WHERE OTHERS WAVERED – Ongundu yotango yomahomato

0
399

Ongundu yotango yaakwiita yekondjelomanguluko oya li yalukwa “G1’ ndjika okwa li ashike ya homatekwa oondjembo dhomashina mbali dholudhi lwo PPSH oshowo oombistoli mbali dhotholoto yo TT. Oondjembo ndhika onde dhi pelwe kepangelo lyAlgeria mo 1963 oshowo oombele mbali dhuukongo. Ongundu ndjika oya li mewiliko lya John Otto Nankudhu[Koshiuanda] ngoka oye ali ocommanda yookomando yondjika oya li ya thikama maakwiita mbaka, Simeon Linekela Shixungileni[Kambo] omupevi komanda, Patrick Israel Iyambo[Lungada] undaadhi naamushanga, Messah Victory Namuandi[Shiuajanga] omukuluntu gwoondaadhi, James Hamukuaja Angula[Shoonjeka] na Nelson Kavela[Sadrag].

Me 4 Maalitsa 1965 G1 oya tameke olweendo lwawo okushuna koSouth West Africa ongo aakwiita, ya ende pamwe noohailwa Tobias Hainjeko na Peter Nanyemba [ ngoka pethimbo ndyoka ali omukalelipo gwoSWAPO moTanzania]. Okuza mokamba yomadheulilo moKongwa mbaka oya ende ookilometa 1000 okuya koMbeya shoka shi li koongamba dha Tanzania na Zambia, naampaka oya holeke nawa oondjembo dhawo.

Okuza moMbeya oohailwa Nankudhu na Hainjeko oya tsikile ondjila oyo ayeke, ya taaguluka oongamba nokuya oshinano shookilometa 30 moZambia, komukunda gwa Nakonde. Moka oya ningi ekwatathano nomusamane Shikombe oshilyo shongundu yoUNIP ngoka a li wo Omupevi Minista Gwiikwapondje, ye nguka okwa li eshaathane nayo pethimbo mbaka ya pitile moshilongo shoka omanga ya li mondjila okuza ko South West Africa yuuka muundjendi ko Tanzania. Shikombe okwe ya taamba nawa nokonima okwe ya enditha opamwe noondjembo dhawo okuza koNankonde okuya koLusaka konyala ookilometa 1100 na okwe ya kwatha ishewe okuya enditha okuza moLusaka sigo okoongamba dha Zambia na South West Africa moshitopolwa shaCaprivi.

Pethimbo ndyoka ongundu ya G1 oya ende okuza koMbeya sigo okoLusaka sigo okoongamba dha Zambia na South West Africa. Poongamba aakwiita mbaka oya pewa oondjembo dhawo ooPPSH mbali noshowo oombistoli mbali dho TT koohailwa Nanyemba na Hainyeko, mboka ya thigala mo Zambia.

Konima yoku pewa oondjembo dhawo oya ende okuya koSesheke natango tuu moZambia, na oya taagulukile moSouth West Africa, pompito ya nika oshiponga okuya moKatima Mulilo kuuzilolela woshitopolwa sha Caprivi. Oya shuna ishewe moZambia opo ya vule okutaaguluka omulonga gwa Cuando okuya moAngola nongeyi oya yi moshitopolwa shaaMbukushu moSouth West Africa. Oya yi kegumbo lyoshilyo shimwe shoSWAPO shoka, sheya taamba nawa. Esiku lya landula nguka okwa kutha yamwe yomaakwiita mbaka noku ya fala komissioni yaKatolika po Andara mpoka ya landa oombasikela ndatu.

Omanga ongundu ndjika ya G1 ya li moshitopolwa shaaMbukush oya topoka moongundu mbali ooshona.

Ongundu yoondaadhi oya li ya thikama mu Messag Victory Shiuajanga, Patrick Iyambo[Lungada]na Nelson Kavela Sadrag mbaka oya ende nokutaaguluka omulonga gwa Kavango nokuya moKavango yuuka muuninginino okuya ko Rundu nokweenda yuuka uumbangalantu ninginino oku ya kOwambo.

