WHERE OTHERS WAVERED – Ontanda pOmugulu-gOmbashe Juni 1966

0
303

MuJuni 1966 ongundu yotango oya yi kOmugulu –Gombashe nelalakano okuthika kondundu ya Oshiwandu ndjoka yi li pokati ko Kaokoveld nUukwaluudhi. Ihe molwashoka opwa li opate tayi longwa mbaka oya tokola okudhika ontanda yawo mOmugulu-gOmbashe, ye yi dhike pOtunganga momudhingoloko gwOmugulu-gOmbashe. Pethimbo ndika ongundu ya Commander Nankudhu oya adhika ya dheula aanandjungu yo SWAPO ye li pokati komilongo 80-90. Pethimbo ndyoka oya tameke okufula omahala gokuholamena kohi yevi omolwa okuiigamena noshowo okupungula mo iikondjitho yawo pamwe nooholo nenge iikuti yawo. Manga ye li pOmugulu -Gombashe oya ningi ekwatathano naantu yopomudhingoloko mpoka. 

Oya tumu Shikalepo Iileka gumwe gwomaanandjungu pomukunda mpoka  opo a ka hwahwameke aantu moKaokoveld opo ya yambidhidhe SWAPO. Konima sho Iileka a galuka ko Kaokoveld okwe ya lombwele kutya aantu koshitopolwa hoka oya hala okujoina SWAPO nenge oya hala oku joina Eendume Domomufitu ngaashi aakwiita yekondjelomanguluko ya li ye shiwike nedhina ndyoka.

Oya li ya tuminwa elaka lya zi ku hailwa Ya Toivo tali ti kutya oshilyo shimwe sho G2, Leonard Philemon ‘Castro’ Shuuya okwa thiki  momudhingoloko moka muna ontanda yawo. Oohailwa Nankudhu na Tuhadelelni oya yi ye ke mu tsakaneke paandja Hailwa Isak Shoome konyala ookilometa ashike dhimwe dhimwe okuza pOmugulu-gOmbashe. Oye mu pulapula ngele okwa li a kwatwa kaapolisi yegameno ya South Africa. Castro okwa ikala oshinima shoka. Konima yoku mu pula pula oya yi pamwe naye kontanda yawo yakwiita, hoka a ka pula pulwa ishewe kaawiliki yiilonga yuundaadhi konyala esiku alihe, nokwa tsikile natango oku ikala kutya okwa li a kwatwa kopolisi ya South Africa.

Ndele pethimbo lyomapulo ngoka okwa li a lombwele oohailwa kutya ewiliko lyoSwapo pondje yoshilongo olya li lya tumine oshimaliwa ku Ya Toivo. Hailwa Nakudhu okwa tokola opo ya ye na Castro kaandja Ya Toivo opo ya ka tale iimaliwa mbyoka. Ya Toivo ka li eshi sha kombinga yiimaliwa mbyoka na okwa londodha Commanda Nankudhu opo a kale a kotokela Castro ngoka. Commanda Nankudhu okwa shuna kontanda yawo ndele mondjila okwa akukilwa komukithi omanga eli moshitopolwa shaNgandjera. Castro ngoka ya li ya uvathana na Commanda Nankudhu ya tsakanene pehala lyontumba ina gwanithapo euvathano lyawo na okwa adhika ku commander maandja hailwa Lamek Iithete. 

Oshoka commander Nankudhu okwa li natango itaa lalapo nawa okwa lombwele Castro opo a ye a ka  thike kontanda kOmugulu –gOmbashe nokukale hoka sigo uuna ndoka commanda Nankudhu a thiki montanda. Ihe Castro montanda okwi iyakamo  omanga Nankudhu inaa thikamo okuza kOngandjera. Okwa zimo montanda anuwa tati ota ka tala ngele iimaliwa mbyoka a li a popi oya thika paandja ya Toivo koshitopolwa shOndonga. Commanda Nankudhu okwa ka tokola a shune kontanda kOmugulu –gOmbashe konima yoku uva kutya Castro okwa shuna kOndonga na ishewe kutya momudhingoloko ngoka omuna aantu yaa shiwike taya inyengemo. Oshiponokela shomo 26 Auguste 1966 pOmugulu-gOmbashe.

Esiku lya landula kokutya omilongo 26 Auguste 1966 lwopotundi 5; ongula onene etanga lyopolisisi yegameno ya South Africa olya ponokele ontanda yopOmugulu gOmbashe, mewiliko lya Swanepoel. Oshiponokela shika osha li shaningwa noondhila dhomadhagadhaga dhili hetatu oshowo nomahauto ga humbuta aakwiita.

Yo aakolonyeki mboka oya li ye lilwe komeho ku Castro ngoka oye eya ulukile ondjila ayihe nkene taya thiki pOmugulu-gOmbashe. Commanda Nankudhu okwa pe aakwiita ye elombwelo opo yi ipopile nokuumba aatondi yawo. Konima yolugodhi lwethimbo efupi commanda Nankudhu okwa ka lombwela aakwiita ye ya ethepo okuumba oshoka omutondi gwawo okwa li a fa ena oonkondo eya vule. Ndele oohailwa Lungada, Rehabeam Nambinga na Jonas Nakale oya tsikile okuumba. Molugodhi ndoka omwasila hailwa Akapeke Hipangelwa na Jonas Nakale. Konima esiku olyo tuu ndyoka oohailwa Lungada na Nambinga mboka ya li ya tsikile oku kondja oya ka etha woo okuumba aakondjithi yawo, na oya ka tseyithila Shikalepo Iileka shoka shaningwapo. Shikalepo okwa kutha onkambe ye nokuya koshitopolwa shoka iiningitha a fa ta kongo oongombe dhe. Okwa li  a kwatelwa pehala mpoka sho a thikipo, na okwa ka ethiwa nokushuna kegumbo hoka  aadha hailwa Lungada na Nambinga nokwe ya hokololele kombinga yaamboka ya kwatwa nenge ya ehamekwa noshowo ya sila molugodhi ndoka.

Mboka ya li ya kwatelwa polugodhi nduka oyo, Julius  Shilongo Kashuku, Phillemon Shitilifa, Shinima Niilenge Harakatyi, Ndjauka Shaningua ’Mankono’ ngoka a mana oondjenda konima yemanguluko, Sakeus Philipus Itika, nguka okwa mana oondjenda konima yokumangululwa mondholongo koPretoria, Petrus Simon Niilenge okwa manene oondjenda mondholongo yokontuntu ya Robben, James Amukwaya okwa manene oondjenda mondholongo mo Pretoria , monkalo yaashi kufatululwa kutya okwa si koshike na oshike she mu etele eso, oshowo nee Thomas Haimbodi.

Esiku 27 Auguste 1966 konima yoshiponokela, hailwa Nankudhu okwa shuna kOmugulu-gOmbashe oku ka tala oohailwa mboka ya ehamekwa pethimbo lyolugodhi. Konima yokutala nawa pehala mpoka commanda Nankudhu okwa yi kegumbo lyomusamane Kamanya, ngoka a li eya kwatha  ethimbo a li  eya tsakaneke yo na Lungada oshowo naNambinga. Aakwiita mbaka yatatu oya yi kUukwaluudhi noshowo konima oya yi kOngandjera. 

Oya  yi kaandja hailwa Lamek Iithete na oya lombwelwa kutya oya a dha Castro opo ashike a zi pegumbo ndyoka.

LEAVE A REPLY

Please enter your comment!
Please enter your name here