Aalongwa yoPolytechnic ya sindana moompata mesiku lyAfrica

0
194

KuClemence Tashaya

EENHANA – Ivan Limbo na Samuel Nangula aalongwa, moPolytechnic ya Namibia oyo ya sindana moompata dha li pokati kiiputudhilo shika naashoka shoUnivesiti ya Namibia. 

Oompata odha li dhaningwa okudhimbulukwa evalo lyuukumwe wAfrica omimvo 50. 

Ndhika odha li dha ningilwa pEenhana mesiku lyAfrica sho aalongwa  ya li ya patana kombinga ya ngele aawiliki yAfrica otaya longo tuu nawa kombinga yondungedhiladhilo yokutungapo Iigwana yaHangana yAfrica.

Oompata odha li dha longekidhwa kendiki lya Pan-African centre lya Namibia (PACON), dho oongundu dhaalongwa yane kombinga kehe tadhi kondjithathana, moshinima, shika. Aalongwa yokoPolytechnic oya li ya gama kombinga yokutsondumbo nedhiladhilo ndyoka  omanga mboka yokoUnam ya li ya gama kokupopila edhiladhilo ndyoka. 

Oompata odha kutha konyala uule wotundi yimwe.

 “Inamu pukithwa kedhiladhilo lyIigwana ya Hangana y Africa, ndika olya li lya etwapo ku Muammar Gaddafi, ndele nena omuleli guni gwAfrica mwa kwatelwa nOmuperesidende gwetu gwa Namibia nguka eli mongulu ndjika iilongekidha okukundathana osheetwapo shika.Omuperesidende Robert Mugabe oye awike ngiika ta kalelepo edhiladhilo ndyoka. Na oye awike omulumentu gwa hugunina a thikama natango mokuya  komeho nondjodhi ndjika. Edhiladhilo ndika olili peni konima yeso lya Gaddafi ngiika olya fa lya si pamwe naye,” osho Ivan Limbo a pula.

Ongundu ndjoka oya li yi wetike tayi sindana oshoka oya gandja omatompelo gawo ga kankamekwa nomadhiladhilo geli mule kutya omolwashike edhiladhilo ndyoka itaali ka longa. 

Ihe nando ongaaka nakupatana omolwa edhikopo lyIigwana ya Hangana yAfrica, Keith Vries  gwokoUnam oye a mono po epapa lyomupopi omulumentu dhingi moompata ndhika. 

 “Tate Peresidende ngoye owuli mpaka nena, ndele okushitalela momakende gaAfrica  tse otwa pumbwa Iigwana ya Hangana yAfrica oshoka otwa vulwa okukala twa thikama noku ikwatelela kuEuropa. Sigo uunake tatu  kala twi ikwatelela kaakolonyeki yetu nale. 

Tala kwaashoka tashi ningwa mo Nigeria na Boko Haram, otwa pumbwa ngaa USA opo etupe omayele nkene tuna okulonga naamboka?Aawe nando otuna okudhikapo Iigwana  ya Hangana yaAfrica,” osho Gordon Joseph gwoko Unam a kondjitha.

Oompata odha li dha kalwa kiilyo yaakalelipo shilongo moNamibia, kaakwanepangelo nokaalongwa ya za kiitopolwa ya yooloka. Omuperesidende Hifikepunye Pohamba ngoka a li a fuulwa koonakupatana mbaka oye a gandja omapole nomapapa ngoka kwaamboka ya sindana ondjambi yopombanda mokupatana noshowo mboka ya landulako. 

Ongundu ndjoka ya sindana oondjoka yokoPolytechnic ndjoka ya pewa oodola omayovi 3 000 ekopi hali yugathanwa noombandi dhoshingoli.

 “Natu kumikeni aanasikola opo ya joine omalutu gokupatana nokulongitha iitalendi mbyoka yo ya pewa ku Kalunga kawo oshowo oondunge ndhoka yena. 

Oompata ndhoka twa mono nena otadhi kumike  tadhi tu tsu omukumo tse aawiliki ya Africa,” osho Omuperesidende Hifikepunye Pohamba a ulike.

LEAVE A REPLY

Please enter your comment!
Please enter your name here