WHERE OTHERS WAVERED – Ongundu ontiyali ya landula mo

0
259

Konima sho ongundu yotango yaakwiita yekondjelomanguluko ya thikile moshilongo noku tameka tayi hwahwameke noku dheula aakwashigwana opo yi ilongekidhile oku kondjela emanguluko, oongundu oonkwawo ndatu dhaakwiita odha ka landula ko.

Ndhika odha lid ha ithanwa G2,G3 nosho wo G4, yo kehe yimwe yoongundu ndhika oya li ya thikama maakwiita yeli omulongo. Sho ndhika dha tameke olweendo lwadho, ongundu yotango yoG1 oya adhika nale ya mena omidhi moshilongo. Ongundu ontiyali nenge G2 oya li ya thikama maakwiita  yoo Leonard Phillemon Shuuya[Castro] omutiyali komanda gwo SWALA, Lazarus Haiduua Zachariah[Shakala] omukuluntu gwomatanga gopolisi yopakwiita moSWALA, Helao Shityuwete, amushanga Elia Ndume omukwatheli paunamiti, Julius Shilongo oondaadhi, Eino Kamati Ekandjo etanga lyokuteyagula osho wo nee Jonas Shimueefeleni, Festus Nehale, Nghidipo Jesaja Haufiku na David Hamunime. Nando Castro okwa li okomanda ontiyali yo SWALA, nguka kali omwiinekelwa na ka kwali iinekelelwa oshinakugwanithwa shoku kwatela komeho ongundu yoG2, ekomando lyo G2 olya li lya pewa Lazarus Zachariah[Shakala]

G2 oya thigipo ontanda yokudheulilwa ya Kongwa oku ya ko South West Africa mu February 1966. Oya londo mohauto yawo yo LandRover noku hinga yuuka koongamba dha Tanzania na Zambia. Ngaashi ashike ongundu yo G1 ya ningile mbaka wo oya li ye na oku ka taamba oondjembo dhawo niikuti poMbeya, omanga inaaa ya galukila moSouth West Africa okupitila moshitopolwa sha Caprivi nale.

Oya ende ondjila yawo onde okupitila moLusaka, noLivingstone sigo opo Mambova omukunda gu li mesilu lyomeya ogendji pomulonga gwa Zambezi, oya kala omasiku gamwe momukunda ngoka ya tegelela ombautu ndjoka hayi taagulukitha aafaalelwa omulonga gwa Zambezi. Konima yomasiku ngoka ombautu ndjoka oya ka thika noku ya kuthapo opamwe nohauto yawo yo LandRover.

Oya ende nombautu ndjoka sigo opo Mwandi, mpoka ya thigi o LandRover yawo na oya tsikile ya landula omulonga ya humbata iikondjitho yawo ya holekwa momitsalo dhawo.

Ombautu yaZambezi okwa li ya tegelelwa oku ka thikama po Sesheke moZambia ndele oya ka haluka ashike sho ndjika ya lundulula ondjila moka ya li yuuka noku dhuga yuukilila koKatima Mulilo moshitopolwa sha Caprivi mpoka ndjika ya kankama noku helula aafaalelwa yayo.

Ongundu ndjika yo G2 oya li andola ya tegelela okuhomonwa kaapolisi yegameno ya South Africa ndele, omukalo ngoka ya dheulwa nago ogwe ya dhiladhilitha mbala yo no ya vongakana mumwe naafaalelwa ooyakwawo omanga nookuli inaa ya thika komunkulo gwomulonga.

Sho ya heluka mombautu oya ka kuutumba oshinano oshifupi kohi yomiti opamwe naafaalelwa ooyakwawo. Nokonima yoku tegelela ethimbo ele oya yi mombesa ndjoka ya zi koKatima Mulilo naandjika oye ya  fala ishewe mo Zambia mo Sesheke, mpoka ya kala ya holama omanga taya longekidha oku taaguluka omulonga gwa Cuando po Kaunga Mashi okuya moAngola. Okuza mpoka oya ka taaguluka omulonga gwa Kavango noku galukila moSouth West Africa.

Omanga ye li moKavango oya ipumu mumwe netanga loymutondi gwawo aakwwita ya South Afria popepi nomulonga gwa Kavango kuuninginino wo Rundu. Inaya kanithilapo nando omukwiita polugodhi ndoka, ihe oya li ya itaala kutya omutondi gwawo South Africa okwa kanithilapo aakwiita oyendji ya say o yamwe oya lemanekwa, molwashoka  mboka kaya li ye ya landula mbala konima yoshiponokela shoka. Nando ya fa ya hupu ngaaka mbaka oya adhika komupya sho  oombulu nomukolonyeki ya tumu omwaalu omunene opo ya ka nkondopeke etanga lyoombulu. Hailwa Julius Shilongo okwe shi pondola okuhenuka oombulu, dho inaadhi vula oku mu kwata, nonando okwa ka kwatelwa konima yethimb pOmugulu gwOmbashe momasiku 26 Auguste 1966.

Oshilyo shimwe shongundu ndjika yoG2, Leonard Phillemon Shuuya[Castro] okwa li gumwe gwaakwiita yahetatu mboka ya kwatwa. Nguka okwa ka ethiwa okuza mondholongo moPretotia, nokwa shunithwa ishewe muundjendi.

