo kaahokolole sha keuvathano lina sha noongombe.

“Oya lombwele ndje kutya ngele shika onde shi hokolola  otashi ka nayipika ashihe. Onda zimine osheetwapo shika. Okwa shangwa kutya otwa dhiminathanapo.

Omulumentu ngoka okwa ndopa okufuta ongombe ya Dlamini mu February nuumvo ye nguka okwa shuna koHofa yopombanda ya Swaziland ta indile opo a futwe ongombe ye. Ohofa ndjika oye mu tumine kwaandjoka yuuthike pamwe mpoka ya etwa ishewe pamwe moonkundathana dhedhiminathanepo nomuniilonga omukwawo.

Dlamini otaku tiwa oya uvathana nokudhiminathanapo nomuniilonga omukwawo nongashingeyi ina pula we a futwe sha kutya nee ando ongombe ndjoka a li ta pula lwahugunina.

LEAVE A REPLY

Please enter your comment!
Please enter your name here