Ovanakaheke va udifwa nai kovapolifi

0
141

KuHelvy Shaanika 

ONGWEDIVA – Vamwe vo vakwashiwana vomomukunda Onakaheke ova holola eudo nai lavo eshi oshibofa omo ovalumenhu vatatu tava tamanekelwa edipao lomukainhu pomukunda wavo la tameka oshivike sha djako, ashike ovatamanekwa kava li mo momhangu.

Herman Mbango (22), Simon Shaanika (28) namumwaina Tylves Shaanika (20), ova li vena ngeno okuholoka momhangulilo yopomanda, ashike oshibofa shavo osha li sha undulilwa komesho patomhelo kutya ovalumenhu ava kava li ve wetike, nonande va etwa kopolifi koWindhoek okudja kOmusati, opo va holoke momhangu. 

Oshivike shadjako eshi oshibofa sha tamekulula momhangu ei yashiyako, Mbango, novalumenhu ovo ve li ovamwainafana Simon na Tylves Shaanika, ina va holoka momhangu shaashi vati ka va li ve wetike apa veli nonando kushivike nawa kutya ovafekelwa ava ova etwa kopolifi yokOmusati koWindhoek opo va holoke momhangu.

Simon Shaanika na Mbango, vo ovakala veli modolongo ta va longele oibofa yonghonga noyomunyeka kwa homatiwa oyo ihe na ekwatafano nedipao laEratus, omanga Tylves a kala kondje.

Oshinima eshi osha udifa nai ovakwashiwana ovo ve udite kutya opolifi onghee ta i twikile nokuya ouyuki moshipala medipao laErastus.

“Tete oshibofa osha kupulwashi shaashi va denga ovafekelwa naashi va kufa po omauyelele shinasha nekwato longhonga shihe li mondjila. Paife ovafekelwa ovo va vali kave wetike nande ova li momake avo, hano oshikwashike mboli? Opolifi ota i ningi ngaipi hano ngaho? Mafiku ita tu ke i lineekela vali,” Kandjeke oo a li aya komhangu ta ti.

Ashike vamwe vomovanambelewa ovakulunhu kohofa ova lombwela Kundana kutya nonande Mbango na Simon Shaanika ina va etwa mo efiku olo momhangu kave na apa va ya, ovakala ashike mondjedilolo. “Ovanambwelewa vopolifi ova ninga ngoo shili epuko eshi ina va eta ovatamanekwa momhangu, ashike eshi osha kandulwa po nale. Oshinima shimwe oshibofa ngeno ina shi dula okuya komesho shaashi  Mbango oo a li omutamanekwa wotete ka li e na omukalelipo wopaveta. Eshi osho nee sha eta opo omupanguli a undulile oihokolola ei komafiku Juli, 30 neudo,” omunambelewa wouyuuki oo ina hala edina laye li tumbulwe ta ti.  

Otaku hokololwa kutya oshibofa shovatamanekwa ava vatatu osha tekele muMaalitsa neudo momhangu yopombada mOshakati, omo va li tava pangulilwa edipao nekwatonghonga lomukainhu weedula 21 wedina Emilia Mvula Erastus olo la ningilwe mo2011 po Six Mabone Bar koNakaheke moshitukulwa shaMusati.

Ashike hahende wepangelo Dominic Lisulo, oo a li a kalela po okwali ina tambula ko oshidjemo shomhangu nokwa li a pula opo omhangulilo yopombadaelela hano oSupreme Court, opo i talulule oshibofa eshi. David Kandjeke mwene wo Six Mabone Bar, naye yoo okwa pula Omutamaneki-ndjai Martha Imalwa opo a ekeleshi oshidjemo shomhangu yopombada. Omakemo aa okwa udika ko nepeko eli ola patululwa oshikando shitivali. 

Paedokumende domhangu, olutu laErastus lihe na mwenyo nolili hamunghele, ola li la hangika monduda yokunangala ili konima yonduda yomalandifilo oko a li a kalela oilonga. 

Omutwe aushe mwa kwatelwa omayulu nomulungu, owa hangwa wa laimwa, nokwa hangwa yoo a mangwa nomwiya weenghaku pofingo. Okwa itavelwa kutya oinima aishe ei oyo ya eta efyo laErastus.  Omakonaakono a wedwa po okwa holola yoo kutya  omukainhu ou okwa kwatwa onghonga. Ovafekelwa navo vati ove li hokolola kopolifi kutya ovo va longa oilonga oyo inyanyalifa neenghono, nova twala yoo opolifi ponhele opo va li va fudika oitenda oyo va longifa opo va pande mo Erastus monduda.  Ashike muMaalitsa woneudo oshibofa eshi osha li sha umbwa mo momhangu yopombada mOshakati, molwaashi vati ovapolifi ovo va kwata po ovafekelwa ove va denga. Paveta, keshe ouyelele ta u yandjwa sha pitila medengo lomufekelwa iha u longifwa mohofa, nashi osho sha etifa oshibofa eshi shi umbwe mo momhangulilo yopombada.

LEAVE A REPLY

Please enter your comment!
Please enter your name here