Nainda a yi mo moshinima shAanayena

0
312

KuMaria Namupala

ONAYENA – Oyendji yomaakalimo mOnayena oya li ya ulike okwaa uva ombili kwawo konima yoshigongi shoka ya ningililwe ku Komufala gwopolisi yaShikoto, Kommissina Anne Marie Nainda unene shina neindilo lyawo opo aanambelewa yopolisi mboka haya yakula oshigwana mOnayena ya lundululwepo. 

Omalundilo ngaka oga ningilwa aapolisi sha landula omaso gaantu yomwaalu gwontumba mOnayena ngoka aakalimo ya ti otaga limbilike, unene tuu sho aantu mbaka haya adhika ya sila momeya. Oshikwawo aniwa aantu yamwe oya sa pOnayena molwashoka ta ku fekelwa ya pewa uuzigo, nenge mboka ya adhika momeya opena omutoto kutya oya fa ya umbilwamo shina sha na yamwe taya fekelwa taya li omauku nenge monena ya ya komindamba opo anuwa ya kale ya kola pamahupilo ngiika.

Omitoto ndhika odha ekelwahi kopolisi okupitila mu Kommissina Nainda ngoka a ti omidhimba dhaantu mboka ya si eso lyaashi lyopaushitwe sho dha tandwa inadhi monika ando dhina uuzigo, onkene omapopyo ngoka kagena omakankameno nuumbangi washa.

Aakalimo yomoshikandjohogololo Onayena ina ya pandula no ka ya uvitile ombili omayamukulo ngoka ya pewa okuziilila kewiliko lyopolisi yoshitopolwa shaShikoto. Aanayena oya lundile aapolisi mboka kutya iilonga yawo ka yi li pauyuki. Aanayena oyendji oya ti onkalo yomOnayena otayi nyengathana na oye wete ya pumbwa ku talululwa.

Kombinga yomaihumbato gaapolisi Kommissina Nainda okwa uvaneke ta ka talulula nawa oshinima shoka ye a ninge omalunduluko mbala mpoka tashi vulika “nonande ka shishi oshipu okuthikila owala to lundulula ngaaka oshina okukutha ondjila onde onkee aakwashigwana naya kale owala yeshi kutya onkalo ondi yi wete na otandi longo naapolisi mbaka”, Nainda ta uvaneke  ngaaka.

Kommissina Nainda okwa hokolola woo kutya ye mwene okuwete kutya mOnayena otamu inyenge sha shoka yo onga aapolisi itaaya vulu okushi kandulapo ashike okwa uvaneke ta ka galuka eye a ninge natango oshigongi naaleli yopamuthigululwakalo oshowo aaleli yoongeleka opo ya kandulepo uupyakadhi mboka wulipo.

Oshigongi shoshiwike shayi osha ningilwe ongo eyamukulo keuvaneko ndyoka Kansela gwoshikandjohogolo Onayena Max Nekongo a li a uvanekele aawilikwa ye kutya ote key a galukila mbala oku yeetela omayamukulo komapulo ngoka ya li ye mu pula moshigongi shomasiku 13 Apilili nuumvo. Oshigongi shoka osha ningilwe esiku ndyoka tashi kongo omayamukulo komashongo ngoka ga taalela aakalimo yomOnayena , mboka ye na uutile oku inyenga nemanguluko omolwa omitoto dhaantu taya gandja omauzigo yo taya tidha aantu aniwa  nomalalakano gaashi ku fatululwa.

Kansela Nekongo okwali a tseyithile omukuluntu gwopolisi mOshikoto na oyali ya kongo esiku opo ye ye ya popithe oshigwana shaNayena yo ya gandje omayamukulo ngoka ya monapo. Momasiku ga 4 gomwedhi nguno kansela okwali a hiya oshigongi owina mono omukuluntu gopolisi ya Shikoto, AnneMarie Nainda a li a zi kOshomeya nomatanga ge opo eye a pulakene shoka tashi inyenge mOnayena.

Kansela goshikandjohogololo Onayena, Max Nekongo okwa indile aantu yoshikandjohogololo she ya pangelwe kombili yo ya kale yena ohole yuumwainathana. “ Edhina lyOnayena olya kaka unene na ngame onga kansela ohandi ende tandi ulikwa ominwe, yandeni oku taandeleka omitoto naamba tamu longo iimbuluma lundululeni ne tamu pangelwa koshili”, Nekongo ta popi ngaa. 

LEAVE A REPLY

Please enter your comment!
Please enter your name here