Aakalimo yamwe yomOmuntele kaya uvitile Kansela gwawo ombili

0
247

KuMaria Namupala

OMUNTELE – Aakalimo yomoshikandjohogololo Omuntele  oya li ya thikitha omanyenyeto gawo koshifo shika omolwa elelo lya kansela gwawo. Oyendji yomaakalimo, mbaka oyo aagundjuka, oya holola okwaa uvite nawa kwawo omolwa kansela gwawo ngoka Sackeus Nangula. Aagundjuka yamwe mbono yali ya udhitha metanga lyegameno ano (NDF) omvula ndjika oya holola kutya moshikandjohogololo Omuntele inamu za nande gumwe ando a pita momusholondondo gwaamba ta yayi komadheulo nonande ya udhithile. 

Omugundjuka gumwe ngono inaa hala edhina lye li tumbulwe okwati, yo oye wete ya patelwa kondje miinima oyindji ta holola kutya moshikandjohogololo moka omuna  aagundjuka oyendji kaayena iilonga notaya hupu nuudhigu. Kansela Nangula, sho a pulwa a tye kosha, okwa holola kutya ye mwene ompumbwe yomeya ndjono yili moshikandjohogololo she okweyi mona na otaya longo pamwe nombelewa ye yakwathele aakwashigwana mbaka. 

Yamwe yomaagundjuka oya holola woo kutya moshikandjohogololo shawo moka kamuna nande ooproyeka dhokuhumitha komeho aagundjuka, ohaye dhi uvile owala kiitopolwa yimwe. 

“Otwa  pumbwa ooproyeka ndhoka tadhi tu kwathele onga aagundjuka, otwa pumbwa woo oprograma ngaashi dho literacy naandho tadhi gandja omawuwanawa kaantu ayehe,” ta ya ti ngaa.

Aalongithi yopate otaya nyenyeta opate ndjoka inaa yi longwa nawa na onshona unene. Gumwe ngono a tseyika owala nedhina Thomas okwati ‘ Ngame onga handi longitha opate ndjino esiku kehe ondi uvite olukeno unene oshoka omamanya ngono ga longithwa opate ota ga yonagulapo omatayela getu, yo oya longithwa omamanya kaagena ongushu” Thomas ta gwedhako.

Nangula okwa uvaneke kutya otaka kala a gandja eyamukulo mbala ngaashi tashi vulika, ta ti: “Kombinga yopate otuli miilonga oku talulula oshinima shika na otandi ke mu galukila ndi mu tseyithile shoka twa tokola.”

“Yakwetu uuwanawa ohatu wu uvile owala komikunda ngaashi Oniihandhila mbela osho oko kwaza kansela nenge ongiini waalye , natu popilwe oshoka natse otwa hala kulya oshikuki shoshilongo shika ngaashi yakwetu taye shili koombinga dhimwe, otatu kala monkalo yatya ngeyi sigo uunake moNamibia lya manguluka,” ta ya ti.

Aakwashigwana mbaka oya holola kutya uupomba womeya gaanamukunda owundji kawu longa owa patwa oshoka kapuna ngu te wu pangele nenge ewu opaleke owundji owateka. 

Omikunda ngaashi Omalengefo oshowo Ombundu uupomba owa pata thilu naanamukunda otaya hupu nuudhigu kombinga yomeya.

LEAVE A REPLY

Please enter your comment!
Please enter your name here