Kankoshi natango onkene ta kwathele oshigwana

0
152

KuMaria Namupala

ONYAANYA – Konima ashike yoomwedhi ooshona sho aakalimo yomoshikandjohogololo Onyaanya ya kala taya nyenyeta ompumbwe yomeya mOnyaanya ngaashingeyi oya monenwa eyamukulo ewanawa na otali hokitha.

Kansela gwa Nyaanya okwa ti oku uvite ombili okuyakula oshigwana she, ta uvaneke ta ka kala a gandja omakwathelo goludhi kehe.  Okwa tseyitha kutya kehe oshitopolwa sha ningi ethimbo tashi pula uupomba womeya naya tseye kutya omeya oga thika. 

“ Otwa kala tuna aakwashigwana yetu taya mono iihuna molwa ompumbwe yomeya ashike ngaashingeyi , oyendji mboka ya kala taya nyenyeta ashike pethimbo ndino omapulo gawo oga mona omayamukulo na oya manguluka okulongitha omeya ngaaka”Kankoshi ta ti.

Ndhika okwe dhi popi omasiku ga ziko sho iilyo yo ka komitiye kelile po ehumokomeho momikunda ano CDC mOshikandjohogololo Onyaanya oyali ya gongala opo yi ikunde ehumokomeho, yo ya tale mpoka yeshi pondola oku yambula po oshitopolwa shawo.

Kankoshi okwa holola kutya oyi ipyakidhila okuhedhitha omauwanawa koshigwana,  ta  ulike kutya  aakwashigwana mboka ya gama pOkankete kaNeema, Ombundu, Okatope oshowo kOnampengu oombinga adhihe ndhoka odha mona omeya ngaashingeyi. 

Kankoshi ta holola kutya opuna ashike omunino gomeya ngoka gwaza koHalleluya-Oshikondiilongo ogo inaa gupwa nonande ogwa tulwa nale miilonga ta uvaneke kutya otagu ka kala gwa pwa muule wethimbo efupi lela.

Kansela okwa  ti otaya ka gandja olusheno kosikola Okahanya ndjono ya kala ethimbo nuule kaa yina olusheno, otapu ka ningwa woo okapate kuuka kosikola oyo tuu ndjoka opo aakwashigwana ya kale taya ende ya manguluka. 

“ Otwa adha konyala omalalakano ogendji na otatu uvaneke tatu tsikile oku hedhitha uuwanawa koshigwana noku kwathela aagundjuka oku totapo oompito dhiilonga ku yoyene,otatu kambadhala opo kehe omukwashigwana eli moshikandjohogololo opo a kale a tyapula uuwanawa mboka tawu holokapo”, Kankoshi ta gwedhako.

Kankoshi okwa indile ayehe mboka ya patululilwa omeya opo ye ga kwate nokulongitha nawa. Te ya tseyithile kutya uuna ya pumbwa ekwatho naya kale ya thika kombelewa ya kansela yo ya mone omakwatho ngoka taya pumbwa.

LEAVE A REPLY

Please enter your comment!
Please enter your name here