Ospana yoCitizens ya kutha po omapapa ogendji pegandjo lyoBidvest Awards

0
155

Komutoolinkundana

WINDHOEK – Nonando ospana yoCitizen yeya ontiyali methigathano lyahugunina lyuudhano wekopi lyaBidvest Knockout Cup okuyeleka naandjoka yo African Stars ndjoka  ya sindana po ekopi ndika, ndjika oya pewa omapapa ogendji pethimbo lyegandjo lyaangoka moWindhoek oshiwike shika.

Lesley So-oabeb, ngoka a tulilemo ookoola dhivule hamano pethimbo lyuudhano auhe mbuka wa dhanwa oye a sindana  epapa lyolukaku lwoshingoli ndyoka lyeendele pamwe N$25 000.

Omudhani ngoka a dhana nawa pethimbo lyethigathano lyahugunina mboka wali waana ookoola nonando owali wa nyanyudha oye, Tjinotjiua wa Tjiwana ngoka  a pewa ekopi lyomudhani guudhano mbuka naandika olya ende wo pamwe noodola omayovi N$ 25 000.

Omuwiliki gwiipambele yomalanditho moBidvest Namibia , Theo Mberirua okwa tanga  aadhanitanga noshowo iikundaneki sho ya holola po onkalo ombwanawa mekopi lyaBidvest  Namibia nuumvo.

 “Nopwaana osheetwapo sheni shoka sha fala moku ninga ethigathano ndika li sindana andola shika shoku gandja omapole inashi ningwa ngaashi tatu shiningeni nena. 

Otandi gandja omapandulo gowina kaahikihiya mboka ya hiki nawa omaudhano agehe ye shiningi nondhilo yaana okapethili, nongeyi kapena mboka ya eta oontamanana nenge omanyenyeto kutya omaudhano ina ga hikwa nawa, naashika osha enditha agehe nawa pwaana omakateko gasha,’ Mberirua a popi nenyanyu.

Mberirua okwa indile woo olutu luudhano wetanga lyokoompadhi opo li soshimpwiyu kutya aantu oya holoka komaudhano opo uupale wu kale wuudha. “Oshinakugwanithwa  shewiliko lyuudhano mbuka noshoospana okutala kutya  aayambidhidhi oyendji otaya holoka komaudhano oku nkondopeka etsikilo lyetu okukwashilipaleka uudhano mbuka omumvo tuuka,” osho a dhimbulutha.

Amushanga Ndjayi gwo NFA Barry Rukoro  okwa pandula noku thethenga ayehe ya li ye na mo ombinga momalongekidho guudhano mbuka mwakwatelwa niikundaneki omolwa ethigathano ewanawa notali nyanyudha. “Epandulo lyowina otali pewa omukwashilipaleki Bidvest Namibia molwa ekwashilipaleko lye  neyambiidhidho lye lyaana ongamba oshowo koospana ndhoka dha kuthombinga muudhano mbuka,” Rukoro a ti.

Omunambelewa nguka omuleli gwetanga lyokoompadhi gwethimbo ele okwa li niitya yowina yolupandu lwa nuninwa ospana yo African Star ndjoka oyo sigo oompaka hayi hili oongundu dhaa yambidhidhi oyendji komaudhano gayo. 

“Otandi indile oospana adhihe dhi longe dha manamo okuholela ospana yo Stars ngele tashiya pokuhila oongundu dhaa yambidhidhi okukala pomaudhano oshowo okumwenyeka uudhano omathimbo ogendji onkalo itaayi vulu okudhimbiwa nando,” osho Rukoro a galikana. 

LEAVE A REPLY

Please enter your comment!
Please enter your name here