Taya nyenyeta Muni pOluno

0
298

KuLoide Jason 

ONDANGWA – Oomeme mboka taya landitha no kuhondja oohema dhoontulo noshowo oondhelela momatala gopOluno mOndangwa onkee taya nyenyeta muni gwawo aniwa a gwedhela ofuto yomatala ine ya lombwela.

Oomeme mbaka oyati kutya aniwa muni gwaNdangwa ine ya simaneka oshoka oha ningi omatokolo ine ya lombwela unene ngele tashiya pegwedhelo lyomafendelo. “Tse muni okwe tu lulila noonkondo, otwa hala ngaa ngeno a ninge ha kwathele aantu ayehe ngaashi ta kwathele kuutala woonyama,” oomeme yati.

Oomeme mbaka oyati wo oyu uvite uudhigu taya futithwa oondola N$50 omanga yo momatala kayena mo olusheno lwasha.

“Tse omeya oge tuli kokule na otatu longitha omeya go mokandjugo shaashi uuwanawa awuhe owa ukithwa ashike komatala gwoonyama uunene tuu olusheno,” oomeme ya lombwele Kundana.

“Omatala getu oga kaka, kagena olusheno, omiyelo ohadhi patwa komutonateli gomaliko nokufutitha aantu mboka taye ya okulanda momatala shoka woo inashi tu nyanyudha,” osho ya ti.

Oyati woo oondando momatala nadhi kale dhi thike pamwe oshoka aniwa opuna mboka ha ye ya momatala taya landitha oohema dhoontulo kombiliha lela  shoka tashi yi woo iipindi yawo moshipala.

Oomeme mbaka oya pula woo kutya omolwashike muni ena okukala ta longitha aatonateli yomaliko okufutitha aantu okuya meni lyomatala ita tulapo aanambelewa ye. Ashike omukuluntu gwaMuni okwa ti ye kena uuyelele mwaashoka.

Martin Elago okwa ti olusheno momatala olwa tulwa ashike pomahala ngoka ga pumbwa okuminikilwa ashike ngoka inaga pumbwa okuminikilwa ka ge nasha.

Okwa ti wo kutya omanyenyeto ogendji oga tulwa momulandu gwoshimaliwa shomvula ndjika opo ga kale ga longwa mo.

LEAVE A REPLY

Please enter your comment!
Please enter your name here