Okwa shunithwa pondje yoshilongo a tumwa nokwa li omuniilonga gwetanga lyopolisi yegameno yaSouth Africa.

Okwa li a pewa iimaliwa, yimwe okwe yi pewa omanga inaa tameka iilonga ye yokulanditha po ooya kwawo omanga iikwawo okwa li eyi uvanekelwa teke yi pewa uuna a manitha  iilongatumo ye okulandithapo aakwiita yekondjelomanguluko noku ya gandja miikaha yomukolonyeki gwawo.

Nguka okwa landitha po oongundu ndhoka dha ka landulako oshoka iilyo yaandhoka oyindji oya kwatelwa ashike mondjila poKatima Mulilo mpoka oombulu dha kala dha tegelela nokutala mboka taya thiki komunkulo gwomulonga okuza ko Zambia.

Castro okwa thigi po iitopolwa yokuumbangalantu zilo noku ya kUukwaluudhi oku joina kommanda John Otto Nankudhu nongundu ye yo G1.

 Castro ka li a tseyithile mbaka kutya ye okwa li a kwatwa koombulu, na okwa kala ta hokololele ongundu ndjika omahokololo giifundja, shika okwe shi ningi wo moku hokololela ewiliko lyoSWAPO pondje nomeni lyoshilongo iifundja ya fa oshili.

Castro okwa li a etele oSWAPO oshiponga oshoka okuna ombedhi moku kwatitha, oohailwa, Ya Toivo na Nathanael Homateni noyendji yalwe muumbangalantu woshilongo. Castro okwa li  a tumwa kaapolisi yegameno ya South Africa opo a popye na Ya Toivo opo a konge oodilimani opo dhi longithwe kaakwiita yoSWAPO moku kondjitha aatondi yawo. Ya Toivo omanga a li inaa hekelwa momeya omale ku Castro ngaaka okwa li a londodha Komanda Nankudhu opo a kale a kotokela omuntu ngoka oshoka okwa nika keeshi omwiinekelwa. Omupya omunene Ya Toivo okwa dhini elondodho ndyoka yemwene a pele Nankudhu.

Okwa gwile momwigo gwa Castro naahona ye sho a ka pula omuniilonga gumwe pomina ya Tsumeb Corporation Limited opo emu yakele oondilimani. Okuza mpoka Ya Toivo okwa kwatwa nokumonika ondjo eta ka edhililwa kondholongo yokontuntu ya Robben uule womimvo 20.

Okulanditha po aakwiita kwaCastro ina ku hulila ashike meni lyoshilongo okwa tsikile wo okuya kombanda, shoo ye wo enamo sha meso lya Hailwa Tobias Hainyeko ngoka oye a li okomanda onkuluntu ya SWALA, sho a pe nguka omauyelele ga puka pethimbo, sho a heke Hainyeko opo  a ze  koZambia mu May 1967. Castro okwa endithaHainyeko mombautu yaZambezi Transport okuza koMambova moZambia sigo opo Katima Mulilo  koNamibia.

Aapolisi yaSouth Africa oya li ya tegamene ombautu ndjoka omanga inaa yi ka thikama poSesheke. Comanda Hainyeko okwa li ependa nokeena uumbanda oshoka okwa sile molugodhi komulonga gwaZambezi, sho a yaha nokusa omupolisi gwaSouth Africa gworanga yowarrant officer ye oye a li okomanda yopolisi yomukolonyeki poKatima Mulilo ha ithanwa, Grobler.

Okwa li wo a lemaneke gumwe ngoka a ka sila koshipangelo.

Oshiningwanima shika osha ningilwe momasiku 18 Mai 1967.

Mu Juni 1966 ongundu ontintatu G3 oya thigipo Tanzania, ya li ya thikama mu Komanda gwayo Kaleb Tjipahura, omupevi gwe Rudolph Kadhikwa na S Kakuambi, J Haiduua, B Naunjango, Thomas Haimbodi, A Aluteni, P Hamalua Ndadi, I Ipinge na Eliader Muatale ngoka a ka sila molugodhi pokati kaakondjelimanguluko nomatanga gomukolonyeki omu Putu noshowo omuSouth Africa.

Hamalwa Ndadi okwa hulitha omanga ya li taya taaguluka omulonga gwa Cuando, Ipinge okwa shumithwa koZambia oshoka okwa li a loloka. Aakwiita ashike ya heyali oyo ya hupu mokutaaguluka omulonga gwa Cuando ngoka gwa nika oshiponga. Konima yoku taaguluka omulonga gwa Cuando ongundu G3 oya ende yuuka kOshakawe moBotswana, moka ya pewa olefa meloli, oya li ye wete aanelago ndele omuhingi gwehauto ndyoka okwe ya fala kosasiona yopolisi.

Mpoka oya li ya pula pulwa na oya hokolola kutya yo oya li ashike mondjila yuuka koomina dhaSouth Africa taya ka konga iilonga oya ka ethiwa oku ya nondjila yawo sigo oya thiki hoka ya li taya yi.

LEAVE A REPLY

Please enter your comment!
Please enter your name here