Oklaba yonetball yOngwediva Medipark ya pewa epapa

0
218

KuShipi Elago

OSHAKATI – Ongwediva Medipark Netball Club ya pewa epapa moshituthi shokugandja omapapa koosipana dhokatanga komOkambamba moshitopolwa sha Shana.

Engathithi enene lyaadhani naa ondoli yomeho olya li lya gongala moshinyanga shOsekundo Sikola ya Ipumbu mOshakati opo ya ninge oonzapo moshituthi shotango mOshana shokugandja omapapa koosipana nokaadhani yokatanga komokambamba (Netball) ongulohi yetitano lyaziko.

Osipana yaMedipark Ongwediva oyali yeshi enditha nawa momaudhano gawo agehe naashika oshe ya likolele ehala lyotango, moka ya pewa oombandi dhoshingoli, Ekopi, noondola dha Namibia 5000.

Osipana yoBrave Lions oye ya pehala etiyali no ya yambulapo okapandi koondola dha Namibia 2500, noombandi dhoshisilveri,Sparttuns IUM oye ya pehala etitatu moka yapewa oondola dha Namibia 1250, Ohangwena Nampol 750,nOmusati Nampol oye ya pehala etitano moka yahekelekwa noondola dha Namibia 500.

Osipana yo 263 BN Netball Club oya li ya pewa ekopi lyoosipana ndhoka dhiihumbata nawa noya ulika omikalo omiwaanawa momukokomoko guudhano auhe.

Iiyambo Kandali Novalde okwa pewa epapa lyomudhani dhingi gokomumvo, omanga Abraham Belle Nandjigwa oye eli omuhiki hiya gokomumvo, epapa lyomudheuli gokomumvo olya li lya yi na Simon Josef.

Ngono ali a kalelepo aakwashilipaleki yethigathano ndika okuzilila kongeshefa yoIleni Cleaning Services, Frans Mbidi okwa ti” oyali yahogolola okukwashilipaleka uudhano waakiintu oshoka owa kala tawu dhengelwa kongudhi ethimbo nuule”.

Okwa ti ongeshefa yoIleni Cleaning Services oya li ya gandja oondola 15000,kethigathano ndika notayi ka tsikila nokukwashilipaleka uudhano mbuka ngele aadhani oya ka ulika ohokwe nokwiihumbata nawa momaudhano.

Mbidi okwa” indile aagundjuka opo ya longithe oompito ye dhi pewa kaakwashilipaleki yuudhano, ta ti oombepo dhanyata mokati kaadhani otadhi vulu okutidhila kokule nokuteya omukumo aagandji yeeshali”.

Okwa gandja olupandu kaakwateli komeho yuudhano mbuka sho ya li yalongo nuudhiginini okutula ethigathano ndika pomuthika gondondo yopombanda.

Omunashipundi guudhano mbuka Abraham Belle Nandjigwa naye okwa holola olupandu lwe koosipana adhihe dha kuthile ombinga, aayambidhi, nokwa kuthileko embale ongeshefa yoIleni Cleaning Services sho ya tondoka onkugo yawo moku ya pa ekwashilipaleko lyoodola 15 000.

 Belle okwa ti” Osipana yaMedipark Ongwediva oyi na ompito ombwaanawa ngashiingeyi oku ka kutha ombinga methigathano lyo Supper League ndyoka hali kuthwa ombinga koosipana dhopondondo yopombanda moshilongo”. 

LEAVE A REPLY

Please enter your comment!
Please enter your name here