Okamati ko 23 mekwatonghonga lomukulupe weedula 60

0
156

KuHelvy Shaanika 

ONGWEDIVA – Omukulupe weedula 60, mOshitukulwa shaShikoto okwa ninga umwe womihakanwa yominyonena dekwatonghonga odo da hanya moshitukulwa omo. 

Eshi osha ningilwa momukunda Indongo yaKeelu oshivike shadjako. 

Otaku hokololwa kutya omukulupe ou, okwa li vati a nangala oufiku eshi omumati weedula 23, eli teela mondunda yaye, te mu ningile omatilifo opo a hakuwe, nokuya naye moixulo shihe li pahalo laye.  Oo ta fekelewa okulonga oikulumanene ei, oku li nale konima yekumba. 

Moufiku omo tuu omo, omukainhu weedula 44, okwa patululila omuholike waye weedula 42 oshibofa natango shekwatonghonga eshi vati a ya naye moixulo shiheli pahalo laye. Eshi osha ningwa konima eshi ava vavali va tanguna nokulwila pokandingosho keli kolukanda laSaam Staan moTsumeb. 

Konima eshi va lwila pokandingosho, ava vavali ova ya keumbo, oko omulumenhu vati a ka kwata omukainhu waye onghonga noku mulongifa oilonga ya nyata ihe fi yopaunhu, oyo ita i dulu nokunyanyangidwa. 

Oshibofa shonghonga shonomola Cr. 37/06/20014, osha patululilwa omulumenhu ou. 

Eshi osha ningwa ashike moshivike omo okaana keedula heyali nako vati ka kwatwa onghonga kokamatyona keedula 16, sha ningilwa momukunda Okandjeke  popepi nOshivelo. Okamati oko ta ka fekelelwa oka kwatwa po nale, nokaholoka momhangulilo yaMangestalata. 

Omukulunhu wopolifi mOshitukulwa shaShikoto Komishina Anna-Marie Nainda oo a koleka oimbuluma ei, okwa lombwela Kundana kutya omuvalu woimbuluma yekwatonghonga oyo ya lopotelwa opolifi moshitukulwa shaShikoto omafiku aa owa londa pombada neenghono oku yelakanifa nomafimbo a djako.

Komanda waShikoto ta ti moshito oha pa dulu oku pita nande oule womwedi ile shidule po ina va lopotelwa nande oshibofa shimwe shonghonga ashike oshivike sha djako ova lopotelwa oibofa aishe itatu.  

Nainda ta ti, ota shi dulika eshi sha etifwa keandjakanifo lomauyelele olo la ninga omafiku ta li ningwa kopolifi mOshitukulwa shaShikoto.

Ta ti monakudiwa, oibofa ihapu yekwatonghonga oha i kala ina i lopotelwa opolifi, molwaashi ovanhu kave na uyelele.

LEAVE A REPLY

Please enter your comment!
Please enter your name here