Onyalo nounye nayo oya imba eteyo liwa neudo

0
227

Nonando okwa li shili ku na oluteni, okapuka nomalindilindi oo a eta opo eteyo noneudo li kale la nghundipala, ounye nonyalo oi li yoo imwe yomoi etifi yeteyo ina li lixwa po.

Eshi ota shi talikila komikunda dihapu, oko ovanhu ve na omaumbo a shaama ndele vamwe ova mona mo ngaho momapya avo, voo vamwe ina na va mona mo sha. 

Ashike ngee owa tale koinenga oyo ya limwa momapya oo, omunhu oto mono kutya omapya amwe kakwa li a limwa a pwa ko. Nokuli vamwe ova lima ashike va dingilila omaumbo. 

Hano ngeenge owa lima ashike polukutu leumbo, ino teelela umone eteyo lili nawa.

Omukulu wonale okwa tile omukaa wekulonga oshoma, ondjala yekulonga omupetuko, yee Hashiti sheku nyekele ohala, oho ende po to fifila. Sha hala kutya, omudo woneudo nau tu longe kutya, nande nee omuloka ou tameke wa fa peni, ina tu sholola. 

Natu lime ashike, pamwe hatu limo sha ngaho. 

Pamwe efiku limwe atushe hatu ka fa omusamane Pinehas Nambandi wokomukunda Oshamakaka moshitukulwa shaShikoto, oo oye dingi mokulonga omahangu.

Omupopi wOshindonga oha ti “waakambadhala ku sindi”. Eshi osho oshikando shotete tate Nambandi ta mono epapa latya ngaha. 

Odula tai ya mbela olye te li findana po? Hano oku longa noudiinini ita ku ku pe ashike oipalwifa ya wana noku ku imba opo uha kale keshe fiku wa tala koshipala shepangelo opo u pewe omakwafo, ashike ota shi ku pefa yoo efimano momudingonoko woye, hano momukunda weni, nomoshilongo ashishe ngaashi tatekulu Nambandi eshiningilwa. 

Osha yela kutya ope na ashike ovashiinda ile ovanhu vomomukunda umwe na tate Nambandi ovo ina va mona eteyo li li nawa, tashi dulika nokuli va ka kale va tala kepangelo opo va mone omakwafo oikulya, omanga mushiinda shavo a longa nokwa talika ko onga omulongi womahangu dingi moshilongo. 

Hano natu li longeni oku longa twa manamo. 

Ohaku tiwa omudo nongola. 

Hano omunhu kushi kutya momudo wonhumba odula ota i ka kala ya fa peni, hano nande okudje odula i nini ile ya kula shifike peni, ina tu shololeni, natu ninge ni ngaho fiyo efimbo lomuloka ta li puko. 

Ngee odula oyo ina ku lokwa, opuo ngaho nee. Epangelo nomahangano oo ena oku tu kwafela otava ka fya ounye shaashi inatu li tula mo mokulonga oipalwifa.

Omunhu ou hole okulonga ndele noto pewa ekwafo ovanhu oveshi kutya owa kendabalele, nekwafo to mono owe li lilongela.

Okulonga omahangu noilikolomwa ikwao yomomapya ota ku kwafa yoo opo ku tu etele oiuyemo ikwao momaumbo etu nokutu kwafela moipumbiwa yefiku nefiku meumbo.

Sha hala kutya, ngee owa longa omahangu nomakunde, omapungu ile eefukwa da wana, oto dulu oku landifa po imwe, u futile ounona novaneumbo loye ofikola, okulanda oidjalomwa nosho tuu imwe ya wedwa po. 

Ashike opena nee vamwe hava landifa po oilya yavo ndele tava ka tala vali kepangelo liva yambidide meendja, oshinima osho sha puka neenghono. 

Omunhu ngee ota landifa omahangu, na kale eshi kutya okwa fiila po ovaneumbo laye oilya ya wana, okufika kodula ta i uya. Ovanhu nghee veli oha va dulu oku kala noilya momaanda nande oule weedula mbali ile nhatu.

Oshinima shikwao, okulonga noudiinini ota ku kwafa opo epangelo lihange oilalakanenwa imwe oyo ita i dulu oku hangwa ngeenge ovakwashiwana kave na oipalwifa. Hano ponhele yokutunga oshipangelo ile ofikola pomukunda ile moshitukulwahoololo shoye, epangelo ota li longifa po oshimaliwa osho oku landa nokutukula oikulya yoshikukuta.  

Eheno shili ope na ngaho vahapu ovo ina va dula oku li likolela mo sha momapya avo nonande va longa noudiinini. 

Osho oshinima shi lili nota shi udika ko. 

Oshitwa shopokati oshosho kutya Shiyelekela okwa dipaa ondjaba nekuma. Natu longeni ina tu sholola, pefimbo eli tuli mulo onghalo yomhepo, yomutenya noyodula kai pu oku tengeneka omolwa endjeno lewangadjo. Hano, omudo nongola. 

LEAVE A REPLY

Please enter your comment!
Please enter your name here