Nopefimbo lelunduluko longhalo yomhepo ovaNamibia otava dulu ku li longela eendja da wana

0
216

Komutoolinghundana

ONGWEDIVA – Risto Lwiinga, omunafaalama womoNamundindi omukunda womoshikandjohoololo shaGongo okwa teya olwishi lihapu neudo. Lwiinga omunafaalama  a tameka ku  kuna olwishi mepya laye pOnamundindi mo 2009. 

“Eteyo lange lotete ola eta oiimati iwa molwa omuloka muwa, nodula ya  landula ko 2010 eteyo lolwishi ola li linini vali shaashi odula inai loka nawa,” Lwiinga ta ti.

 Nande elunduluko longhalo yomhepo la etifa omiloka diha faafane,  ina sholola okwa twikila nokulonga olwishi momido ya lambafana  nomo 2012 eteyo ola ka nghundipala shi dulife omolwa outalala  nodula oya pauka kwa   toka. 

Momudo 2013 ina teya nandenande molwa oluteni ashike  2014, eteyo lolwishi mepya laLwiinga poNamundindi  ola eta oikunwa i hafifa ngaashi loshikando shotete 2009. Okwa lima mokandobe, oshinenga sheemeta 25 momutamo moule eemeta 10 a teya mo eeshako deekg 50 di li omulongo.

Efiku lowina la unganekwa koshitaimbelewa shoshiputudilonongelo shaUnam pOgongo moshitukulwa shaMusati, okwa shivwa ovanafaalama vomomikunda domoshitukulwa va kufe ombinga meteyo lolwishi  kooLwiinga. Omukwateli komesho woshitaimbelewa shaUNAM pOgongo moshitukulwa shaMusati, omundootola  Josef  Njunge okwa ti: “Efiku eli ola fimana mondjokonona yoprojeka The Namibia-Japan Rice and Mahangu Project ya futilwa i longe eedula nhano okulonga ovanafaalama va tameke ku lima olwishi oshe li holola otali wapalele moitukulwa ei. 

Epangelo laJapana ola longikida ovanawino va kwafele mokulonga olwishi hali twikwa momeva, ihali pula oshinenga shakula, ilo oilonga ihapu”. 

Ovanafaalama ve dule 100 va dja komikunda da yooloka ngaashi kOshiteyatemo kOkalongo, kOhaingu moshitukulwa shaHangwena, kOnkani moshitukulwa shaMusati, ova deulwa okulonga olwishi ,nande neudo ovanafaalama 80 aveke va lima olwishi. 

Ovalimimapya ova pewa omauyelele nghee omunepya keshe ta dulu ku hovakanifa eembuto dolwishi noilya  moshinenga shimwe, opo omunafaalama a dule ku likola shimwe shomoikunwa ngee oku na omuloka ota dulu ku lya olwishi ngee oku na oluteni ota dulu ku teya oilya. 

Moikando ya dja ko, oUNAM oya pukulula ovalimimapya nghee ve na ku longekida edu, eembuto, epashukilo loimeno, okutala omaudjuu haa dulu ku shakenekwa kovanamapya fiyo oikunwa ya fika pondodo yeteyo.

Ongee ovanafaalama otava teelelwa va kwatafane noshitaimbelewa shaUNAM poGongo va pewe ouyelele.

LEAVE A REPLY

Please enter your comment!
Please enter your name here