Ya pe omulongwa gwopoCanisianum okatemba

0
180

KuLoide Jason 

ONGWEDIVA – Efamili lyomunambelewa omukuluntu mewiliko lyoshitopolwa shaMusati olya pe omulongwa e na uulema okatemba haka endithwa kolusheno opo a vule oku inyenga nawa menongelo lyawo.

Egumbo lyAmutenya Protasius Andowa, olya etele Lahya Nakale enyanyu sho lye mu pe okatemba kokolusheno oshiwike shayi opo a vule okulongitha moku inyenga uuna tayi nokuza koongulu dhosikola.

Nakale, omulongwa gwomongundu 12 penongelo lyopombanda lya Canisianum mewiliko lyongeleka yaKatolika kaRoma moshitopolwa shoka. 

Omwiilongi nguka oku na uulema no iha vulu oku inyenga ngaashi a hala oshoka okatemba hoka a li na oohoka ena oku undula yemwene nenge e na oku kwathelwa kaalongwa ooyakwawo opo ye mu pitithe noku mukwatha a adhe mpoka uuka.

Omagano ngaka ga zi kegumbo lyaandja Andowa molupe lwokatemba kokolusheno otage mu kwatha opo a vule oku enda a manguluka nokukala we keeshi omutenge kaanasikola ooyakwawo mboka kwali haye mu kwathele.

Gumwe gwaakwathi ye oye omwanakadhona gwa tate Andowa ngoka wo eli kuume ke. Bernadette Andowa oye a hokololele aakuluntu ye nkene kuume ke nguka a kala ta mono iihuna oku inyenga nokatemba hoka kokoonyala naashika olundji oshe mu kutha ethimbo opo iinyenge nuupu. 

“Ongo aawiliki moshitopolwa otwa tokola opo tu ninge pos ha okukwatha mboka ye li mompumbwe moshigwana shetu,” Andowa a ti. 

Okwa tsikile a ti Nakale oku li moGrade 12 ngashingeyi na ota kala nokulongitha okatemba haka sigo okounivesiti. Kleopas Nakale ngoka popi pehala lyegumbo lyaandjawo okwa ulike olupandu lwe kekwatho ndyoka lya gandjwa kaakwAndowa a ti okatemba haka otaka kwathela omumwayina opo a vule oku adha oondjodhi dhe oku ilonga nawa.

LEAVE A REPLY

Please enter your comment!
Please enter your name here