Natse otwa hala tu kale aaleli yokomongula

0
269

KuMaria Namupala

ONAYENA – Elongo olyo oshipatululo shonkalamwenyo yomunona kehe, na oshili sha simana opo uunona wu kale wa mona elongo pethimbo lyoomvula ooshona lela.

Given hope pre- school oyo yimwe yomiikunino mbyono tayi kwathele uunona ngele tashiya pelongo. Okinda ndjika oya totwapo mo 2013 mewiliko lya Hileni Namwandi. Oyili ashike momudhingoloko gwaNayena.

Omukuluntu gosikola ndjika okwa ti ohaya longo uunona wuli omilongo hamano nakamwe (61), oku tameka poomwedhi 6 sigo oomvula hamano (6). Ohaya sile uunona mbono aakuluntu yawo haya yi kiilonga oshimpwiyu sigo ethimbo lyawo lyoku galuka kiilonga lya thiki.

Namwandi okwa ti ye mwene keshi omukalimo gomOnayena okwali ashike eyamo ha longo osikola puyimwe yomooskola dhopaumwene mOnayena . “ Onda kala ndina edhiladhilo opo ando ndi totepo okinda yandje mwene molwaasho nda tala noku mona ompumbwe yookinda mOnayena , onda kala nda nyengwa kehala mpoka tandi kala handi longele okinda yandje ndjika, ondali nda tokola ndi ende momagumbo tandi tala onkalo noku tala moka muna uunona”, ta ti ngaaka.

Okwa ti okwali a mono kutya momagumbo omuna uunona owundji mbono wa adha okuya kokinda. Okwali a popi na kansela goshikandjohogololo Onayena, Max Nekongo, opo a tale ngele te mu monene ehala mono ta kala ta longele osikola ye ndjika, tati  kansela okwali e mupe po limwe lyomomahala ngoka ihaa ga longelwasha opo a kale ta longelemo manga ta mono ehala lye.

Given hope okuna aalongi yeli ya tatu (3) mbono haya longo oondondo dha yoolokathana. Beata Nendongo oha longo o day care,Martin Amunwe oshikunino (kindergarten) omanga Stacky Elina Niitembu ha longo o pre – primary ye ta kwathelwa komukuluntu gwe.

Namwandi okwati kombinga yofuto aavali yuunona oyo yene haya futu na okwati ihashi mupe nande uudhigu oshoka konyala ayehe ohaya futu pethimbo. Pokinda mpaka okunapo woo uunona wuli uheyali (7) , mboka aavali itaya vulu oku futa na ohewu futile yemwene. Uunona mbuno okwe wu hogolola momagumbo mboka itaa wu vulu okwii kwathela wowene.

“Otandi  tsikile okulonga uunona ngaashi tashi vulika oshoka owo oongudhi dhokomongula. ‘’Elongo olyo oshipatululo shonkalamwenyo yomuntu kehe, ote kambadhala ndi itulamo ndi yambulepo oonkalamwenyo dhuunona wetweni okupitila melongo’’, tati nga.

Gumwe gomaalongi pokinda ndjika Beata Nendongo okwati kashali oshipu petameko okulonga nuunona ashike ngashingeyi okwa igilila nontseyo ye yoku kala nuunona oya huma komeho. 

Namwandi okwa indile aavali mboka yena uunona wuli momagumbo opo ye wu ete kokinda wo wuye wu longwe pamwe nayakwawo.

LEAVE A REPLY

Please enter your comment!
Please enter your name here