Aakwashigwana ayehe oye thike pamwe

0
239

Iiwike ya piti otwa koneke egandjo lyuusama moshinima shotendela yoodola oomiliona N$16,4 ndjoka ya pewa Kaupumhote omukadhona omwana gwomuPeresidende Hifikepunye Pohamba nakuume ke mongeshefa Taschiona !Gawaxas. Ndika otali gumu omidhi  dhuuthemba woohandimwe waaNamibia.

Kapena omalimbililo Kaupumhote nakuume ke mongeshefa oye li mokati kaamboka ya mono uuwanawa wootendela ndjoka yeeta egandjo lyuusama lya yaga komuntu. Shoka sha li sha pumbiwa osho, shika kutya mboka ya gandja otendela ndjika oya li yena oku gandja efatululo lili nawa opo ya yande omagandjo goombedhi nomapopyo inaaga pumbiwa.

Efatululo ndyoka lya gandjwa okuza kOminista yIipambele  yOmombelewa yOmuperesidende olya yeleke nawa oshinima shika, sho lya gandja elandulathano nkene egandjo lyotendela ndjika lyeende. Epulo ndyoka tali ya momadhiladhilo oondyoka kutya ngele aana yaanapolitika naana yaanambelewa yopombanda mewiliko lyoshilongo oyena okutongolwa ngele tashiya pokupewa ootendela , molwashoka mbaka oya valwa kaanenentu.

Etongolo ndika otali vulu ngaaka okuthikama lya kola ngele olya tulwa mekonakono komeho gompangu?

Na ishewe oshinima shino otashi tsu tuu kumwe nomautho gekotampango ndyoka tali indike okatongo kopamahupilo , unene tuu sho ndika tali shi popi shayela kutya  aaNamibia ayehe oye thike pamwe na inaya tongolwa sha kankamekelwa  kutya yo aakwashike yo aantu, kutya oyomuhoko guni, olwaala luni , yomezimo lini, yeitaalo lini, nehempulo etingapi oshowo omuthika guni pankalathano nopamahupilo.

Nenge okatongo kehe kutya okopamahupilo, kopaitaalo nenge kopankalathano inaka indikwa kekotampango lyoshilongo ndyoka olyo ompango tayi ti pii kwaadhihe ?Nenge otwa dhimbwa uunake ongo oshigwana iilalo nomeehamo ngoka twa ningilwa komilandu dhethipombinzi dhepangelo lyokatongotongo shono ndyoka lya li lya tongola oshigwana momavigumbo, okuyeleka nena sho tse tatu tyapula uuthike pamwe nemanguluko?

Otashi ti aana yaanapolitika inaya kuthombinga miinyangadhalwa yopamahupilo moshilongo, sha kwatelamo oku indila ya pewe iilonga yepangelo nenge ootendela ndhoka, molwaashike yo yeli aavalwa yaakwakuluntu. Mboka yeli mopolitika, taya wilike omahangano omanene nenge yeli piinakugwanithwa yokweenditha iilonga moshilongo shika?

Ontondo ndjika otatu yi kankamekele komukankatungilo gunipo nenge komukanka itaalo gwa za peni? Nenge aanona yoohashike shalye kayena uuthemba wa faathana naamboka waana yaathigona moshigwana? 

Eeno omapulo ogena okupulwa uuna omuntu gwontumba  eli popepi naanankondo mopolitika a pewa otendela, ihe otuna okutala onkundana ndjoka ngele otayi kondjithathana nomautho gekotampango lyoshilongo nenge nadhilwe dhomoshilongo.

Ngele opena okuningila kombunda kwasha taku vulu okuulikwa moshinima shoka, tse otatu kala yotango okushikondjitha. Ihe ngele hasho nena otatu eta ashike omatilitho nenukemo lyomwenyo lyaana omakankameno moku yelutha oohapu dhaana shilonga.

Omishangwa dhi niwe ku New Era Publication Corporation (NEPC),ngoka oye mwene gwa Kundana na New Era,dha za ko  National Housing Enterprise (NHE) otadhi ulike kapena uumbangi washa kutya Pohamba okwa thingonona okwaako kwa NHE opo a gandje otendela yimwe komwanakadhona.

Omiyalu dhimwe dhaaNamibia nadho odha mono woo ootendela okuza ko NHE, naashika oshe tu etele epulo kutya omolwashike mbaka yaali oyo yena okupula pulwa kutya oya mona uuwanawa miilonga mbyoka sheende ngiini?

Sho twa tala nawa NHE oha longitha iipumbiwa yili nawa mokugandja ootendela ngaashi ndjoka ya etitha omanyenyeto nelalakano opo omuNamibia kehe a vule okumona uuwanawa.  

Omahangano woo gopondje ngoka haga pewa iilonga ku NHE oga thiminikwa woo opo ga gandje oopersenda 30 dhiilonga mbyoka kaaNamibia, ndele oshafa elongekidho ndika inaali shambula oonakugandja oombedhi nopokuma mpoka inaashi pumbiwa.

Omulandu nguka otagu tsukumwe naangoka gwepangelo okunkondopeka aakwashigwana moku yapa uunongo mboka tawu zi kaanawino aakwiilongo.

Oshilongo shetu osha yambekwa noonzo dhaashi kutumbulwa naandhika odhina okutyapulwa kaaNamibia ayehe kutya nee oya valeka nenge inaya valeka.

Inapa kala olweedhe okutongola yamwe, mwakwatelwa naana yaanapolitika, naawiliki yomahangano shampa ashike egandjo lyiilonga mbyoka lya gandjwa shi li puuyelele pwaana omapulapulo kutya osha endela koombunda.

LEAVE A REPLY

Please enter your comment!
Please enter your name here