WHERE OTHERS WAVERED – Wi ilongekidhila ekondjo nomatati

0
373

Mu Novomba 1966 oongundu ntano odha li dha topolelwa miitopolwa itatu yoshilongo, kokutya Muuzilo waCaprivi, Kavango nOwambo. Pethimbo sho nda li nda galukile koWindhoek opamwe na hailwa Hifikepunye Pohamba momasiku 20 Maalitsa 1966 okutala epopyo lyoombulu ndyoka dho dha li dha fundju nalyo Ohofa yopaigwana moHague kutya anuwa aakwaSwapo oye li muundjendi kehogololo lyawo yene, na oya manguluka okushuna koSouth West Africa nopwaana mbulu teya kwata aakwiita yotango oyali nale meni lyoshilongo. Pethimbo ndyoka tse twa galuka okutala ngele otatu pitikwa tu ye moshilongo no inaatu ningwa sha, aakwiita mbaka oya li nale meni lyoshilongo taya dheula yalwe yo taya longo iilonga yokuhwahwameka papolitika.

Oya li wo ya dhike oontanda itaadhi kalele dhopakwiita oshowo okudheula aakwiita meni lyoshilongo noku ya longekidha opo ya kale ya langela komalwilo uuna ndoka yo ya ithanwa oku ya kiita yemanguluko uuna ya ithanwa okuka kondjitha omutondi. Onda ka kundana konima kutya yamwe yomaakwiita mbaka oya li omapenda oshoka oya henuka okukwatwa komutondi. Oshiholelwa ooshoka shaHailwa Isak Shoome Elago ngoka a kala ta holama okukwatwa koombulu uule womimvo ndatu sho a kala inaa enda po pegumbo lye omimvo adhihe ndhoka moshitopolwa shUukwaluudhi, sigo oosho a ka kwatwa noku falwa pamwe nooyakwawo kondholongo ko Pretoria. Okwa kala mondholongo opamwe naamboka ya li ya hupu moshiponokela shopOmugulu gOmbashe yeli yahetatu opamwe woo noohailwa yamwe ya kwatelwe okuza koshitopolwa sha Caprivi. Oya kala mondjedhililo ngaaka naakwanezimo lyawo oyali ya itaala kutya mbaka oya hulitha nale nookuli.

Pamwe na Isak Shoome Elago, tate ngoka a vala ndje Daniel Utoni Nujoma pethimbo ndyoka okwa li nale ena omimvo 70 okwa kwatwa wo noku falwa koPretoria nondjo ye oshoka oye tate. Okwa li a kwatwa omanga eli moshipangelo sha Kahao ta pangwa. Tango oombulu odhe mu fala ko Kavango opo konima odhe mu fala kondholongo koPretoria, hoka a tulwa mokandunda okashonashona moka omuntu gwomwenyo itaa vulu oku inyengelamo nemanguluko na okwa li ta ndondelwa komeya omatalala, nomolwa uututo mboka okwa ka kwatwa koTB ndjoka ye mu dhipaga konale.

Iihokolola yaakwiita yopOmugulu gOmbashe na yalwe muAguste 1967

Mu Auguste 1967 oonkwatwa dhopOmugulu gOmbashe naamboka ya landithwapo ku Castro moshitopolwa sha Caprivi oya tulwa miihokolola mompangu.Omushangwa nenge omusholondondo gwomatamaneko ogwa li gwa kwatelamo iiponokela kegumbo lyomulongithwa gumwe, noshowo oshiponokela shimwe pofaalama yoshilumbu yedhina Kalahari Kroon momudhingoloko gwaShaanda oshowo ehanagulopo lyoombelewa dhepangelo pOshikango momasiku 27 Septemba 1966 sho oombelewa negumbo lyakomufala gwaaluudhe lya li lya lungunikwapo omutoko gowala kaakwiita yoguerilla.

