Ya sindana moku matuka omarathono

0
207

Komutoolinkundana

WINDHOEK – Uudhano wokutondoka oshinano oshile mboka wa lukilwa omukokoliperesidende, hawu ithanwa Dr Sam Nujoma  Half Marathon owa sindanwapo kaatondoki yiinano mbyoka yaali. Kombinga yaatondoki aalumentu, Uveni-Nawa Kuugongelwa oye a thigile ayehe nokwa sindanapo oodola omayovi 10 000 ngoka ga li ga tulwa pongalo okukuthwapo kwaangoka ha tondokelele. Omanga Lavinia Haitope kali nando onomukondjithi gumwe moshimpungu shaakiintu nongeyi okwa sindana pwaana nando omukiintu eli popepi naye nokwi ilikolele ngaaka oshipandi shoodola omayovi 10 000. 

Uudhano mboka wa li wa tondokwa Osoondaha owa matukwa kaatondoki oyendji yamwe oya za kiilongo yopondje yAfrica.

Kuugongelwa okwa sindana mongundu yaalumentu ye Haitope ta vena moshitopolwa shaakiintu.Aatondoki yomegumbo naamboka yaza kiilongo yilwe oya matuka momapandaanda ga Venduka ongula ya talala yOsoondaha ya ziko, oku kondjela ondjambi yopombanda ndjoka ya pewa omusindani kokutya oodola omayovi 10 000.

Uudhano woshinano shookilometa 21 owa hili aatondoki mboka yamwe yomuyo ya kuthombinga ya za ko Netherlanda nokoSpania, naambaka oya ulike kutya sikulimwe otaya ka ya nondjambi ndjoka hayi kondjelwa puudhano mbuka ngele aaNamibia itaya kotoka. 

Aatondoki aakwiilongo mbaka oya li mokati kaatondoki mboka ya landula aasindani sho ya thiki pokapale koHockey ka Doc Jubber mOlympia.

Kuugongelwa ngoka a li a nyanyukwa nomoshipala okwa ti okwa li iilongekidhila ethigathno ndika sho a kala ta idheula uule woomwedhi mbali dha piti, a ti okwa li uuvite nawa sho ta matuka. ‘ Onda li nda taalela omashongo ogendji nena ndele onda li nde giilongekidhila nawa na onda tondoka nuudhiginini nokusindana ngeyi . Esindano ndika olyo eilongekidho lyandje lyuudhano wokumatuka wa Old Mutual Victory Race,’ osho a ti.

Haitope nando okwa li a nyanyukwa kesindano ndika okwa uuvite uupongo oshoka okwa matuka oye awike molwashoka pethimbo lyethigathano okwa li kuna uutalala uunene, onkene aakondjithi ye okuwete ya fa ya hunyamekwa kuutalala nongeyi oye mu ethele opo a sindane nokwaana eshongo lyolelalela. “Ngame onda tondoka ongame awike nena, oshoka kandali nomukondjithi nenge naakondjithi, ndele onkalo yombepo oya li ombwinayi oya li unene ya talala shimwe to nyengwa. Pethimbo ndika otandi taalele owala kuudhano wethigathano lya landulako lyOld Mutual Victory Race ndyoka tali kala kOshakati.

Ehangano lyoongodhi dhopeke lyaMobile Telecommunications Limited (MTC) olyo lya li lya kwashilipaleke uudhano mbuka noodola N$170 000, omanga Coca-Cola Bottling Company oye a gandja omeya niinuwa mbyoka ya nuwa kaatondoki.

LEAVE A REPLY

Please enter your comment!
Please enter your name here