Omuyahi gokoKalongo mompangu oshiwike tashiya

0
387

KuLoide Jason

OMUTUNDUNGU – Omupopiliko gwopolisi momusati warrant officer Lineekela Shikongo okwa ti omufekelwa ngoka a yahele aantu niimuna kOkalongo otashi vulika ta holoka mompangu moshiwike shika.

Omuyahi nguka okwa tegelelwa a holoke mompangu yamangestrata  mOutapi shi nasha nonkambadhala yedhipago, noshipotha shekwatonkonga oshowo oshipotha shedhipago

“Ye mwene okuli natango moshipangelo shaShakati ashike onkalo ye oyili nawa na ota shivulika a holoke mompangu moshiwike shika. Shoka she mu ka litha moshipangelo ngashingeyi okatenda hoka keli mokugulu kwe oshoka otaku hokololwa kutya okwafa a teka okugulu kumwe,” Shikongo a lombwele Kundana. Oshiwike sha ziko  Kundana okwali a talele po Omutundungu naakalimo yomOmutundungu oya ti wo ka ye shi lela kutya oshike sha etitha omunamimvo 32 a yahe oku ehameka nokudhipaga aakwashigwana , oya ti nuumvo omutamanekwa nguka okwa li aniwa ta pula ombinzi ye ndjoka ya tika sho a tsilwe nombele kumukwawo puukamba opo tuu mpoka sho yali ya tamanana.

Rachel Salom yina ya nakutsa omutamanekwa nombele oomwedhi ndatu dha kapita okwa ti iikolokosha sho ya tameke aniwa omutamanekwa oye kwa li a hindi nokutsuwa nombele kumukwawo ngoka a li ta igamene.

“Nakutsuwa nombele ye okwali a popi anuwa kutya ye ombinzi ye itayi futwa pethimbo ndyoka ashike okwa hala ashike Timo yemwene ngoka aniwa a li e mu tsa,” Salom ati.

Salom okwa tsikile ko tati oya kala ashike ya itaala kutya ombinzi ye itayi futwa.

“Mu Mai nuumvo he yomutamanekwa ye oye ishewe mwene gwomukunda okwa li a tumako kaandjetu kutya aniwa omumati gwe okwa hala ombinzi ye na otwa tegelelwa tu ye kiihokolola,” Salom ta hokolola alulilwa.

Salom okwa ti sho nduno ya zi miihokolola moka oya li opo taa gongele iifuta yaantu ashike ngashingeyi omuyahi okwa ifuta yemwene sho a yaha oongombe dhaandjetu ndatu. “Ngame okwa li ndili megumbo ethimbo ndyoka ondjembo ya topa sho nduuvu  kutya ondjembo oya topa popepi onda tondoka okuya mondunda yokulala. Ka kwali ndishi kutya ondjembo oya topa poshigunda shandje sigo ta kushi,” Salom a lombwele Kundana. Salom okwa ti wo kutya omuyahi gwaantu okwa ya ha oongombe dhe ndatu noyo mushiinda yimwe.

“Ye mwene ngiika okwali ngaa ta kongo “Timo” oshoka opo ali paandjetu iikando iyali sho twa shiilile ongaku ye. Elago enene egumbo otwali twa adhika tweli pata ngeno omo ngaa eya megumbo etetu ehameke,” omukulupe osho ati.

Kakele koongombe ndhoka a ehameka omuyahi okwa ehameka woo omulumentu gwoomvula 28 ngoka a za koAngola eya oku kwathela yinakulu okuyungula po iilya polupale.

 Angula Sam okwali a yahwa komulungu gwopombanda nomokwaako kokokumoho eta tambulwa moshipangelo mOshikuku moka ali a lalekwamo konima yomasiku omashona.

Sam okwa ti okwa li a haluka noonkondo na okwa tila sigo ongashingeyi oshoka ina ya mona kutya omulumentu ngoka okwa ziilile peni na elalakano lye okwali lya shike.

Maantu mboka yeli ya heyali ya lemana omwakwatelwa ohonda yomuyahi ndjoka ena na yo okanona.

Okwa hokololwa kutya omuyahi okwa kala tashanga kointernet (Facebook) kutya oombwa tandi dhi yaha nena ndji.

“Josua Nandjembo longa iilonga yoye iiwinayi ntowele. Omuwete ndishi nda mwena, onda mwena handi kala tandi dhiladhila uugoya. Ongula ileni koosa dhandje etamu imbilendje eimbilo 303 mehangano,” osho ashanga ngawo.

Okwali wo a shanga kutya “oto weelele, anditi to yahitha oombwa dhopomukunda ndeloo”. Nonando aakalimo yomOmutundungu oye li ya haluthwa koshiningwanima shoka sha ningwa pomukunda gwawo, shika osha etitha woo omazimo gopaali pOmutundungu ga kale gena oluhodhi.

LEAVE A REPLY

Please enter your comment!
Please enter your name here