Aagundjuka kondjitheni elongitho lyoonkondo moshigwana

0
235

KuLoide Jason 

ONDANGWA-Aagundjuka oya indilwa opo yiilonge okusimaneka omwenyo gwomuntu. Eindilo ndika olya ningwa komugundjuka omukwawo ngoka eli omuwiliki pokolligi yomadheulo mOndangwa ha yi ithanwa Tutaleni Training College. Omugundjuka nguka okwa kumike ooyakwawo opo ya popye noku kondjitha elongitho lyoonkondo lya kankamekelwa kuukashike kookantu moshigwana.

Ester Antanga, ngoka eli omugundjuka omunandjungu, okwa thaneke andola opo omahangano gaagundjuka ga etepo iinyangadhalwa yopankalathano mpoka taya kala nokukundathana omadhiladhilo niiyetwapo kombinga yomakwatathano gopahole noshowo omashongo galwe gomonkalamwenyo.

Antanga okwa ti ngele shika oshaningwa nena “otashi vulika uuwinayi mboka tawu longwa  monkalamwenyo wu shonopale.”

Okwa indile aagundjuka opo ya kondjithe iilonga mbika iiwinayi tayi longwa moshigwana, unene tuu tayi longelwa aakiintu naanona.

Okwa hiya aagundjuka opo ya joine iita yokukondjitha elongitho lyoonkondo unene tali ningwa kaalumentu olundji ta ye li ningile aaholike yawo noshowo aanona.

Okwa ti omagongalo noongelki nadho wo odha pumbwa oku kuthombinga mokukondjitha iiningwanima mbika, mokugandja omayele gopambepo kwaamboka ye na omashongo momakwatathano gawo gopahole noshowo mboka ya taalela uupyakadhi monkalamwenyo esiku kehe.

Antanga okwa kumike aagundjuka opo ya kuthombinga miiningwanima mbyoka tayi kondjitha elongitho lyoonkondo ha yi unganekwa  moshigwana, oshoka uuna ya kuthombinga  nena yo otaya ka zalekwa uunongo nontseyo ndjoka tayi ya kwatha opo ewi lyawo li uvike kombinga yokukondjitha elongitho lyoonkondo.

Oolopota miikundaneki odha kala dhuudha oonkundana dhiiningwanima yelongitho lyoonkondo, ngaashi omadhipago, ekwatonkonga ngoka ga ningwa moshilongo konyala kehe omwedhi.

Aawiliki yopashigwana oya indile, opo aagundjuka ya kwatele komeho iita yokukondjitha iilonga yomuyonena mbika ya kankamekelwa kuukashike kookantu. Oya indilwa opo ya etepo omathaneko ngoka taga hulithapo omaihumbato ngaka itaaga idhidhimikilwa.

LEAVE A REPLY

Please enter your comment!
Please enter your name here