BA ita pewa manga oshishani sholiha omolwa enyenyeto lya African Stars

0
217

KuOtniel Hembapu

WINDHOEK – Ospana yo Black Africa ndjoka ya li yi na okupewa oshishani ongo enyakwa lyoliha  yo MTC Namibia Premier League (NPL) nuumvo ota yi tegelele natango okathimbo.

BA okwa li ena okupewa ekopi ongo enyakwa lyoliha yopombanda ya Namibia ehuliloshiwike lyayi konima sho a dhana shi thike pamwe nospana yo Tura Magic Olyomakaya ga yi nongeyi oya mono iitsa yili 46 noku kala oyo yili pombanda yomusholondondo gwoliha ya Namibia.

Ihe ezaleko lyoombandi dhuunyakwa woliha yo nuumvo olya kalekwa okathimbo oshoka ospana yo African Stars ka yi uvite ombili omolwa uudhano wayo nOrlando Pirates mboka inaa wu pitikwa wu dhanununwe auhe. Uudhano pokati koospana ndhika wali wa dhanwa muMaalitsa owa li inaawu manithwa molwashoka opwa li pwa holoka ondhima yolusheno momudhingoloko gwokapale ka Sam Nujoma moKatutura.

Ewiliko lyuudhano wetanga lyokoompadhi olya tokola kutya uudhano mboka owuna okudhanwa oshiwike shika uule ashike wethimbo lyoominute hetatu ndhoka dha li dha thigalako. Pethimbo mbuka wa dhanenwe, ospana yOrlando Pirates oyo ya li komeho nookoola 2-0.

Pethimbo ndika African Stars okuna iitsa 45 a landula ospana yo Black Africa konima yokudhenga ospana yoBlue Boys ookoola 3-0 Olyomakaya gayi. Ewiliko lyuudhano wetanga lyokoompadhi moshilongo olya ti oospana African Stars na Orlando Pirates nadhi dhaneko ominute hetatu dhuudhano wadho ndhoka dha li dha hupako. Ndele African Stars ota kondjitha opo uudhano mboka wu dhanwe oku za ketameko.

Ngele African Stars okwa sindana uudhano mbuka nena oye ta ningi enyakwa epe lyoliha ya Namibia, nenge ngele okwa dhana shi thike pamwe oye ishewe ta ningi enyakwa lyoliha molwashoka okuna ookoola odhindji okuyeleka naandhoka dhoBlack Africa.

Onzo moombelewa dhoNPL oya hokolola kutya ewiliko lyoliha olya gongalele mEtitano oshiwike shayi no lya  tokola kutya uudhano mboka nawu dhanununwe ashike uule wethimbo lyominute hetatu ndhoka dha li dha hupako wo mbuka nawu kale wa manithwa oku ya metine oshiwike shika.

Onzo oya ti iilyo yimwe yewiliko lyoliha oya loloka oshinima shika na oya hala oliha yi etwe pehulilo pena elongelokumwe lya African Stars nenge lyaapo.

“Pauyelele mboka ndina NPL okwa tokola kutya ngele African Stars ina dhenga Pirates mominute hetatu ndhoka dha thigalako nena Black Africa oye ta ka pewa oombandi dhuunyakwa woliha yonuumvo,” Onzo osho ya koleke.

Momaudhano galwe ospana yo Rundu Chiefs oya hupu oku ya pevi koliha yokofirst division sho dhenge ospana yo Tigers nookola 2-0 Olyomakaya omanga ndjjoka yo Blue Boys oya shuna koliha yokofirst division. Ihe natango Rundu Chiefs ota kala ashike moNPL ngele okwa sindana omaudhano ge agehe haga ithanwa play-offs taga dhanenwa moShomeya Olyomakaya ndjika.Omaudhano ngaka ogena oospana dhokiitopolwa mbika North-Eastern Stream First Division, Benfica FC yaTsumeb; North-Western Stream First Division,Mighty Gunners yomOtjiwarongo; Southern Stream First Division,Rebels FC yomoWindhoek.. Oospana ashike dhili ndatu ndhoka tadhi zi muudhano mbuka tadhi yelwa oku ka dhana koliha yopombanfa omumvo tuuka. Oliha yomumvo 2014/2015 otayi kala noospana adhihe kumwe 16.

LEAVE A REPLY

Please enter your comment!
Please enter your name here