Konima yokukala mondjedhililo ethimbo ele yiikalekelwa aakwiita mbaka oya etwa komeho gompangu moPretoria .Oya li mompangu opamwe naawiliki 10yoSwapo ngaashi hailwa HermanToivo ya Toivo, Eliaser Tuhadeleni, Nathaniel Maxuilili mokati kaamboka.

Omadhina gaamboka yali taya pangulwa noga nyolwa momusholondondo oga li omilongo hetatu.Mokati komadhina gotango omulongo omwali omadhina goohailwa Hifikepunye Pohamba, Maxton Mutongolume, Katjivena na Peter Mweshihange, omanga edhina lyandje olyo lya li pombanda yomushondondo nguka.

Mokati komathele mboka ya li ya kwatwa kaapolisi mo 1967 omwali oohailwa Aaron Hamutenya, na Gabriel Mbidi, mboka yali ookuume kandje aawanawa. Mbaka okwa li ya kwatelwa momagumbo gawo mOld Location moVenduka.

Mesiku 21 Juni 1967 South Africa okwa pititha oveta yokukondjitha uukulo ndjoka ya tseyithwa moshifoshepangelo. Oveta ndjika oya ningwa yi na oonkondo okutameka omumvo 1962, naandjika ando oya pe South Africa ompito ombwanawa opo ya pangulile aakwiita yetu mboka ya li mondholongo eso omolwiilonga mbyoka ya longwa koonkwatwe ndhika konima yomimvo odhindji.

Oonkondo dhoveta ndjika ita dhi vulu okuyelekwa noveta yilwe osho wo nokutya aapangulwa mbaka oya kuthwa moshilongo shawo okukapangulwa koshilongo shimwe oshikwiilongo.

Shika oshe tu pe ompito opo tu ulikile uuyuni no kutya epangelo lya South Africa kalishi lyopantu.

Omumvo ngoka oshigongi shaayehe shiigwana Hangano osha ningi etokolo ndyoka lya dhikithapo Oraata Yiigwana Hangano molwoshikumungu shaNamibia. Nonando iilongo oyindji yokuuninginino oya li inaa nyanyukilwa etokolo ndika. Nando ongaaka oSwapo oya ka longa nuudhiginini noku mona omayambidhidho okuza komahangano gali taga kondjitha okatongotongo koombulu mo South Africa. Oya yambidhidhwa wo kiilongo yomehangano lyuukumwe wAfrica, iilongo yomehangano inaali gama ombinga nenge Non-Aligned Movement, iilongo yokoScandinavia.

Omahangano ga tsondumbo nokatongotongo noshowo omulandu gwokakombo noludhi miilongo ya Europa oga li wo getu kwatha oku tu kondjela opo South West Africa a tulwe mewiliko lyIigwana Hangano opo a longekidhilwe emanguluko mbala.

Eyambidhidho ndika olya kwatha opo uudhudhu wepangelo lya South Africa lyokatongotongo wu etwe puuyelele nongeyi aakwiita naakondjelimanguluko mboka yali taya pangulwa ina ya ka pewa egeelo lyeso, ngaashi aapanguli yokatongo ya li taya dhiladhila okuninga. Pethimbo lyiihokolola mbyoka opo mpoka hailwa Herman Andimba Toivo ya Toivo a kwathele aatamanekwa ooyakwawo sho a popi oshipopiwa she sha simana. Petameko Ya Toivo okwa popitha Ompangu yokatongo a ti “Otandi popi tse molwashoka otandi kambadhala okupopya ha pehala lyandje andike ndele nopehala lyooyakwetu, nuunene peha lyaamboka ya lundilwa yo kaya li nompito yokumona uuwanawa welongo,” Ya Toivo osho a li lombwele ohofa ndjoka sho a popi pehala lyaatamanekwa naafekelwa.

Oshitopolwa oshikwawo shoshipopiwa she otashi holoka oshiwike tuuka pepandja tuu ndika ina shi ku pitilila po.

LEAVE A REPLY

Please enter your comment!
Please enter your name here