Aakwanegongalo yomOshitayi ina ya hala Omusita

0
257

KuLoide Jason 

OSHITAYI – Omusitagongalo ngoka a langekwa megongalo Oshitayi oomvula mbali dha ziko, ina halika mo megongalo moka, kaakwanegongalo mboka anuwa ya hala omusita omukulu oye a galuke.

Omusita ngoka a landulwa ku pastoli Lameck Nambahu oye Simon Iitula ngoka a li keilongo moshiputudhilo shaasitagongalo naateolohi sha Paulinum moVenduka omimvo ndhoka.

Nonando Pastoli Nambahu okuli mo ashike megongalo pamulandu gwongeleka, aakwanegongalo anuwa oye mu totele oohapu oshoka oya hala omusita gwawo ngoka omukulu a galulwe omanga Nambahu ye a tembudhwa mo, sho oshinima shoka okuwetike kutya itashi ka longa ngiika nuupu.

Elelogongalo Oshitayi olyali lya shanga ombapila kuyele omumvo ngoka Nambahu a tumwa megongalo Oshitayi kutya, elelogongalo olya dhiladhila noku tala oshinima shoka muule, nolya adha etokolo kutya itali vulu okutaamba Omusita Nambahu omolwa omatompelo ogendji omawanawa.

“Egongalo Oshitayi kali na egumbo lili monkalo ombwanawa, egumbo olya kulupa nolya pumbwa eyopaleko, otali loko nayi, na oli na omisa, okutumbula po owala yimweyimwe,” ombapila ya ti ndjoka yi li momake gaKundana.

Ombapila oya popya woo kutya egongalo ita li vulu okuninga eyopaleko lyegumbo lyegongalo oshoka oli ipyakidhila noku manitha etungo lyongeleka ompe nosho wo okutula mo iipundi. Aakwanegongalo nee mbaka otaa ti omusita ngashingeyi ota longitha iimaliwa yegongalo omapuko shoka inaye shi nyanyukilwa.

“Omusita ota pula okapakapaka omanga tse aakwanegongalo twe mu landela nale ombasikela, okapakapaka oka shike,” omukwanegongalo a ti.

Ashike omusita okwa ti iitayingeleka nosho wo omagumbo ngoka hape omayakulogopambepo oge lyaathane kokule ashike okuhinga ombasikela kehe esiku opuna ompito oku kala inaa gwanitha po iilonga yongeleka pethimbo.

“Elalakano lyandje okupula okapakapaka oshoka okena ombiliha ko ohaka endelele oku fala ndje pomahala mpoka tandi ka gandja omayakulo gopambepo. Ondina oongundu ne dhomalwiimbo ndhoka dhili pomahala ga yooloka  ngoka ge lyaathane kokule,” Nambahu a ti.

Aakwanegongalo oya ti woo kutya omayakulo gaakulupe iha ga ningwa ngaashi ongeleka ye shi igilila  ashike omusita kena osheenditho shili pamuthika gwokumweenditha oku adha pomahala agehe gehe nonando okwe shi kambadhala.

Ombapila yili momake ga Kundana oya ulike wo kutya anuwa omusita okwa tidha omudhigininigwiiniwe , ashike omusita okwa ti omudhigininigwiiniwe ngoka aadha megongalo moka omo eli sigo oshiwike sha ziko sho Kundana a talelepo oshinyangagongalo.

“Omathaneko getu ogo ngaka kutya omusita nguka ita vulu okulela egongalo Oshitayi, onkee otatu indile mu tu galulile Omusita  Simon Iitula,” aaakwanegongalo ya indile.

LEAVE A REPLY

Please enter your comment!
Please enter your name here