Omusitagongalo a lundililwa eyakelo lyaantu moshilongo

0
197

KuHelvy Shaanika 

ONGWEDIVA – Aakalimo momukunda guli koongamba dhaNamibia na Angola, oya pangula nonkumwe nokuningila gumwe gwomaasitagongalo gwongeleka yopuyo mpoka omapoyo kuya oha kutha ombinga moshinima shokuyakela aanona yAangola moshilongo nokuya petha uukwashigwana gwaNamibia pamukalo guulingilingi.  

Ehokololo lya gandjwa kaakwashigwana kOmahenene otali ti omusitagongola gwongeleka Omahenene Pentecostal Church Gabriel Sandu, oha yambeke aanona Aangola e teya pe uukwashilyo gwegongalo ta u ulike anuwa kutya aanona mbaka oya valwa kAanamibia, opo ya ka mone oonzapo dhomavalo. 

Shika omusita anuwa ohe shi ningi e shishi nawa kutya aanona mbono ka yeshi Aanambia, na ohe shingi melongelo kumwe nAanamibia mboka ye na oofamili nenge aashiwikile koAngola na oha ya ka tala aanona opo ye ya tekule noku ya tamekitha osikola moNamibia.  

Aakwashigwana mbaka oya ti, kakele kokuyakela aanona moshilongo, omusita oha ningi woo omahokanitho ga nika uulingilingi, shoka sha etitha nokuli opo iilyo imwe yOmahenene Pentecostal Church yi tembuke mo mongeleka nokuka tota po egongalo lilwe.

Oshinima shika aniwa osha monika mo sho omusita Sandu anuwa yambeke nokugandja uukwashilyo kuunona mboka wa li wa tindwa okutaambelwa mongeleka yilwe molwashoka kauna uukwashigwana waNamibia. 

Eyambeko lyaanona mongerki onkwaPentecostal otali faathanithwa neshasho lyaanona moongerki dhilwe dhoopaKriste moNamibia, oshoko opo aanona haya pelwa uukwashilyo wegongalo.

Onzapo yuukwashilyo wegongalo opamwe nuumutse waavali oyo uundombwendi ngoka ha u petha omuntu uuthemba okumona onzapo yevalo yaNamibia oshowo okamutse uuna ethimbo lye lyaadha.

Uuna ya taambwa ngaaka aanona mbaka oya manguluka okupewa uukwashigwana wa Namibia nenge oodokumende dhopashigwana dha Namibia, okuza kOshikondo Shiikwameni, na oye na wo uuthemba wa fa waa kwashigwana yalwe okukala moNamibia osho wo okuya kosikola muka.

Kakele kokukwathela iilyo yegongalo lye, otaku tiwa omusita Sandu ota kambadhala wo oku indjipaleka omwaalu gwiilyo yegongalo lye mokutaambela aanona mbaka megongalo.

Oshiningwanima oshitalala ooshoka shaanona yaali mboka aakuluntu yawo ayehe yeli oomvalele dhAngola, wa taambelwa megongalo kupastori Sandu, ongo uunona wa Irena Shiponeni nomusamane gwe. Shiponeni omvalele yAngola ya hokanwa komuNamibia ngoka eli omunambelewa gwopolisi ha longele koGobabis.

Sandu okwa ekelehi omapopyo ngoka kutya oha gandja uukwashilyo kaanona aaAngola mwakwatelwa noyanagona yaShiponeni.

“Onda li nda ningi omasiku ogendji gendji inaandi yambeka aanona megongalo, opo ashike nda yambeke aanona nokaatekulu yatate Walumba Walumba nomukadhi. OoWalumba oomvalele dhaNamibia  naanona yawo aaNamibia. Kandi uviteko kutya omolwashike aakwashigwana ta ya etapo omalundilo ngoka,” osho Sandu ta ti. 

Irena Shiponeni okwa ti ye okwa li shili a kambadhala okutaambitha okanona kamumwayina mongeleka, kongeleka tayi thigathanapo naandjoka ya pastori Sandu ihe omusita okwa tindi okushininga molwashoka kake shi okakwashigwana kaNamibia.

Omusati ngoka wo e na ongeleka moshitopolwa shaMahenene ota hokololwa a pe Shiponeni nomulume gwe omayele opo ya ka konge oombapila dhopaveta okuza komapangelo gaNamibia na Angola okuulika kutya yo oyo aatonateli yomunona nguka pampango noshowo kutya omunona ota vulu okumona uukwashigwana waNamibia.

“Onda li ashike nda hala omunona gwamumwameme opo a taambwe meitaalo ngaashi ngame. Oshinima shimwe omunona okwa tameka osikola naalongi ye otaya pula onzapo yevalo ihe ye kena mbapila yatya ngaaka. Otandi ningi ngiini ngele omunona onde mu pewa ku yina, ngoka eli omukwanambwiyu omukwetu? He yomunona okwa hulako. Ye mumwameme okuli oye awike kena omusamane na ita vulu okutekula aanona ye ayehe,” osho Shiponeni a fatulula. 

Sho a pulwa kutya omunona oku li peni Shiponeni okwa ti omunona okwa ningi esiku kaandja Walumba molwashoka hoka okwa hokanwa omumwayinagona. Okwa ti ke shiwo ngele omwanagona nguka okwa li gumwe gwaanona yaandja Walumba mboka kwa hokololwa ya taambelwa megongalo komusita Sandu. 

LEAVE A REPLY

Please enter your comment!
Please enter your name here