Ya kanithile omaliko gawo momulilo

0
457

KuMaria Namupala

ONANKALI – Aakalimo yomomukunda Okatundu mOnankali oya thigwa pongalangala yomutenya mOlyomakaya gayi , sho egumbo lyawo lya pipo thiluthilu. Oshiningwanima shika osha ningwa pethimbo lyomutenya lela.

Pahokololo tweli pewa ku gumwe gomaashiinda Ester Uugwanga okwa hokolola kutya okwa li iipyakidhila megumbo nuunona we nokonima okwa lombwelwa kokanona ke kutya opuna olwithi talu gundumuka taluzi puushiinda. “Onda matuka ndika tale shoka tashi ningwapo ashike okuthika pegumbo mpano onda mono ashike omulilo gwa yaka noondunda tadhi pipo nale niinima ayihe oya adhika ya pya nale,” Uugwanga tati nga.

Uugwanga okwati sho eya pegumbo mpono ina adhamo nenge omuntu gumwe  ashike omwali ngaa muna uunona. “Otwali tatu ipula kutya uunona owa pilamo ihe moku talatala otwa ka mona kutya uunona owa holama mepya lyopuushiinda , shino tashi ulike kutya uunona mbuka owa fike etawu hadhukapo oshoka megumbo owalimo owo awuke aakuluntu oya adhika ya zamo,”  ta tsikileko.

Egumbo ndika olya Adolf Johannes na Inasia Joel, Adolf okuli omuvu na okuna uunkundi wopamadhiladhilo ngono ha nu omiti ndhoka kehe mwedhi. Okwa hokolola nee kutya okuli a dhengwa nayi pomutima oshoka omaliko gawo, uuthemba nuukalata woshipangelo omo wa pile megumbo na inamu hupa nande osha.

“ Yakwetu otwa thigwa pomutenya na katu wete shono tatu vulu okuninga mongashingeyi, oopela dhandje nadho omo dha pila megumbo, ngashingeyi ohatu lala owala mokathayila hono kaa kena nande egameno lyasha otatu si uutalala nuunona wetu , otuli monkalo tayi nyengathana unene”, taya ti nga.

Adolf ngono ha kwata openzela yaakulupe omolwa onkalo ye okwa holola kutya okatse ke kopenzela niimaliwa nayo omo ya pila megumbo moka. “Tse sho twe ke ya otwa adha ashike omutoko gowala iinima ayihe oyapyapo thilu kondalu ya nelyanga ashike nande twa kanithila iinima yetu momulilo ngeyi otatu pandula Kalunga oshoka uunona inawu pilamo”, ta gwedhako.

Adolf nofamili otaya pula kaasamaria aanamutimahenda yeya kwathele nomukalo kehe taya vulu na otaya pandula aashinda mboka ya tondoka onkugo noku ya kwathela ngaashi ye shi ningi.

Omuwiliki gosenda yaNankali okwati otaya ka kundathana na Kansela gwawo yo ya tale shoka taya ningipo oshoka okweeta ohenda unene.  Na ota indile koshigwana shi yambidhidhe aantu mbaka yo ya vule okwiikwathela.

LEAVE A REPLY

Please enter your comment!
Please enter your name here