A dhipaga omukiintu gwe e ti idhipaga

0
286

KuMaria Namupala

ONAYENA – Omulumentu goomvula omilongo ntano nane (54) gwomomukunda Othimbika moshikandjohogololo Okankolo, okwa longo iilonga yi nyanyalitha sho a yaha nondjembo yomushasho omukiintu gwe nokusa, omanga ine kiimangeleka.

Oshiningwanima shika osha ningwa metitano lyaziko lwopotundi 16h00 lwaampoka. Ottilie Shiimbi goomvula 35, gwomomukunda Omulingi mOkankolo opo a hulithile poshiningwanima shoka. Otaku hokololwa kutya Shiimbi okwa yahelwa megumbo lyaakuluntu ye mOmulingi moka.

Gumwe gwomaakwanezimo ngoka a tindi okutumbulwa kedhina okwati oshiningwanima shika osha halutha unene oomwenyo dhawo. “Oshali oshidhigu okutaambako onkundana ndjika petameko ashike katuna nkene otwi itaala ngaa shoka sha ningwapo, Kalunga oye mwene eshi kutya osha ningilwa shike,” ta ti ngaa. 

Otaku hokololwa kutya puumbangi mbo wa gandja aaholathani mbaka oya li ya kala momukunda Othimbika nolundji omulumentu nguno okwa kala anuwa nokuhepeka Shiimbi nguka, sigo aakwanezimo taya tokola ya kuthe ko Shiimbi eye kegumbo.

 “Oshiningwanima shika sho sha ningwa omulumentu nguka okwazi ashike kOthimbika nokuya a longe iilonga mbika tayi yemateke,” gumwe gwomaanamukunda ta gwedha po nga.

Omulumentu nguno okwali a adhika iimangeleka momuti esiku lya landula momukunda ogo tuu ngoka.  

Omukuluntu gosasiona yopolisi ya Nayena, Nathanael Haiyaka okwa koleke oshiningwanima shika kutya osho shili. “Kapuna ngoka a gandja uuyelele kombinga yoshinima shika oshoka sho twa ningi omapekaapeko inatu mona uuyelele wothaatha kutya omulumentu nguno okwa longele shike iilonga yomiyonena mbika. Otandi indile aakwashigwana ya yande elongitho lyiilwitho oshowo okukala noondjembo mokati kaantu,” Haiyaka ta ti ngaaka.

Haiyaka okwa kumagidha mboka yeli miihole opo ya yande omangwandjulathano oshowo yaa ha longelathane uuwinayi nande. “Ngele owa koneke kutya kamu iyuvite nomuholike goye ino mu longela nande uuwinayi kambadhala wu kale wa lopota kopolisi yili popepi nangoye meendelelo ye a katukilwe onkatu mbala ngaashi tashi vulika,” ta tsikile ko nga.  

LEAVE A REPLY

Please enter your comment!
Please enter your name here