Aashakati ya pewa ethimbo opo ya fute oondjo dhawo

0
249

KuHelvy Shaanika  

ONGWEDIVA – Omunambelewa Omukuluntupitithi gwelelo lyoshilando Oshakati okwa ti ewiliko lyondoolopa ndjoka otali vulu ashike okutsikila nokugandja omayakulo omawanawa nogopethimbo ngele aakalimo yomoshilando shoka ohaya futile wo omayakulo ngoka omwedhi kehe.

Werner Iita okwa popi ndhika poshigongi shiikundaneki mOshakati oshiwike shika pethimbo a tseyithile aakalimo yomondoolopa ye kutya otaya pewa ompito mu Juni na Juli opo ya thike koombelewa dhelelo lyOshakati okuya ya kundathane ofuto yomayakulo gawo gopamuni ndjoka yi li konima.

Iita okwa indile opo aakalimo mboka yena oongunga dha muni, ya ye koombelewa dhelelo lyoshilando opo ya ka kundathane nalyo kombinga yomukalo ngoka taya ka longitha okushunitha iimaliwa mbyoka.

Okwa hiya aakalimo ayehe mboka yena oongunga dhelelo omolwomayakulo gopamuni okuza omumvo 1993 opo ya holoke koombelewa mu Juni na Juli ya kundathane omukalo nenge omikalo omiwanawa nkene yo taya adha etsokumwe moku futa iimaliwa mbyoka osigo yo ye yi manitha.

Iita ina tumbula kutya ewiliko lyoshilando shaandjawo oli ninwe oongunga dhomwaalu gu thike peni kwaamboka taya indilwa opo ya ka kundathane elongekidho lyiifuta. Okwa ti ishewe elongekidho ndika kali shi okudhimapo ando oongunga ndhoka ndele ndika olina elalakano okugandja ompito kaanandjo opo ya fute oondjo dhawo nenge ya kundathane nkene oondjo dhawo taye dhi futu sigo dha pu.

Okwa ti oshasimana opo aakalimo yomOshakati ya longithe ompito ndjika okuya ya kundathane newiliko lyoshilando nokufatulula oonkalo dhawo opo ewiliko li vule okuya kwathela. Opo pehulilo lyoonkundathana nomukalimo kehe, ewiliko otali ka konakona omayalulo ga kehe gumwe okutala shili kutya ngoka oongunga dhe odhi li pomuthika guni.

“Elalakano, oku ithana aakalimo mboka ye li monima niifuta yawo, olyo okutala kutya otali longo ngiini nawa moku ya kwathela, sho tali kundathana oshipala noshipala nomukalimo kehe ngoka taka holoka koonkundathana ndhika.Omukalimo kehe otaka kundathanwa naye oshoka kehe gumwe onkalo ye oya yooloka ku ya mukwawo,” 

“Otwa ndhindhilike kutya aakalimo yamwe ohaya longitha omayakulo gopamuni , ihe oyena uudhigu okugafutila nonando shoka haga futwa kashishi unene oshindji.Onkene oshasimana opo kehe omukalimo ngoka omayakulo ge ga tetwako molwoongunga, a holoke kombelewa opo pu adhike epotokonono lyeshongo ndyoka nomukalo tagu mbilipalele ewiliko noshowo omuyakulwa,” Iita a ti.

LEAVE A REPLY

Please enter your comment!
Please enter your name here