Pineas Nambandi oye omulongi goMahangu dhingi

0
184

KuMaria Namupala

OSHAMAKAKA –  Uuministeli wUunamapya ngaashi hawu ningi oshituthi omumvo kehe oku ulika omunafaalama dhingi ngono a longa omahangu e vule ayehe nonuumvo osho yali ya ningi.

Metine lyomasiku 22 oyali ya longekidha etalelepo opo ya thike kegumbo lya tatekulu Pineas Nambandi nokukwashilipaleka yo ya tale ngele shoka tashi popiwa osho shili. Osheendo oshali sha kwatelwa komeho ku Ngoloneya gwaShikoto, Penda ya Ndakolo, aaniilonga yuuministeli wUunamapya , aanafaalama oshowo aanamukunda.

Konyala iitopolwa ngaashi sha Zambezi,Kavango,Ohangwena, Oshana, Omusati noKunene oyali ya tuma aakelelipo yeye ya ninge oombangi pesiku ndi. Oshituthi shika oshali sha ningilwa ashike pegumbo lya tate Nambandi pOshamakaka moshitopolwa Oshikoto. 

Aakwashituthi oyali ya kutha olweendo opo ya ende mepya noku ya polupale ya tale nkene tate Nambandi a longa omahangu. 

Tatekulu Nambandi pauyemwene okwa ti, okuli uuvite etumba nuunambano sho a ulikwa onga oye omulongi mahangu dhingi. “ Otandi pandula unene aakwatheli yandje mbono haya kala noku kwathelandje moondima opo ndi vule ndi longe iilya yandje nuudhiginini nonande kashishi oshipu”, ta ti nga.

“Shino oshili ondjokonona oku ulikwa onga omulongidhingi gokomumvo ashike onda hala ndi mu tseyithile mpano kutya ngele itamu kuthako oongaku ne mu longe nokwiitulamo natango ekopi ndino otali galukile ndje omvula ta yi ya oshoka nomondambo omo ndili natango”, Nambandi ta londodha ngaaka  nomukumo.

Tate Nambandi okwati nonande omvula ya kala tayi kanda omapunya nuumvo okwe shi pondola sho iitula mo miilonga ye yomepya ayihe noku sindanapo epapa ndi, Shino oshili oshikando oshitiyali sho Oshikoto  tashi sindana ekopi ndika. Mo 2011 omulongi dhingi okwa yambukile koshikandjohogololo Eengodi, ye oye Lasarus Uushona. 

Ngono ali a longo omahangu e vule yakwawo omvula ya ziko o Festus Abiatar a zile kOmpundja ya Kapolo ka Nuuyoma koshitopolwa shaShana. Abiatar okwa indile aalongimapya ya longe neitulemo yo ya ka mone eteyo lili nawa pehulilo.

Aakwanambelewa yaza kUunamapya oya pandula tate Nambandi sho a longa nawa taye mu indile natango a tsikile noku longa nuudhiginini.

LEAVE A REPLY

Please enter your comment!
Please enter your name here