Ovaafrica otava dulu okufindana ekopi lounyuni

0
137

Ekopi lounyuni ola fa ashike li lile po okuulika kutya oilumbu ile oiwana yokoilongo youkouningino oya putuka noi na omafa neendunge idule yaAfrica.

Eshi ota shi talelwa konghalo omo Ovaafrica hava kala va ningwa ooSimon yaMalombo kEkopi loiwana yOunyuni. Keshe fiku ovo ngaho hava dengwa nokufangwa mo moudano medingonoko lotete netivali. 

Eshi tashi kumwifa osheshi kutya ovadanitanga Ovaafrica vahapu ovo hava kalele po oilongo yavo nokukufa ombinga mekopi lounyuni ovo naana ovo va talika ko onga ovadanitanga dingi meespana domo Europa noilongo ikwao yokouninginino. Ashike ngeenge oshe uya pekopi lounyuni, ovadani ava ohava nyengwa okukufa Africa koxulo yeonga. 

Eshi ota shi ulike kutya moAfrica kamuna oukwao wananghali, nohole yoshilongo noyenenedu.

Luhapu keshe odula ovadani Ovaafrica omanga ina va ya kekopi lounyuni ohava kala manga ve na oikolokosha nomapangelo avo omolwa oimaliwa, oyo ina va pewa ile ina i wana. Sha hala kutya ovadanitanga Ovaafrica ova tula ohole yoshimaliwa komesho yohole yoilongo yavo.

Ovadanitanga Ovaeuropa ohava kala va tala kutya olo efimano linene okudanena oshilongo shoye. Omanga moAfrica okudanena oshilongo kashina naanaa oshilonga. 

Ngee tava dana ihava kala veli tula mo, oha va kala va tila okuli monifa oshiponga shaashi ove shi kutya omboloto yavo oha i va dilile keeclaba ile keengudu domaudano dokoEurope oko hava danene.

Ombedi imwe oya pumbwa ngaho okupewa omapangelo omenenedu Africa, kakele kaSouth Africa na Nigeria ovo va itavela momaudauno, oomakula yavo moilonga ina ve li tula mo momaudano. 

Okutya ngaho oikondo yomaudano iha i yambididwa, yoo iha i pewa oshimaliwa shiyamba.

Paife ohatu teelele ngahelipi ovadani va ete po sha ngahelipi ngeenge kave na eyambidido la wana? Etanga moSouth Africa olatalika ko ongo ongeshefa ashike moilongo ihapu, etanga oudano ashike wanafangwa na ina u talika ko onga ongeshefa ile eifano tali dulu okuyambula po omunhu, okueta omahupilo nokuxumifa oshilongo komesho.

Utale nee omahangano oo vati okwa kalela po omaudano moAfrica, keshe fiku omahokololo ashike oimaliwa yavakwa po. 

Onghalo yokudengela odi peisho nokuliyambapaleka oyo naana oshitukulwa shakula shomoimbide oyo ta i shunifa oudano wetanga pedu mo Africa. 

Efimbo lokuliyandjela enenedu letu noilongo yetu onena, lokuyambidida ovadani pashimaliwa onena. Oilongo yetu oya pumbwa yoo okutuwa omukumo ngeenge tai dana oudano wopambili, i kadane noilongo oyo ishivike nawa onga oilongo oinanghono mokatanga kokeemhadi opo tuli longele ko yoo.

Ita shi kwafa sha oshilongo tashi li longekidile okuya kekopi lounyuni ndele ota shi hoolola DRC ile Namibia oye adane na  sho oudano wopambili. Omolwashike ihatu hoololwa oilongo ngaashi France ile Germany, Portugal nosho tuu. Efimbo lokudula ko eenghaku doufuuli nokudjala omakwa oufule nohole yenenedu letu onena, ngeenge hasho, odino oyo inenwe Africa koilongo yokouninginino mokatanga kokeemhadi nai kwao imwe ya wedwa po kai na fiku ixule. 

LEAVE A REPLY

Please enter your comment!
Please enter your name here