Omukainhu 30 a dipaa omulumenhu waye weedula 79

0
311
Vamwe vomovakwapata vatetekulu Johannes Nakatana Mumbala va kalelala oshinduda shaye omo vati a dipaelwa

KuHelvy Shaanika 

OKAKU – Omukainhu weedula 30, womomukunda Oshaandjela moshitukulwa shaKaku, okwa holoka momhangulilo yaMangestalata waNdangwa oshivike eshi, eshi a dipaa kaume kaye komoihole weedula 79.

Helena Vaino a shivika nedina Shayela okwa kwatelwepo oshivike sha djako kOpolifi yaShana eshi ta ku fekelwa kutya okwa twa neembele nokudipaela Johannes Nakatana Mumbala omanga va li va nangala.

Vamwe vomovakwapata vaVaino ota va hokolola kutya omukainhu ou okwa velele momutwe modula yo2009 na okwa kala hanu eepela dokosaala o16.

“Eshi a kala iha ningi sha omunhu ashike ngeenge omwe mu lombwele kutya ina nwa vali omalodu, oha dulu okutukana. Ote ku tuku lela lela, nande oku hange omunhu opo ta nu omalodu a tula okahalasha pedu ote ka kufa po, ta nu ndele ta faduka po,” umwe womovakwanedimo vaVaino ta ti. 

Nonande omulombo oo wa yandjwa kopolifi wa holola kutya Vaino okwa ti kutya okwa dipaa Mumbala molwaashi va li ta va kondjele ekumbafa, umwe womova kwanedimo okwa lombwela Kundana kutya okwa lombwelwa ku Vaino kutya okwa dipaa omukulupe Mumbala shaashi okwa li te mu kondjifa osho sha eta opo emu twe nombele loikando aishe ili lwopomulongo.

Ovakwanedimo va Mumbala nova Vaino ova hokolola kutya vo ina va didilika nande ngeno oikolokosha pokati kaavo vavali mefimbo loule weemwedi dili mbali ile nhatu odo va kala moihole. “Efiku limwe tatekulu Nakatana (Mumbala) okwe uya meumbo letu, ta pula tate (omusamane wange) emu pe oshimaliwa, shaashi tate oye hemupungulile oshimaliwa shaye shopenzela, opo a kafute Shayela (Vaino), ta ti okwe mu limina po okanhenga kaye. Oshikando oshitivali okwe ya va li ta indile ko okamaliwa, ye ta lombwelenge kutya Shayela omukadona waye…

“Molomakaya onde va mona ngaho aveshe tava piti peumbo letu Nakatana a humbata ngaho okashako, ye Shayela ote li ende va yuka keekamba. Opo ndeli xula tatekulu ta ende opo. Ashike ina ndi shiva eenhamanana pokati kavo,” Elizabeth Matheus oo a hombolwa ku tatekulu Vilho Mateus, omutekulu nomushiinda shaNakatana ta ti.

Mokudimbulukwa osho sha ningwa po Osoondaxa yoshivike meme Elizabeth ota ti ongula yOsoondaxa yadjako Vaino okwe uya meumbo lavo lwopo 6h00, ta popifa kamwe komounona. 

Eshi vati a popifa kamwe komounona vomeumbo okwe ka lombwela kutya ye ina nangala po, shaashi okwa dipaa Nakatana e mutwa nombele.

“Eshi a lombwela nge ame onda ti na tu ye nee opo ndi ka kwashilipaleke osho ta popi. Eshi twa enda naye, oye ngaho a li komesho. Ta i mondunda, ta kufa ko oikumbafa ya li ya tuvika Nakatana. Ame onda kwata Nakatana kokwooko, nonda mona kutya okwa shila osho ta shi ulike kutya hapo a xulifa efimbo olo, okwa xulifa efimbo la pita. Ekungu lo honde omo a li ola kula neenghono. Ame iha ndi monoko nawa ashike onda mona kutya okwe mu twa monhulo kombinga yokolumosho. Ovapolifi ovo ye uya poshiningwanima ova ti okwe mutwa eembele omulongo. 

LEAVE A REPLY

Please enter your comment!
Please enter your name here