Mushiinda a yaha omunona okusa

1
437
Shipaxu Nghiinomenwa ngoka a li nooKambambi megumbo sho a yahwa komukulupe Shaanika

KuLoide Jason

ONGWEDIVA – Omanga uunona uukwawo tawu tyapula esiku lyokanona kaAfrika,  okanona kokakadhona komivo 17 komomukunda Okandi mOshitukulwahogololo shaEtayi oka hulitha sho anuwa ka dhipagwa kumushiinda gwomivo 67, edhipago lyiipundjamenye.

Shika osha ningwa konima ashike sho omukulupe nguno  anuwa a landa iikuti yomushasho puukefe wopomukunda gwawo, taku fekelwa kutya okwe yi landa nelalakano okudhipaga, nenge okumonitha okanona haka oshiponga. Omukulupe gwedhina Josef Shaanika ngoka ta tamanekelwa oshiningwanima shika oshikumithi notashi halutha okwa holoka nale mompangulilo yaMangestalata mOshakati oshiwike shika.

Nakusa oye Petrina Kambambi ngoka a li mondondo 9 posikola Oshivanda Shanghatanga yili moshikandjohogololo shaEtayi moshitopolwa shaMusati.

Shiikololela komulombo ngoka gwa gandjwa ku gumwe gomoohekulu mboka anuwa ya tondoka onkugo, Kambambi nokakadhona kamwe kaandjawo onkee ngaa ya shilwa taya tidhwa komufekelwa sigo teya kwata eteya  dhengagula nondhimbo sha landula sho aniwa ya dhikula opala pokampangwa kenkolo lye.

Okwa hokololwa woo  kutya uunona owa ninga onkambadhala oku holama omutenya aguhe noshowo oku shunitha po opala ndjoka ashike  Shaanika  okwe ya landula sigo okaandjawo hoka aka yahela Kambambi mondunda yokulala moka a adhika a matukile aka holame.

“Ngaye tate Josef sho eya megumbo omo aadha ndje, okwe ya ta pula ndje kutya ‘ngu eli megumbo olye?’ Ngame onda ti ongaye. Ethimbo ndyoka, Petrina namukwawo oya li ya holama. Petrina okwa monika nee kokamatyona kaandja tate Josef hoka ka kala ka keelela peelo lyegumbo ke na ekatana omanga tate Josef ye mwene e li megumbo e na ondjembo. Okamatyona oka lombwele tate Josef kutya omuntu gumwe oku li kokaiyogelo. Nakusa sho a uvu ngawo okwa matukile mondunda yokulala, ashike tate Josef  okwe mu landula e ta umbu ondjembo mondunda moka.

“Sho emu yaha okwa yi kaandjawo eta ka dhengela opolisi,” Shipaxu Nghiinomenwa mumwainagona gwaNakusa Kambambi a lombwele Kundana .

“Sho eya dhenge, ooPetrina ondeya lombwela kutya na ya shune po oshiti shoka na oyeshi ningi. Katu shi nee kutya oshikwashike iishewe shoka she mu fala ponkatu mpoka opo eke ye nondjembo, shaashi okwa adhika eya dhenga nale sho oshiti osha adhika sha shunwa po. Mbela pamwe ka li ewete opala ye ya dhikwa po nawa,” osho ati.

Hekulu ngoka ina tumbulwa kedhina okwati kutya Kambambi konima yokuyahwa okwa li ashike eli nawa tapopi nawa, ashike konima yethimbo shaashi opolisi inayi thika mbala okwa ka tameka ta kanitha oonkondo oshoka okwa li a tika ombinzi noonkondo.

Hekulu tuu oye ngoka okwa ti kutya eso lyaKambambi ota li uvitha nayi oshoka Shaanika onkene a uhala ta tidha aanona mbaka shoka sha li shi iwetikile nokiipala yoompadhi dhe hoka kwali a toshoka, ano a ninga iilalo oshoka okwa matuka ethimbo ele sho a uhala ta tidhagulwa. Aanona megumbo oya li ashike haya kalamo na yinakulu ngoka aniwa e li moombete  moshipangelo mOshakati moka a kalamo ethimbo  ele, moka a li ngaa a falwa mo komufekelwa ngoka a kala a talika ko onga omushiinda omwaanawa. Anuwa oye ngaa akala ha sile uunona mbuka oshimpwiyu sho yinakulu e li moombete.

“Shika oshikumithi noonkondo shaashi ka twa li ngaa ngeno tuna uushiinda uuwinayi. Otwa kala tuna ombili,” yina ya Kambambi ngoka a kala  kOtjiwarongo ta lombwele Kundana.

1 COMMENT

  1. wuh, otashi kumitha lela noonkondo. iihuna yili mOmusati region. R.I.P Petrina, and ma condolence to the entire family

LEAVE A REPLY

Please enter your comment!
Please enter your name here