Aangenga ya pewa uundjugo

0
187

KuMaria Namupala

OKATYALI – Omasiku hamale sho aakalimo yoshikandjohogololo Okatyali yali ya pewa omatalashe kaasamalia natango aakalimo yomoshikandjohogololo shika, momukunda Ongenga oya pewa ishewe uundjugo.

Omukunda Ongenga oguna omagumbo geli lwopomilongo 93 lwaampoka. Petameko lyaMarch omagumbo omilongo  (53) ogali ga tungilwa uundjugo oku pitila mombelewa yegandjo neandjakaneko lyomeya komikunda.

Yamwe yomagumbo ngoka gali ga hupa ko oya li yena oomwenyo dha lindimana na kaya li yeshi ngele onaya ka tungilwa we uundjugo.  Omasiku gaziko Kansela gwa Katyali Joseph Mupetami okwali a gandja elombelwo kutya omagumbo agehe ngoka gali ga hupako otaga ka tungilwa uundjugo, yo ya wape ya ka tunge ishewe komikunda dhimwe. Metitatu lyoshiwike sha ziko aakalimo  yomomukunda Ongenga oyali ya gongala mpoka haya gongalele, opo ya gandje olupandu lwawo sho ya tungilwa uundjugo. Julius Nawinda okuli omukokele gomomukunda muka. Nawinda naye okwa tungilwa okandjugo, katungwa ashike komunkulo gwepya lye.

 “Yakwetu gwonale okwa tile “waa pandula noyaka”, onkene otatu gandja olupandu olunene ku Kansela gwetu sho tetu longele uuwanawa mboka twa pumbwa, konyala ngashingeyi kehe egumbo lili momukunda gwetu olya tungilwa okandjuko, otatu pandula unene oshoka inatu gandjako nande epeni opo tu tungilwe uundjugo mbuka otwe wu tungilwa owala oshali shamuhongi,” Nawindanene tati ngaaka.

Omukalimo gomOngenga Rosalia Gabriel naye okwati ota pandula sho a tungilwa okandjugo ta indile opo omakwatho ngano ya pewa ga gandjwe ando ishewe koombinga noombinga.  Jakob Amunyela naye gumwe gwaamboka ya tungilwa uundjugo. “Otatu pandula kansela gwetu ngo ta longo uusiku nomutenya opo etu kwathele moompumbwe dhetu adhihe, sho twe mu hogolola otwemu inekela,” Amunyela ta pandula ngaaka. Omunambelewa okuza kombelewa yoku andjakaneka omeya momikunda Chris Negongo okwati oyena elalakano opo kehe egumbo lili moNamibia li kale lina okandjugo, opo aantu ya yande okunyateka momalundu, ko ku yande ekakeko. “Uundjolowele owa pumbiwa onkee natu kaleni mombepo ombwanawa yuuyogoki,” ta gwedha ko.

Negongo okwa ti woo shampa ya mana okutunga uundjugo mbuka mOngenga otaya ka tsikila komikunda omikwawo, taya tala manga unene kwaamba yeli mompumbwe yuundjugo.

LEAVE A REPLY

Please enter your comment!
Please enter your name here