Inamu longitha omalaka ga honga miikonga yomahogololo – Venani

0
169

KuLoide Jason 

ONDANGWA – Omuperesidende gwoDTA , McHenry Venaani okwa ti oongundu adhihe dhopolitika ndhoka tadhi kuthombinga miikonga yomahogololo nuumvo nadhi yande okulongitha  elaka lyahonga, lyomutyanayi, lyokutukana, lyoluhindo nolyuutondwe.

Venaani okwa uvaneke kutya ongundu ye otayi ka ninga iikonga yomahogololo ya yela , ya nika onkuluntu yo ishewe otayi popi noku tothamo shoka sha pumbiwa okuningilwa nokuningwa koshigwana noshowo iikundathanwa yasimana yopamahupilo goshilongo.

Okwa ti shimwe shomiinima mbyoka ongundu ye yo DTA tayi ka etapo ooshoka sheyambidhidho lyaavalakadhi mboka taya tekula oyana oyo ayeke pwaana ekwatho lyoohe yaanona mboka, opo shika shi kwathele aavalakadhi mbaka moku putudha oya nawa.

Okwa itaala kutya oku kwathela aavalakadhi mboka taya tekula oluvalo oyo ayeke otashi ka kwathela okushonopeka elongitho lyoonkondo lyuukashike kookantu moshilongo.

Omunani gwo DTA okwa uvaneke kutya ngele okwa pewa ewiliko lyoshilongo kaahogololi, ongundu ye otayi ka tala ke shunomonima lyaakwashigwana mboka ya dhinika.  Okwa ti ngele ando ongundu ye oyi sindane ota ka soshimpwiyu kutya omakwatathano pokati ka Namibia na Angola oga nkondopekwa opo Namibia a vule okumona uuwanawa okuza moonzo dhomahooli goshishiindalongo shokonooli yetu.

Venaani okwa ti epangelo lye otali tula po wo ehala gameno li na sha niimuna pokati ka Angola na Namibia  opo oondando dhoongombe dha Namibia dhi hwepopekwe. 

Okwa itaala kutya eyokomeho lyopashigwana otali adhika ashike uuna pena elongelokumwe pokati kepangelo, aantu noshowo oshikondo shopaumwene.

Venaani ndhika okwe dhi popi pethimbo a li a tsakanene niilyo naayambidhidhi yongundu ye miitopolwa yokonooli yoshilongo pOndangwa omasiku gapiti.

LEAVE A REPLY

Please enter your comment!
Please enter your name here