Simon otaka bokisa nando uukulupe owe mu eta mo

0
218

KuOtniel Hembapu

WINDHOEK – Nonando aaholi yuudhano woongonyo oyendji otaya ti omudhengingonyo nguka a li enyakwa lyuuyuni lwaali ina ndjangumukwa nawa palutu nopaunamiti okutsikila nokumbokisa, Harry Simon yemwene okwa ti oku li nawa a kola ngoshitenda no kapena omuntu te mu yi moshipala okwaadha elalakano lye.

Aaholi yuudhano wombokisa oya popi ndhika unene tuu sho Simon a li a zi moshiponga oshinene shoka sha li sheeta opo okwaako kwe kumwe ku teke. Aaholi yobokisa otaya walyaeke kutya ngiika ita ka vula naanaa okukondja nonando okwaako hoka okwa pangela nawa ngashingeyi.

Simon okwa ti otaka kondja mbala nomukondjithi gwe ngoka a za ko Serbia, gwedhina Geard Ajetovic. Simon okwa li a dhengemo nguka puudhano wawo wepaya lya li lyaana mwene lyondjundo yo light heavyweigh yehangano lyoongonyo lyo International Boxing Federation. Uudhano mbuka owa li wa ningilwa poshinyanga sha Ramatex moVenduka.

Ihe konima yawo aatali yombokisa kaya li ya itaala shili kutya Simon okwa dhenge noku ehameka Ajetovic ,yamwe oyali yuuvite kutya etokolo olya ningilwa owina okukala muuwanawa waNamibia nenge wa Simon ndele shoka hasho shali efano lyoshili ndyoka lya ningilwe ongulohi ndjoka.

Omolwa oohapu ndhoka Simon okwa zimine opo ya kondje ishewe nomukondjithi gwe nguka oku ulikila mboka taya ti uudhano okwe wu pelwe peke kutya natango ota ka ehameka omukondjithi gwe ngaashi ashike eshi ningile nale omumvogu. Okwa ti pethimbo ndika omalongekidho ashike omashona ogo taga ningwapo opo uudhano mbuka wu tseyike kutya otawu ka dhanwa uunake nopeni.

 Simon okwa ti okwa loloka oohapu ndhoka tadhi ti ye kali a sindana payuuki nokwa gana kutya omipopyo ndhoka ote ke dhi mweneka sho ta ka dhenga omuSerbia gwaantu noongonyo dheendelela noondhigu.

Kombinga yomipopyo kutya kena olutu luna uukolele noshowo okwaako hoka kwali kwa teka kutya ngiika ita ka kondja nawa okwa ti ye okuli nawa na ota vulu okukondja nomukondjithi kehe ethimbo kehe.

“Ombokisa kayishi oshinima shoshitalendi, ngame onda tumwa kegulu, oshikumitha nomagano omawanawa gaKalunga ega pe Namibia.Ngame ondi li moshimpungu shobokisa uule womimvo 20 ndele namutenya ngu, inandi sindika noku kuthwa epaya lyandje sha pitile mokudhengwa komukondjithi omukwetu ando.Shika otashi ulike kutya ondina oshitalendi ishewe ngame omagano ga Kalunga naashika osha ningi ndje omumbokisi a shewa,’ osho Simon ngoka a gwanitha omimvo omilongo ne , iishapa.

Okwa ti shiikwatelela komalugodhi ngoka omilongo 29 a sindana no inaa kanithapo nando limwe, ye okuna natango oonkondo okudhana nokukondja uule woomvula mbali sigo ndatu okuuka komeho .

LEAVE A REPLY

Please enter your comment!
Please enter your name here