Bester a geya sho inaa lombwelwa kutya ke na we iilonga

0
211

KuCarlos Kambaekwa

WINDHOEK – Omudhanitanga gwospana yaNamibia yopashigwan yetanga lyokoompadhi kuuvite ombili sho a kanitha iilonga ye mospana yOrlando Pirates moSouth Africa.

Rudolf ‘Magic Feet’ Bester okwa ti okwa haluthwa sho a kundana kutya ospana ndjoka a li ha dhanene moSouth Africa yOrlando Pirates ina yi mu pumbwa we omumvo guudhano tagu landula. 

Okwa haluka unene tuu sho ndjika inaa yi mu tseyithila yemwene ndele okwa kundana onkundana ndjika oku ziilila miikundaneki yomoshilongo.

Bester okwa li a tameke okudhanena ospana ndjoka onene yomoSoweto konyala omimvo mbali dha pitipo, ihe okwa kala ta longo nuudhigu oshoka ethimbo olindji okwa li ashike ha kuutumba pondje , kokutya ka li ha mono oompito odhindji okudhana uuna ospana ye ya li tayi dhana. 

Okwa joina Orlando Pirates okuza kospana  yetanga lyokoompadhi yedhina Maritzburg United.

Bester okwa li wo inee shi pondola okuhupitha ospana ndjoka okushunwa pevi kooliha dhopetameko sho ndjoka ya li ya kala kohi yomusholondondo gwoospana ndhoka dhomoliha yopombanda yo ABSA.

Bester oye gumwe gwaadhani mboka ya talika inaa ya pumbiwa we mOrlando Pirates omumvo guudhano tuuka. 

Oyo nomudhani nale gwospana yoKaizer Chiefs, Collins Mbesuma.

Bester okwa li a geya noonkondo oshoka ospana ye ina yi mu tseyithila kutya inayi mu pumbwa we, oshowo ina yi tseyithila omuwiliki gwiikwangeshefa gwe kombinga yaashika, naandjika oya hogolola okutseyitha shika miikundaneki.

Moonkundana dhilwe dhuudhano wetanga lyokoompadhi, ospana yopashigwana yaamatyona kohi yomimvo 17 oya dhengwa kwaandjoka yokoMozambique nookoola 2-0 pokapale ka Sam Nujoma  moVenduka  Olyomakaya ga ziko. 

Ospana ndjika okwa li ya tegelelwa yi sindane muudhano mbuka unene tuu sho ndjika ya li megumbo, ihe ina yi longitha ompito ndjika nawa. 

Ospana yo Brave Warriors ongundjuka oya li ya dhana shi thike pamwe naandjoka ya Mozambique yo Young Mambas okoola 1-1 medhingoloko lyotango moMaputo.

LEAVE A REPLY

Please enter your comment!
Please enter your name here