Ya Toivo a lukilwa ombelewa yoSwapo mOnyaanya

0
199

KuMaria Namupala

ONANKALI – Okuuka pehulilo lyomwedhi gwayi moshikandjohogololo Onyaanya omwa patululwa pambelewa ombelewa yo Swapo ndjono yili momukunda Onandhi pocenda ya Nankali.

Nonande mombelewa muno mwa kala ta mu longelwa inayi kala ya egululwa pambelewa , opo ashike ya patuluka pambelewa omasiku ngaka. Kansela gwoshikandjohogololo shika Henock Kankoshi okwa ti shino oshi li ondjodhi onene oku hedhitha omauwanawa koshigwana sho shi tyapule uuwanawa wemanguluko.

“Tse onga aayakuli naapiya yoshigwana otuna okutala ompumbwe ndjoka aakwashigwana ye na tse tu ya kwathe ngaashi tatu vulu, ombelewa ndjika ngaashingeyi oya patuluka pambelewa na, yi longitheni pamukalo omwaanawa opo yi vule ku adhikapo komapipi ta geya” Kankoshi ta ti nga.

Epatululo lyombelewa ndika olya ningwa pamwe nedhimbuluko lyesiku lya Cassinga lyali li na kudhimbulukiwa mu ga 4 ga Mai, esiku lya Afrika ndyono hali dhimbulukiwa aluhe mo 25 Mai, nesiku lyaniilonga.

Aakwashigwana oyali ya gongala oku dhimbulukwa omasiku ngaka gasimana oshowo oku ninga oombangi dhepatululo lyombelewa ndjika ya lukilwa omusimanekwa Andimba Toivo ya Toivo ngono eli omvalele yaMangundu omukunda gu li moshikandjohogololo shaNyaanya.

Poshituthi mpano opwali pwa kalwa komugandjimayele gwa Ngoloneya gwOshikoto nokuli omusita keithano meme Aino Kapewangolo, ngoka a popitha oshigwana nokushitsa omukumo shi yande elongitho lyiikolitha sho shi simaneke oonkuluhedhi dhOshiwambo.

Ongundu yolwiimbo yegongalo lya Nankali oyo ya li tayi mwenyeke oshituthi nomaimbilo gopambepo  , oongundu dhomaudhano nadho odhali tadhi mwenyeke woo esiku ndika. Mwene gomukunda Onandhi tatekulu Namene ya Shilongo okwa ti ota pandula sho ya egululilwa ombelewa yawo ndjoka pambelewa ta indile natango Kansela gwawo a tsikile nokuya pa omakwatho ngaashi he shi ya ningile shito.

LEAVE A REPLY

Please enter your comment!
Please enter your name here