Namibia a dhana nawa puudhano waagundjuka

0
148

Komutoolinkundana

WINDHOEK –  Ospana ya Namibia ndjoka ya li ya kuthombinga muudhano wedhina African Youth Games mo Gaborone, shaBotswana oya dhana nawa nokusindana oombandi adhihe kumwe 15. 

Oombandi hamano dhomwaandhika odha monika kospana ndjika momasiku gaali gahugunina guudhano mbuka.

Mehuliloshiwike lyayi ospana yaNamibia yo ku kayila oombasikela oya sindana oombandi mbali sho ndjika ya hulitha uudhano mboka naadhani yaNamibia yatatu ye ya yalandulathana methigathano ndika onkene yaali yomwaambaka oya pewa oombandi mbali.

Cristan de Lange okwa sindana ombandi yoshisilveri konima shoo ye a kala eli komeho gaakayili yoombasikela opamwe na Alan Hatherly gwa South Africa. 

Nguka okwa ka thigwapo ashike kuHatherly konyala medhingoloko lyahugunina momadhingoloko gahamano. 

Hatherly okwa kwata komeho pethimbo ndyoka noku thigila de Lange ngoka a kala emu landula okanano okafupi nongeyi okwe ya pehala etiyali.

Konima ya de Lange aakayili yaali ya Namibia Brandon Plaatjies okwa li wo eli nawa a thigapo aahingi mboka ye mu landula onkene ye okwe ya pehala etitatu, ye ta landulwa komuNamibia omukwawo Pascal Marggraff pehala etine nonando ndyoka ihali gandjelwa ombandi.

Marggraff okwa li wo a fuula esiku lya piti sho a li eya puutine muudhano wokukayila oombasikela oshinano oshile na okwa kanitha ompito yokupewa ombandi yimwe yomwaandhoka ndatu ashike okonyala a mone yimwe yomwaandhoka.

Metitano lyayi omudhani gwa Namibia gwotenesa,  Sedi Jacobs okwa sindana ombandi yoshikushu sho a dhengemo Natalie Dzenga gwa Zimbabwe niitsa 6:2; 6:2. 

Omanga methigathano lyahugunina lyaadhani aakiintu oohandimwe Chiraz Bechri (Tunisia) okwa sindana nokupewa ombandi yoshingoli sho a dhengemo Janet Koch (South Africa) niitsa 5:7; 7:6; 6:3.

Konima yokusindana ombandi yoshikushu Jacobs okwa dhana muudhano wa yaali pamwe nomukwashigwana omukwawo Lize Moolman moka ya kondjele oshingoli naadhani yokAlgeria, Chiraz Bechri naYosr Elmi, no ye ya dhenge  nongeyi oya sindana oshingoli sho ya sindana niitsa 6:3; 6:0. 

Oombandi dhoshingoli aakadhona mbaka oye dhi pewa ku Frank Fredericks, ngoka a li omuyenda a simana pethimbo lyuudhano mbuka.

Mesiku lyahugunina aadhani ya Namibia moathletica oya fuula sho ya dhana nawa nokumona woo oombandi ishewe. Mokunuka ontanu  Kristien Kruger okwa sindana ombandi yoshikushu sho a nuka ontanu yuule wometa 1.65, omanga  Viza Ujaha okwa vene oshikushu kaalumentu sho a nuka ontanu yuule wometa 1.99. 

LEAVE A REPLY

Please enter your comment!
Please enter your name here