Epititho lyomiyalu dhongashingeyi kombinga yomahupilo

0
205

Oshilalakanenwa shoshinyolwa shoshiwike shika okugandja uuyelele wu li pethimbo kombinga yomiyalu dhongashingeyi dhi nasha nomahupilo ndhoka dha pitithwa kolutu lwOmiyalu lwaNamibia nenge Namibia Statistics Agency[NSA].

Omayalulo ngaka oga li ga piti oshiwike shayi go ogo etengeneko mwaalu gwiilongomwa ayihe ya longwa moshilongo pethimbo lyoshikako shotango sho 2014, oshowo omiyalu dhelongitho  nenge oondando longitho momwedhi gwayi  osho nee omiyalu dhomalando nenge dhengeshefo dhomwedhi Apilili 2014.

Okwa ndhindhilikwa kutya omahupilo ga Namibia oga ulike eyo komeho tali ende kashona, konyala ashike noperesenda 1,6 moshikako shotango sha 2014. 

Ihe eyokomeho ndika ehwepo okuyeleka neshunomonima mekoko lyomahupilo ndyoka lya li lya ndhindhilikwa oshikako shotango omumvo 2013, lyo eyo monima ndika olya li lyoopresenda 3,8. Shoka tashi gandja omaipulo ooshoka kutya uunkundi meyokomeho lyomahupilo olili kohi yoshilalakanenwa shomathaneko omatine geyokomeho lyopashigwana nenge NPD 4. Iikondo mbyoka ya humitha komeho ekoko lyomahupilo moshikako shotango shonuumvo oyo omatungo, okulanditha pa holosaila noshowo okulanditha kwa kwaalukehe, iiyenditho nomakwatathano.

Eyokomeho momatungo okwa tengenekwa lya londo pombanda nooperesenda 22 pethimbo ndyoka omiyalu dha gongelwa.Naashika osha etwa  kiilonga yomatungo ogendji gepangelo nenge goshigwana. Iilonga yomatungo moshikondo shepangelo otaku tengenekwa ya yi pombanda nooperesenda 29,4.

Oshiuliki shoondando dhaalandi naalongithi yiinima osha ulike kutya engushuluko olya yi pombanda momwedhi gwayi sigo opooperesenda 6,1 okuza pooperesenda 5,9 omwedhi gwayi omanga ondjele yengushuluko yomumvo gwayi pethimb olyo tuu ndika oya li ya thikama pooperesenda 5,8. Eyo pombanda moondando dhaalandi olya etwa koondando dhomahini, ehini noshowo omayi ongo oshitopolwa shiikulya noshowo shiikunwa yaana oakoholi.

Nonando ondjele yengushuluko ya Mai oya ya pombanda kashona, ondjele yengushuluko yakwalukehe momahupilo goshilongo kayi li unene pombanda na itayi talika ko ya nika uupyakadhi komahupilo goshilongo sigo oompaka.

Kombinga yiipindi okuza nokuya pondje epitililo mokulongitha oshimaliwa  okulanda iipumbiwa pondje olya shuna pevi sigo opoobiliona dhoodola 2.2 muApilili nuumvo , okuza poodola oobiliona 4,1  muMaalitsa. Ihe omwaalu nguka omunene lwaali okuyeleka noodola obiliona yimwe ndjoka ya li ya ndhindhilikwa pethimbo lya faathana omumvo gwayi.Ngaashi sha ulikwa momushangwa nguka elongitho lyoshimaliwa oku landa iinima pondje olili eshongo enene, oshoka shika otashi ulike kutya oshilongo otashi etamo iilandomwa oyindji okuyeleka nokulanditha iilandithomwa oyindji kiilongo yopondje. Shika otashi ulike kutya oshilongo oshina ohokwe onene yoku etamo iilandomwa unene tuu mbyoka yiilongitho. 

Opo ekoko momahupilo neyokomeho muuhupilo moshilongo li kale lyaandjagana no itaali hunyama, oshasimana opo oshilongo shi kale tashi tumine iilongomwa oyindji pondje yoshilongo opo shika shi etemo iimaliwa oyindji oku kuthapo elondo lyomwaalu gwiimaliwa mbyoka tayi zi moshilongo okufutila iiyetwamo yetu. Epititho lyomiyalu ndhika ota li ulike kutya NSA ota tsikile okugwanithapo iilonga ye yoku gandja omiyalu dha pumbiwa dho ishewe odhili pethimbo opo ndhika dhi longithwe kaa ningi yomathaneko moshilongo.

Imonena okopi yoye yomiyalu ndhika pepandja lyetu lyo internet  www.nsa.org.na.

LEAVE A REPLY

Please enter your comment!
Please enter your name here