Queen Ree ota tsikile nonando pe na omashongo

0
236

KuClemence Tashaya

EENHANA – Omuhikingalo omupe Omunamibia ota tsikile nokuhika oongalo unene dhomufango gwoAccapella. Queen Ree ngaashi a tseyika nawa mondoolopa yaandjawo moRundu okwa pititha oalubuma ye ompe nenge ontiyali hayi ithanwa Nothing is impossible. 

Queen Ree okwa tamekele oku hika oongalo omumvo 2011 sho a li a pititha oalubuma yoongalo hetatu hayi ithanwa Tusetekenu kokutya na tu ukeni komeho, ndjika oya li ya tulwa mokati kooalubuma ndhoka dha li tadhi kuthombinga  megandjo lyomapapa lya NAMA. Moongalo dhomoalubuma ndjika  omwiimbi nguka ota kumike aaKriste ooyakwawo opo uke komeho nonando opwa fa pena omaudhigu taga nyengana.

Queen Ree okwa ti ota tsikile oku imba omusiki yo Accapella nonando sigo oompaka oondjimbo dhe ndhika ina dhi mu etela esindano lyasha sigo oompaka methigathano lyokomumvo lyo NAMA. Okwa ti nuumvo oongalo dhe dhomusiki yo Accapela odha li dha tulwa mongundu ndjoka opo dhi thigathanepo naandhoka dhe dhi fa dha imbwa kaahikingalo  yalwe, ihe ishewe nopompito ndjika ye ina faalela sha kegumbo okuza methigathano ndyoka.

Rebecca Armandu okwa itaala kutya omusiki ye oyi na etumwalaka noshowo oyi holike naashoka osha fala sigo oompoka kutya ohayi tulwa methigathano lyoNAMAS omumvo kehe nonando sigo oompaka ina yi sindana po yimwe yomoondjambi ndhoka hadhi gandjwa mpoka.

Okwa ti omusiki yo Accapella otayi vulu okutulwa mongundu yomusiki ndjoka hayi ithanwa ongo Social Gospel Music.

 “Ohandi imbi omusika yonkalathano yopambepo. Ngele owa pulakene oku imba kwandje oto koneke nenge oto ndhindhilike kutya oondjimbo dhandje odha yooloka koongalo dhaahikingalo yalwe. Ngame ohandi imbi kombinga yonkalamwenyo esiku kehe noku tanga Omuwa gwandje. Ogendji gomomaimbilo gandje otaga longo kombinga yonkalamwenyo noshowo kontseyo yonkalo yomuntu,” Queen Ree a hokolola.

Rebecca Armandu okwa valwa mo 28 Febuluali  1983,  nomusiki ye ohayi dhanwa miilonga yokutuma Omawi Mombepo ya Namibia Melaka lyoRukwangali, moka aapulakeni ye oyendji haya kala noku indila ya hikilwe oongalo ndhoka yo ye hole.

Queen Ree okwa ti eshongo ndyoka a taalela unene olina sha noku landitha oongalo dhe.

“Aahikingalo aaNamibia unene tuu aakiintu inamu shuna monima ihe tsikileni neitulemo oku hika oongalo nonando owu kale wu na eshongo lyopashimaliwa,” osho a kumike.

Queen Ree omulongisikola poRundu mpoka wo iipyakidhila noku humitha komeho eilongo lye poshitayi sho University ya Namibia poshilando shoka.

LEAVE A REPLY

Please enter your comment!
Please enter your name here