Yomeumbo iha i kundafanwa komaumbo

0
290

Ohandi shange ombapila ei opo ndi u like pauyelele kutya moutekuduliko wOvawambo omuna oinima imwe oyo ta i dulu oku eta ile oku nwefamo omahepekafano opanghalafano mokati koshiwana shetu.

Pashiwambo okaana ohaka tekulwa noku longwa kutya oinima yomeumbo ihai popiwa komaumbo. Okaana ohaka kunghililwa ka ha popye nande oshimwe hashi ningwa meumbo lavo kutya nee oshiwa ile oshii. Eshi elalakano lasho nande olo kwali okulonga okaana ka kale kena omutima eshi taka kulu, otashi longo ngoo okaana opo ka kale keshi eshi shoku popiwa kovanhu vokomaumbo naashi shi heshi ku popiwa. Nonande elalakano okulonga, elongo eli inali yelifa naana kwali kutya oikwashike ina okutuvikilwa momutima nayi ihena okutuvikilwa momutima, shaashi imwe otai teyapo omutima. Oinima ihapu inai popiwa komaumbo oya eta omahepekafano opanghalafano momaumbo etu.

Omafimbo mahapu oto hange omukulukadi eli momahepeko omushamane, ile omushamane ta hepekwa komukulukadi, ndele shaashi ovena eudeko olo kutya “oinima yomeumbo ihai popiwa komaumbo” nena ohapa kala ashike umwe tapi odidila ye itati handi pi vakwetu. Oshinima nee shatya ngaha osha eta nee omahepekafano opalutu, pamadiladilo, panghalafano, pamhepo, oshoyo papolotika pokati kovashamane, ovakulukadi oshoyo ounona, shaashi inava hala oku popya oinima yomomaumbo avo pondje.

Ngeenge otwa tale nee kounona, vahapu ova kwatwa keenghono (vaiwa navo momilele shi heli pahalo lavo) koxeekulu, koOxe, kovamwainamati, oshoyo ovapambele vopopepi shaashi va djala  ondjafa ei kutya “ oinima yomeumbo ihai popiwa pondje”.

Momaumbo etu omuna ounona va dalwa kovamwainafana pamukalo wekwato keenghono, ovashamane vamwe ova dala nounona vavo keenghono, oxeekulu vamwe ova dala novatekulu ndele vati nasho inashi popiwa komaumbo, omanga ovashamane vamwe va dala nounona va dalwa kovakulukadi vavo ndele vati nasho nashi mwenenwe ngoo.

Nonande oshinima eshi hashi mwenenwa omafimbo nomafimbo, omafimbo nomafimbo ohashi ka shituka oululu ile oboma tai hanaunapo omunhu, okaana ngeenge oka kala efimbo lile inaka lombwelwa shili ndele taka ka lombwelwa oshili, nena oudjuu wa kala nokaana ohashi shiiva u ka twale medundakano lomadiladilo. Ounona vahapu ove li kufa eemwenyo (veli mangeleka) shaashi va lombwelwa nghee sha enda opo va dalelwe mounyuni omu. Ava inave li kufa eemwenyo ova kwata komalihumbato mai, vamwe ova tameka okunwa omalodu sha pitilila, omanga vamwe va hovela okuninga ngaashi va ningilwa (vahepekafana).

Oshiwana inashi pumbwa oku longwa oku kala sha mwena ngeenge tashi hepekwa ile tashi hepekafana. Okumwena otaku dala omahepeko, nomahepekafano otaa dala efyo mokati koshiwana shetu. Ovanhu vahapu nena moshilongo shetu ova humbata novatwikwa omitengi di djuu domaukwatwa omahepekafano, momaumbo avo, moilonga hava longo mo, omahepekafano a etwa kopolotika oshoyo omahepeko a etwa komaitavelo e hena ekanghameno. Ndele shaashi kaveshi nghee vena oku a popya mo nawa, nena okwa ninga oudu unene ta u eta omafyo ina teelelwa moshiwana shetu. Ovanhu vahapu nena ova ngwangwanekwa komalongo itavelo mahapu, vamwe ovapiyanekwa momitwe davo paife ndele otava monika vafa ovapwidi nokuli noilonga ei tava longo oya uka koupwiduli nokuli.

Oshiwana shetu osha pumbwa exungomwenyo lopombada, osha pumbwa oku shiiva nghee omaupyakadi opanghalafano ena oku kundafanwa ndele tapa hangwa eudafano netwokumwe moshinima eshi tashi eta omaupyakadi. Otwa pewa omatwi tu ninge okutwi kwaava vehe uditeko, otwa pewa elaka newi tu longe ava va pumbwa okupukululwa noku yukifwa mondjila ya yela, otwa pewa omesho tu mone apa pa puka notu pukulule oshiwana. 

Natu dimbuluke fye tu koneke kutya ounona vomoshiwana shetu ovena omaupyakadi opanghalafano ndele inatu popya ile inava popiwa navo, Ovakulukadi veli momahepakafano opamadiladilo, opanghalafano, opamhepo, oshoyo opapolitika omo veli moshiwana shetu ndele inava mona ou ta dulu oku va pwilikina nawa nokutwi konheni, novashamane tava hepekwa omo veli moshiwana shetu, ndele shaashi omushamane/omumati iha nyenyeta ngaashi omukulukadi/okaadona, nena ova mwenena omahepekafano tave a ningilwa kovahepeki vavo, ko konima eshi pena umwe a dipawa fyee hatu yandje eembedi fye oshe ngoo tweli kwata komesho, hatu li fitike komatwi eshi omalinyengo omahepeko kwali taa kolokota pufye.

Pexulilo ohandi indile Oshiwana shetu shi kufe omukalonghedi woku konga ekwafo lexungomwenyo ngeenge pena oupyakadi wa kuma onghalafano pokati kavo. Oshinima keshe tashi u ndulile pedu ile pombada onghalamwenyo yomunhu (kutya nee omukifi u fike peni, ile oulema u  fike peni), otashi dulu oku monenwa enyamukulo okupitila meenghundafana. Efilu keshe lili monghalamwenyo yomunhu otali dulu oku fufilwa, omulaulu keshe watuvikila onghalamwenyo yomunhu otau dulu oku minikilwa, netimba keshe omunhu a ninga ota dulu oku kufilwapo. “Kapena shikukutu ihashi xulu, ko ka kuna shidjuu ihashi shuna omutwe moipeta.”Ombili nai kale nanye!

*Lasarus Nghifindwako Hakwaake omulihongi woikwaKalunga muAnglican

Ohangwena

LEAVE A REPLY

Please enter your comment!
Please enter your name here