Oshitopolwalongo Ohangwena shaningi omauliko gomaithano

0
184

KuClemence Tashaya

EENHANA Shisande Nghinyengulwa Toivo gwoposasiona yopolisi pOhangwena okwa kumagidha aagundjuka naalongwa yosikola opo ya kale aalanduli naasimaneki yompango. Ekumagidho ndika okwe li ningi a dhimbulutha aagundjuka kutya iiningwanima yomiyonena moshigwana oya vuka noonkondo.Shisande Nghinyenulwa okwa ningi ekumagidho ndika pethimbo lyomauliko gomaithano gokomumvo ngoka haga ningwa koshitopolwa shElongo mOhangwena. Omauliko ngaka ogaliko oshiwike shayi. Ogali ga kalwa kiikondo ya yooloka yepangelo noshowo komahangano gopaumwene niiputudhilo yopombanda naambyoka yuungomba.

Shisande Nghinyengulwa okwa lombwele aagundjuka kutya etanga lyopolisi nalyo oshitopolwa shimwe sheithano shoka wo shina omuawanawa gafa ashike ngoka haga adhika miilonga yilwe moshilongo ashihe. Nghinyengulwa okwa lombwele aalongwa kutya shoka omupolisi opo ta tameke metanga ena okukala nasho osho eidhidhimiko oshoka okuna okupitila moondondo adhihe dhiilonga omanga inaa yelwa okuya pombanda. Okwa popi ndhika oshoka oyendji yomaagundjuka mboka haya joina opolisi oha ye yi thigipo mbala konima ashike yomimvo omishona molwashoka oye wete okuyelwa kwa kalako. Okwa ti oshikondo shopolisi ngaashi ashike iikondo iikwawo ihashi kutu aantu miilonga mboka yena omahokololo gomiyonena komadhina gawo.

Omupopiliko gwomauliko gomaithano gaHangwena 2014 Lydia Ndimulunde okwa ti elalakano lyomauliko ngaka olyo okupa aanasikola yongashingeyi  ompito okuninga omakwatathano niikondo yepangelo noshowo mbyoka yopaumwene, oshowo okuya ulukila oondjila dhayooloka dhomaithano ndhoka taya vulu oku ilongela miiputudhilo yayooloka moshilongo. Omauliko ngaka ga kala nokuningwa uule womimvo hetatu ngashingeyi ohaga gandja uuyelele kaalongwa kombinga yomaithano  noompito dhokumona iilonga unene kwaamboka ya mana ograde 10 noshowo 12.

“Otwa hala okupandula ayehe mboka ya holokele okuulika iikondo yawo niimpungulonga mbyoka yili miikondo mbyo. Onkene otwa kambadhala okweeta pamwe aauliki yomaithano naalongwa opo ya topolelathane uuyelele kombinga yaashoka sha pumbiwa opo omulongwa a landule iilonga yontumba niilongwa yini omulongwa ena oku ilonga opo a vule okutaambelwa mokwiilongela oshimpungulonga shoka,” osho Ndimulunde a fatulula.

 “Ngele owa hala okuninga omuinginia gwoomina nenge omunawino miikwamina nosho tuu, nena oto vulu oku ilongela shika moshiputudhilo sha Namibia Institute of Mining and Technology [NIMT] ngaashi shi li mpaka,” osho omukuluntusikola gwa NIMT pOshomeya, Matthews Jason Elago a ti.

Omulukuntusikola gwa NIMT okwa dhimbulutha aalongwa kutya oku ilonga elongo lyopaungomba otashi ku pe uunongo wiilonga yiikaha, mbyoka tayi ku zaleke opo wu kale to longo iilonga yontumba.

 “Oshiholelwa oshiwanawa ooshoka shokuninga iipilangi noosikopa ngaashi hashi longwa moshiputudhilo shoka. Iipoleki nenge ikwasikopa momagumbo oya longwa sha yooloka ngashingeyi naashika otashi ulike kutya omuntu oto vulu okukala neithano ndika lyokulonga niiti nenge niipilangi,’ osho a ti. Okwa tsikile ati onkalo yiilonga yiikaha miimpungu yimwe nayo oya fa ashike ndjoka yokulonga niipilangi.

Omahangano ge vule pomulongo oga li ga ulike iimpungulonga yago mwa kwatelwa nOshikondo shegameno, Okommissi yokukondjitha Uulingilingi, Oshikondo shAaniilonga nonkalonawa oshowo omahangano gopaumwene gaza monooli yoshilongo.

LEAVE A REPLY

Please enter your comment!
Please enter your name here