A ningila omukainhu omatilifo edipao koFacebook

0
322

KuHelvy Shaanika 

ONGWEDIVA – “Omwenyo womunhu ouna ombilixa unless  (shapo ongeenge) wa vaka oimuna. Nella do ur job… (Nella longa oilonga yoye…”).

Eli olimwe lomomatumbulo a shangwa kepandja loFacebook lomulumenhu Nella Shortgun Erastus Nepela oo taku fekelwa kutya ota ningile omukainhu ina tumbulwa omatilifo edipao. Kakele kwaasho a shanga, Nepela ou okwa tula yoo kepandja laye efano londjebo noikuti, taku fekelwa kutya oyo kwali a tokola okukalongifa oilonga yoikulumuna. 

Omolwa omatilifo oo a ningwa mOsoondaxa ya djako, hano konima ashike yomafiku avali eshi omulumenhu oo naye womoshitukulwa shaKalongo, a longa oilonga i nyayalifa, ovakwashiwana vamwe ova lopotele opolifi oshinima sha Nepela, omolwa oumbada kutya pamwe naye ota ka wanifa po omatokolo aye.  

Ashike Kundana eshi a denga noku ya meenghundafana na Nepela, omulumenhu ou okwe li patana ta ti kutya ye haye a shanga oinima ya tya ngaho kepandja laye.

“Ame ongodi yange oya vakwa po. Omunhu ou a vaka po ongodi yange oye ashike ena oku kala a shanga oinima yatya ngaho kepandja lange loFacebook. Eshi ndeke shi mona kutya opena omunhu ta shange oipolopolo kepandja lange, oinima oya shangwa nale,” Nepela ta ti.

Nepela ta lombwele Kundana kutya ye okuna ovakainhu va fika pu vahetatu lwaapo omo vavali vomuvo veli moWindhoek ashike yee exuliloshivike olo taku ti okwa li ta ningi omatilifo, ye kali mo moWindhoek, okwa li koBethanie oko a li a yako noilonga. 

Nepela okwa lombwela yoo Kundana ta ti, omumati oo a longa oikulumanene mEtitano ladjako owokoilongo yavo ye okumushi nawa shaashi ova fikola pamwe.   

Otaku hokololwa kutya Nepela ou a shanga omatumbulo ta a difa omaxwilili koFacebook okwa kala koKeetmashop, na okwa dile komukunda Omutundungu,  kOkalongo, mOshitukulwa shaMusati, oko opo ashike kwa longwelwa oilonga yoikulumanene oshivike sha djako komufekelwa oo naye a li a kala ta shange omahalo aye noilonga yaye koFacebook.

Pauyelele oo wa yandjwa komupopiliko wopolifi moshitukulwa shaHangwena Sisande Abner Kaume Itumba, opolifi ita i ka kufa ko nande omatilifo oludi eli onga oshinima shongaho, shaashi ope na nale oimbuluma ya longwa moshilongo konima eshi oonaku ininga vaholola omatokolo avo ko Facebook.

Itumba ta ti, opolifi koHangwena oya ninga nale omakwatafano nopolifi yaWindhoek  opo Nepela oo a li ta shange kepandja laye kutya oku li moWindhoek a kongwe, noku pulaapulwe, na ope na oupu opo a patululilwe oshibofa shokuningila omunhu omatilifo edipao.

Mokuninga omatilifo ngaha kepandja laNepela okwa  hololwa kutya oku na ehalo nelalakano opo a longe oilonga ya faafana naayo ya ningwa komulumenhu wokomikunda davo eshi a shanga vali kepandja tuu laye oko ta ti “… Next news from that (Omusati) region is gonna be heavy again. Nella next…” (Onghundana ei vali ta i ka dilila koshitukulwa oko (kOmusati) ota i ka kala idjuu. Nella oye ta shikula ko”). 

Pedu leshangelo laye okwa tula po ehokololo la kufwa moikundaneki lina sha noshiningwanima omo omulumenhu wokomukunda Onamhindi kOkalongo oo vati a yasha noku dipaa omunhu umwe, ta lemaneke nokuehameka ovanhu  vaheyali ndele ta kwata onghonga okaana keedula 14, moshiningwanima osho sha ningilwa ngaho kOmutundungu, Etitano ladjako.

Pakutala kwaasho sha shangwa koFacebook, omulumenhu ou nonande a fika moWindhoek omo ta ulike a li a hala oku longela oilonga yomunyonena, ina ka ninga vali eshi a li a udaneka, ta shi ulike kutya eshi osha landula omakumaido ookaume novapambele vaye ovo va kala nokumupa koFacebook tuu oko.

Keshangelo laye limwe omulumenhu ou okwa yandja ombili kwaavo va kala nokumukumaida, ta ti oku va hole unene, na keshi kutya okwa li ta dilaadila shike, na Saatana ote mu shingi opo a ninge oinima ii nonande yee ina dalwa a ninge omudipai. Ashike okwa pandula komakumaido oo a pewa.”Medina laJesus,” ta shange ngaho. 

LEAVE A REPLY

Please enter your comment!
Please enter your name here