Mowambo oya yi yuuka kegumbo lyahailwa Eliaser Tuhadeleni [Kaxumba ka Ndola] mEndola  mUukwanjama, moka omo yali yena okutsakanena. Mondjila okuya kaandja Kaxumba oya li ya holeka oondjembo dhawo mookofa ndhoka ya li ya londeka koombasikela.Esiku lya landula ongundu ontiyali okuza koMbukushu oya landulako. Ndjika oya li ashike ya homata oombistoli, na oya li yeende koompadhi. Omolwashika olweendo lwawo olwa kutha ethimbo lyiiwike ine omanga inaa ya thika paandja hailwa Eliaser Tuhadeleni Kaxumba, mpoka yaadha aakwiita ooyakwawo ye ya tegelela. Oya kundathana nawa naKaxumba, ngoka woo a tesyithile  aawiliki yalwe yoSWAPO ngaashi Herman Toivo ya Toivo, Josef Matheus[Jo’Burg] Erastus Mbumba, Lot Homateni, Lamek Iithete nooyakwawo oyendji kombinga yekalepo lyaakwiita yokakulumbwati moshilongo. Ayehe mbaka oya li ye ya okupopitha aakwiita mbaka mwakwatelwa hailwa Ben Amadhila okuza kOmbaye.

Konima yokutsakanena naawiliki yoSWAPO ongundu ndjika oya topoka ishewe moongundu mbali opo ya ka longe iilonga yokuhwahwameka kopapolitika.Patrick Iyambo na Simeon Shixungileni oya tumwa ya ka longele kOkalongo pamwe na hailwa Lot Homateni, omanga Nelson Kavela okwa ka longa na hailwa Jonas Nashivela pOnakaolo momudhingoloko gwOngenga. Messag Victory Namuandi[Shiuajanga] okwa ka longa na Naftali Iyambo Lungada[ ngoka inaa pamba Patrick Iyambo Lungada] mbaka oya longele pUukwalumbe moshitopolwa shAngandjela.

Konima James Hamukuaja okwa ka joina Festus Heita pOmundudu, omanga John Nankudhu okwa kala pamwe    na Eliaser Tuhadeleni pEndola ongo omugandji gwomalombwelo gwongundu ndjoka omanga hailwa Kaxumba okwa li omuhwahwameki gwopapolitika.

Mu January 1966 hailwa Nankudhu okwa ithana oshigongi shokundaadha pOtamanzi mOngandjera pamwe na hailwa Simeon Shixungileni, Victory Namuandi, Patrick Iyambo, Nelson Kavela na James Hamukuaja oku ya tseyithila kutya shoka sha landulako osho okudheulila aagundjuka uukwiita wekondjelomanguluko yomomikunda. Mu Maalitsa 1966 aalumentu mbaka oya dhike okamba yawo yokudheula aakwiita, hayi ithanwa Ondaadhi, pOtamanzi. Mokati kaantu mboka ya dheulilwa tango mpoka omwali  ,Immanuel Shifidi, Festus Heita, Johannes Musheko, Paulus Shikolalye, Simeon Namuganga, Henok Jacob Malila, Festus Nanjolo, Kornelius Shelungu, Thomas Shoome na Festus Muaala.

Ontanda ndjika oya ka tembudhwapo pehala mpoka oshoka opwa monika omainyengo gaatondi, naandjika oya falwa kombinga yokUuvudhiya pokati kUukwambi nOngandjera mpoka ya lukwa Oondjokwe.

Pethimbo olyo tuu ndyoka mbaka oya tsikile okudheula noku kuta aakwiita aape momudhingoloko ngoka. Ishewe omutondi okwe ya nokudhika wo ontanda moshitopolwa moka yeli kohi yehokololo kutya anuwa otaya tungu opate.

Ongo oshitopolwa shondunge yopakwiita, hailwa Patrick Lungada okwa li e na okundaadha aalongi yopate mbaka. Konima iilonga mbika yokundaadha oya pewa hailwa Rehabeam Nambinga ongo omukongi gwiilonga pehala mpoka.

Omusamane Swanepoel ngoka a li oye mwene aniwa gwehangano ndyoka okwa tindi okukuta Nambinga miilonga.

Oshoka uushili oombuka kutya Swanepoel okwa li Kapitiya  metanga lyopolisi yegameno yaSouth Africa lyokatongo, naanguka okwa li a longithwa ongo ombangi yepangelo okugandja uumbangi tawu kondjitha aakwiita yetu yamwe mboka ya li ya kwatwa noku ka edhililwa mondholongo koPretoria.

LEAVE A REPLY

Please enter your comment!
Please enter your name here